Read Ninia Yali YEREMIA 34 Bible Online

YEREMIA 34 - Ninia Yali bible

YEREMIA 34

¹ Nebukadnezar raja Babel on anyo autsi tentara esan de it ap enunggul unuk amu on mel negara amu on mel at apma sebe ulug welatfag on etmano nim mangno debagdeg, iren o kota Yerusalem nim, kota maseroho wereg on nim bin kwik waharuk li em TUHAN ele an nobam isi.

²Aren uruk kwit de an raja Yehuda on Zedekia akit lalug wene diroho hweag-irik lakin isi, “An de ap homi Israel on enakni TUHAN Allah anyo en de kota su raja Babel on enggikmu fohukmu re aren harep fisaruhu.

³Hat de foldongdoho wilip aruhun fug, it de sen-habuhupdeg ap ai enggikmu og-umuhup. Hat de at nim ambi amuhupdeg inim hele maruhup deg de og-haplug o Babel lahup.

⁴Famen de Zedekia, An den hat hobahet nele uruk kahi on su holin! Hat hebere dog ambiangman wararuhun fug,

⁵hat de finik-fanoroho wararuhun. Ne, ap homi en hat hombawi atam waratswa on sal-enepuk kwit amben fano angge kemenyan yalduk katswa hag, hat hobahet oho ap homi airoho yaluhup. Iren fong waruho enele uruk kwit, ‘Yehei, nit nenowe raja mundoho eleg aik laha’ uruk kamuhup ulug An TUHAN en nele mundoho ihi” isi.

⁶Airoho isimu re TUHAN en isi ale anyo an den raja Yehuda on Zedekia anyo o Yerusalem wereg ma,

⁷ne it raja Babel autsi nim anyo re o kota anyo bin kuruk kweleg hweag-itihik. Iren de kota Lakhis mel, Aseka mel, o Yehuda fam etman kota elehet omamne roho ohoma hambuk deg on biren nim bin kusa.

⁸Raja Zedekia mel ap homi Yerusalem on mel en sali watuk kwit,

⁹ap homi Ibrani on enamingming angge atlug wereg on etma re it enunggul unuk Israel on misig en oho eke it enunggul unuk on ap oho hwelani oho eke enamingming anggeap enepuk kamuhup fug we fiselaroho fesehuk ulug sali watswa.

¹⁰Airoho dusareg de ap homi mel, pemerintah fam yabuk lehoma duruk on mel en sali watuk kwit enamingming angge mundoho fisela debesehuk, ne eke fahat enusug lamuhup fug ulug sali watswa enap omano en de dik-demdoho fisela debeseswa.

¹¹Famen fobik en it enenda aham dil lauk kwit de iren enamingming angge omano nikangge og-enepswareg de enomamne fam enamingming angge welamek ulug hweag-esauk katswa.

¹²Ai fam de TUHAN, Allah Israel on enakni anyo en de an den diroho ap homi etma hweag-esowag ulug hweag-nitsi, “An den hit henombawi o Mesir en og-eneplug wilibik waheg, ap Mesir on enamingming angge weregman loloho feseheg, duruk li em de An den it nim sali watuhuk.

¹⁴ An den uruk kwit de ap Ibrani on en enamingming angge atlug weregman de tahun folfalik en duruk halug, tahun sabiron ahaebog aik li re loloho wilibi fesehup irihik. Famen it henombawi en de An den uruk ale omano fu debeheg, hole feheg, duruk katswa fug.

¹⁵Nukoho welatuhuk on horog atlundiano fam de hiren henobabut aham duruhupdeg An nendama nahayehap kwelabeg ale duruhup. Hiren de hit henunggul unuk on en henamingming angge wereg on loloho wilibi fesehuk ulug An nim An nobam olma etmano en sali watuhup.

¹⁶Airoho duruhupmu re it pemerintah Yehuda fam en mel Yerusalem fam en mel, raja wereg ma pegawai wereg on mel, imam mel, hit henanggwenang hwalduk on mel, en hiren sali watuhup on anyo demdoho ulug duruk kwit, sapi ware folug biren kong-debelug de it enebe biren kong baleg kwe anyo sohwan-duswa. Famen, hiren fobik en henenda aham duruhupdeg an henalitno doho nobaharuk kahep. Henamingming angge it enenda boruk aleroho loloho wilibi feseruhup on etmano, hiren nikangge henomamne fam henamingming angge on amag ulug og-enepuk kahep. Ai fam de An TUHAN en nele uruk kwit, hit de An nawene melaleg anyo dahandoho duruk kwit An den diroho debeiyug ulug irihik on anyo holoho duk fug angge duruk kahep. Ai indip de hiren ap hit henunggul unuk Israel on etma loloho feseruk kahep fug ai fam. Ne, ketia re An den hit henobam henonggwareg en momal dowag ulug hweag-hesauk kahi ai: hiren weim ambiangman waratuk ale henenda a, siburu obok en a ite ouk amben siag on en a? An den de hiren sapi</(...)

²⁰An den de hit henaselei on hit henoarukoho duruk on fam og-esahuk. Mu re henebe wareg de suwe mel, olomene mel en nahup.

²¹Zedekia raja Yehuda on ai mel, pemerintah enobahet yabuk lehoma duruk enap mel, de An den ap it enowarukoho duruk on fam og-esahuk. An den de ap tentara Babel on ketia hit henobahalug lahesa on etma fam og-esahuk.

²²An den de it watlug o kota su bin kweheg, deleheg, han yaleheg, dukwag ulug eneg ale esahuk. O Yehuda fam kota-kota re An den iliangge leimu ap homi wereg elegma hag debehuk” isi.