Read Ninia Yali YEREMIA 35 Bible Online

YEREMIA 35 - Ninia Yali bible

YEREMIA 35

¹ At Yoyakim hun Yosia amloho anyo ap homi Yehuda on fahet raja wereg li re TUHAN ele an nobam uruk kwit,

²“Hat de hebe lalug it enunggul unuk agdoho Rekhab on ai nim hele marik lakin. Haren de it og-eneplug An nobam wirigmu omano amben misig fam eke kulug de anggur ahaik hwenang esakiyug” ulug hweag-nitsi.

³Airoho isimu re an den ap Rekhab unggul unuk agdoho on anyo mundoho hondog-enebik lauihik on eta enebe re, Yaazanya (hun eke unuk Yeremia hun Habazinya amloho ai amloho) nim it ori seberoho nim, it enomaliki ap on neg nim etma.

⁴An den it etano hondog eneplug o TUHAN Obam wirigmu, ambe Nabi Hanan hun Yigdalya amloho en hweag-esauk on kabog-durukmu anyo kuruhuk. Ambe aire Imam Maaseya hun Salum amloho anyo en on horogma it ap yabuk lehoma duruk on en ambe ai horogma eta kuruhuk. Maaseya aire pegawai leho on wereg lit sok o TUHAN obam ai fam kuruk on hwalduk katsi.

⁵Airoho kuruhukdeg de an den it ap Rekhab on etmano enalukwema ikwag fam anggur ahaik ele sop heg hwenanggoho ferihikdeg ikwag nauk on mel ferihik. Ai an den it fam “Henahaik nakiek” ulug hweag-esauihik.

⁶Famen iren onggo uruk kwit, “Nit de anggur nauk kahe fug. Nit de nenomba Yonadab hun Rekhab amloho ai en de nit nim niren ambiangma on nim de anggur ahaik nauk kam fug ulug ili isi. Isimu re ili wereg on aire mundoho-mundoho fahet wereg.

⁷Nit de yabuk wiroho yareheg, nit neneyabuk anggur yabuk wereg ma welaheg, oho duhuk fug. Ne, nit nenoluk welamuhuk huli etma re nit nenobam ulug oho wit-dahuk fug. Nit de kemah fam neg wereg lit o kwenang su fam ap bohon atlug welamuhuk.

⁸Mu re nit de Yonadab en melale-nenobahasi on etma re niren holoho neg duruhuk. Nit de nenoluk welamuhuk huli etma re nit nenebe nim nenohwesi nenomaliki nim en de anggur nauk kamuhuk fug.

⁹Niren nenebe wereg ma fahet o wit-dahuk fug, ite o sabo kemah saloho welamuhuk. Nit de neneyabuk anggur yabuk wereg fug, ne yabuk oho, ite gandum anggen yatuk on fahet oho wereg fug. We il horogdoho re nit nenomba Yonadab en hweag-nesasi on etma re niren holoho neg duruhuk.

¹¹Famen Nebukadnezar raja Babel on anyo en kwenang su fam bin kwik waharuk li em de, nit de ap tentara Babel on mel Siria on mel famen heye lalug de o Yerusalem o oko lahuk boruhuk. Ai fam de ketia nit suma welahe au” ulug uswa.

¹²Airoho uswama TUHAN Mun Along wereg on, Allah Israel on enakni anyo de an nebe ap Yehuda on mel Yerusalem wereg on mel enekit lalug TUHAN en uruk ale hweag-esa lowag ulug mingming napsi. TUHAN en uruk kwit, “An TUHAN en hein og-hesauk kwit, nunggwelug hiren An nele holuk fug angge deheg, nawene melaleg higitdoho duk fug angge deheg, duruk kahep.

¹⁴At Yonadab en at ambiangma on fam anggur nauk kam fug ulug isimu re iren holoho duruk katswa. Ketia huli en anggere iron etman ap misig en oho anggur eke nauk fug. Famen An den hit fam hundig-handig nele hweag-hesauk kahimen de hiren holduk kahep fug.

¹⁵Hundig-hundig An den namingming angge nabi omano mon-enebik waharukmu iren hit komo henepuk kwit, henobabut aham deheg, henolok welahep on etma bale feheg, diek ulug hweag-hesauk katswa. Iren hweag-hesauk kwit de hit o kwenang su An den hit henombawi fam og-esauihik mu oma welamuhup en de kembu ilah apne weheg, it enobahet deheg, duruk kam fug ulug hweag-hesauk katswa. Famen hit de fu debouk fug angge welaheg, holuk fug angge deheg, duruk kahep.

¹⁶Yonadab ambiangma on en de it enomba ele isi on holoho duruk, famen hit de An nele holoho duruk kahep fug.

¹⁷Ai fam de An TUHAN Mun Nalong welahi on, Allah Israel on enakni en de, hit ap Yehuda on mel, Yerusalem on mel henobam di anggin su anggin hit henobam fohuk ulug fouk deberihik on An den nele irihik ale higitdoho henobam fohuk. An den airoho duhuk ale aire, An nele hit henobam uruk kweleg hit holduk kahep fug, ne An den hit wol-henepuk kweleg, hiren henele wureb duruk kahep fug ai fam duhuk” isi.

¹⁸Ai en an den ap Rekhab unggul unuk on fam uruk kwit, TUHAN Mun Along wereg on, Allah Israel on enakni anyo en diroho eheik, “Hit de henomba Yonadab ele holoho duruk kahep; ne aren diyug ulug hweag-hesasi ale hiren anyo muko deheg, duruk kahep.

¹⁹Ai fam de An TUHAN Mun Nalong welahi on, Allah Israel on enakni en uruk kwit de at Yonadab hun Rekhab ambiangma on en de hundig-hundig etman ap misig eke An nobahet duruk karuhu” isi.