Read Ninia Yali YEREMIA 36 Bible Online

YEREMIA 36 - Ninia Yali bible

YEREMIA 36

¹ Yoyakim hun Yosia amloho anyo raja inatfagdeg Yehuda on melal-enepuk men neg de tahun ohwaneg on deg kweleg, TUHAN ele an nobam uruk kwit,

²“Buku [20] misig yinggilig angge walug de An den hat hobam ap Israel on mel Yehuda on mel, enunggul unuk amu on mel fahet hweag-hirihi on etma balin. An den keram at Yosia ebe raja wereg lit melal-enepuk li em keram hweag-hitihik on anyo fam en de yoho su huli hweag-hutuk kahi on etma abirangge baliyug.

³An den anggin on it Yehuda enap fam feseik waruhuk on etma fahet enesanggo hol hahupdeg de it enobabut aham duhup ano. Ai fam de An den it enesiag mel enolok fam duruk on mel napelehapdoho fesehuk” isi.

⁴Airoho isi ai fam de an den hun Barukh ap Neria amloho anyo wol-dirihikdeg de TUHAN en an nobam isi ale omano nele fam hweag-itihik. Mu re Barukh en de buku yinggilig on anyo fam bale fesi.

⁵Airoho debesimu an den wene diroho at hweag-itihik, “An de TUHAN en At Obam wirigmu kuhun fug isi.

⁶Anggere, nukoho ap homi enambilik hweang wereg on anyo aik waharuk halug de hat hebe etma lalug de hele hum fam an den nele fam hweag-hirihi ale etma bilingguhunmu re TUHAN en an hweag-nitsi ale etma enesanggo holuhup. Haren hebe re ap TUHAN Obam wirigmu wereg on etma mel, ne o kota amu kwe en waharuk on etma mel en hele urukmu furoho holukmu hag unduhuk lit hele iyug.

⁷Haren airoho uhun ai fam iren TUHAN obam somban eheg, it enolok ale duruk on etmano famen enenda aham deheg, duhup lam ane. TUHAN en de it fam olok atsireg de it unggum og-esahuk ulug enabug balsi,” ulug hweag-itihik.

⁸Airoho irihik mu re an den irihik ale higitdoho re at Barukh en de wene anyo o TUHAN Obam olma etmano en bilinggisi.

⁹At Yoyakim raja Yehuda fam inatsireg melal-enepuk men neg de tahun foab on bigalem soho angge wereg kweleg, ap homi en de TUHAN en enda hundig nesowag ulug de enambilik hweang[21] wereg latswa. Ap homi Yehuda on mel ap o kota amu kwe en watfag on mel mundoho re enambilik hweang welatswa.

¹⁰Airoho wereg ma re Barukh en buku yinggilig angge fam di ale su ale fahet baleg on anyo mundoho bilingguruk mu re ap homi mundoho en holduk katswa. Bilingguruk ale aire o TUHAN Obam hun Gemarya ap Safan amloho negara fahet sekretaris welatsi on anyo en yabuk durukmu kantor etman bilinggisi. Kantor aire ambe lilimol balegman il emberim fil, kobokwe o TUHAN Obam wirigmu kuruk on sokole unuk Pintu Gerbang Baru anyo horogma eta wereg ma bilinggisi.

¹¹Mikhaya hun Gemarya amloho hun Safan omba ai en holduk men de at Barukh en de TUHAN ele isi on buku yinggilig famen bilinggisi on holsi.

¹²Airoho holsireg de at ebe ap raja obam silimu kantor sekretaris negara fahet lisu balduk on wereg ma etmano lasi. Laukmu de etmano ap yabuk lehoma duruk on de wene balduk katswa. Delaya hun Semaya amloho ha, Elnatan hun Akhbor amloho ha, Gemarya hun Safan amloho ha, Zedekia hun Hananya amloho ha, Elisama ap lisu balduk on welatsi ahun ai ha, ap eneyabuk leho wereg on fomane ha en wene balduk katswa.

¹³Airoho wereg ma re at Mikhaya en de hun Barukh en o TUHAN obam en bilinggisi on etmano mundoho dindilsi.

¹⁴Airoho disimu re it ap yabuk lehoma duruk enap omano en de ap unuk Yehudi (hun Netanya amloho, hun Selem omba, hun Kusyi) ambu aire hun Barukh en buku yinggilig angge aren bilinggisi on ai walug wamag ulug yonggo mondotswa. Ma re at Barukh en de buku anyo walug it enekit lasi.

¹⁵Lasimu iren uruk kwit, “Hweriamin, hweria atlug de buku yinggilig on ai nit fam oho biling nesakin” ulug hweag-utswa. Ma re Barukh en de enele holoho neg disi.

¹⁶At Barukh en mundoho bilinggisi mu re it omano enenda duk uswareg iren Barukh fam uruk kwit, “Niren wene su fahet raja wereg ma olukap dik laul” ulug uswa.

¹⁷Ai en iren at hein og-hauk kwit, “Haren wene etma re keroho baldihin, furoho hweag-nesakin. At Yeremia en ele fam hweag-hitsi mu a?” Ulug hein wausa.

¹⁸Airoho hein wausa ma at Barukh en onggo uruk kwit, “Demdoho, ele misig heg suma baleg on oma re Yeremia en ele fam hweag-nitsi, ne an den de lisu ahalue fam buku yinggilig on au baldihik su” ulug hweag-esasi.

¹⁹Ai isimu iren uruk kwit, “Hat nim Yeremia nim de herag aik laluhup. Ne, hit herag amluhupmu etma re ap en oho hesalusa hayog” ulug hweag-utswa.

²⁰Airoho uswareg de ap yabuk lehoma duruk on omano en de buku yinggilig baleg anyo re ambe hun sekretaris Elisama en anyo fam fousareg de it enebe raja akit lausareg wene anyo fahet olukap dik lausa.

²¹Airoho dusama re raja en Yehudi fam buku ai wag lowag ulug mingming disimu wag lasi. At Yehudi en de at Elisama en ambe anyo en wag lasireg de raja il hanim nim ap yabuk lehoma duruk on aluluk kwe maseroho unduhuk latswa on fam nim bilinggisi.

²²Eta li em de o muru duruk li em bigalem soho on fam anggere raja ebe indok yaloho iring daukmu etmano hweriegma bilinggisi.

²³Airoho at Yehudi en siog henahan ohwan hagdoho bilinggisi men de raja en fili dorangge eke fam de asiog etano deneloho wasireg de indokma hwik-esa kwisi. Aren airoho neg duruk men de buku yinggilig angge anyo mundoho yale fesi.

²⁴Airoho durukmu at Elnatan mel, Delaya mel, Gemarya mel de, nenakni airoho duruk eleg ulug kini-wani uswaman de at raja en it enele holuk eleg angge disi. At raja ebe mel ne it yabuk lehoma duruk on mel en buku anyo fam baleg ale enesanggo holswa on etmano fahet de enakol deheg, ne enenda wat-deheg, duruk ale mel duswa fug.

²⁶Airoho duk fug angge en de raja en at amloho Yerahmeel anyo mel Seraya hun Azriel amloho anyo mel, Selemya hun Abdeel amloho anyo mel en de an nim Barukh an nalisu balduk on anyo nim sen-nenebukwag ulug mingming enepsi. Famen TUHAN en nit heraho nenobahasi.

²⁷At Raja Yoyakim en buku yinggilig angge an den Barukh fam nele en hweag-utuk kweleg balsi angge anyo hal yale fesimu re, TUHAN en an nobam de

²⁸buku yinggilig on amu on eke walug, de buku keram on fam baleg latsi etano hag balukwag ulug mingming napsi.

²⁹TUHAN en an fam uruk kwit, an den raja fam diroho hweag-omag ulug isi, “Haren de buku yinggilig on ai mundoho han yalehen, ne haren Yeremia fam hein wauk kwit, ap raja Babel on watlug o kwenang su luluhun deheg, ap homi mel enowam di angge su angge mel enowareheg, duhu ulug de nunggwelug baldihin, ulug hein wauihin.

³⁰Ai fam de, hat Yoyakim su, An TUHAN en hat fam nele hweag-hutuk kahi. Hat hambiangman ondoho on en de at Raja Daud ambiangma on ulug misig oho eke raja welamuhup fug. Hat hebe wareg de hwik-esa wilibuhupmu re nukoho anggo re mo ahanhan howareheg, ne hup anggo re lil en howareheg, duhun.

³¹Hat nim, it hat hambiangma on nim, ap hat hapma yabuk duruk on nim de hiren henesiag duruhup on etma fam An den unggum og-hesahuk. Hat hebe mel ne ap homi Yehuda on mel Yerusalem on mel en de An den henobam feik waruhuk ulug fouk deberihik on anyo fahet fu deberuhup fug mu re, An den de hit abirangge fam anggin on etma feik waruhuk” isi.

³²Airoho isimu an den buku yinggilig keron eke wauihikdeg, an nobahet lisu balduk on hun Barukh anyo og-itihik mu re aren de an den nele fam uruk ale omano mundoho bale fesi, aire buku keram on fam baleg latsi ale nim ne wene fobik en fomane lohon nim bale fesi.