Read Ninia Yali YEREMIA 37 Bible Online

YEREMIA 37 - Ninia Yali bible

YEREMIA 37

¹ At Nebukadnezar raja Babel on anyo en de hun Yoyakim amloho Yoyakhin anyo ebe raja wereg angge sebele febagdeg, Yosia amloho Zedekia anyo raja Yehuda on fahet welamag ulug unduhuk febag.

²Famen at Zedekia ebe on oho, ne autsi pegawai en oho ne omaliki holduk on en oho re an den wene TUHAN en hweag-nutuk mu hweag-esauk katihik on etmano mel wene amu on mel higitdoho duruk katswa fug.

³Raja Zedekia en de hun Salemya amloho Yukhal nim Imam Zefanya hun Maaseya amloho anyo nim yonggo mon-enebik waharuk kwit de an den it enunggul unuk ai enobahet TUHAN Allah fam somban ukwag ulug heng napsi.

⁴Eta li em de an nebe sabu hetdoho kwelap nabuk eleg li we ap homi enesahali kwe noruk li em atsi.

⁵Tentara Babel on de Yerusalem walinggik lauk ulug duruk kwit holduk men de tentara Mesir on de o Mesir en weim yapul ulug waharuk ebag ma it anyo suhuloho lebag.

⁶TUHAN Allah Israel on enakni en an nobam uruk kwit,

⁷wene diroho ap Zedekia en yonggo mon-enebik wahasi on hweag-esakin isi, “Hiren Zedekia fam uruk kwit, ‘Tentara Mesir on en hat let-habul ulug waharuk on aire suhul halug enobam lahup.

⁸Mu re ap Babel on nikangge wamuhupdeg o kota su bin kwik watlug sebeloho feheg, harep fisareheg, duhup.

⁹An TUHAN en hat holuge foruk kahi su, hat de honggwareg lal-dauk kwit de ap Babel on de mundoho lausa angge re nikangge wamuhup ulug wenggelduk kahen ale aire duk fug. It de nikangge wamuhup.

¹⁰Haren ap tentara Babel on abirangge enalong eleho fehen ha man we ap yebil hum alereg on it enobam kemah fene welaman oho re iren nikangge inatlug kota su han yaluk alereg,’ isi ulug hweag-omagdoho hweag-esakin” isi.

¹¹Tentara Mesir on kota Yerusalem fam waharuk en de tenata Babel on suhul hausa.

¹²Ma re an o Yerusalem embeselug de wilayah Benyamin en on fil kwenang enabinggi angge nit nenahain elekwe on en omano andohon oho hwelamin ulug lauihik.

¹³Famen de an nebe sokole Pintu Gerbang Benyamin uruk on ai fam eta aik lauihikmen de ap tentara eta kahaleg wereg on enowe en an sene nobahasireg ele uruk kwit, “Hat de ap homi Babel on fil heye lauk kahen!” ulug isi. (Ap perwira ai unuk de Yeria; hun Selemya amloho, Hananya omba ai.)

¹⁴Airoho isimu an den onggo uruk kwit, “Seiale uruk kahen! An de ap selei on inibil etma heye lamin ulug duruk kahi fug” ulug hweag-itihik. Famen at Yeria en holduk katsi fug. Aren de an nebe sen-napsireg de og-naplug ap yabuk lehoma duruk on enakit lasi.

¹⁵Mu re iren an suahal siagdoho bet-napswareg ap yeik noarukwag ulug hweag-esausareg hun Yonatan negara fahet lisu balduk on anyo obam hetdoho nobahausa. O aire ap sabu hetdoho kwelap-enepukmu hag debousa.

¹⁶An nebe re ik sene kwenang apma eke fam belabe nobahausa ma re etma anunuroho welatihik.

¹⁷Airoho welatihikmen Raja Zedekia en ap mingming enepuk kwit an nebe og-naplug at ebe wereg ma lowag ulug isimu og-naplug lausa. Etman de aren linglong an hein og-neauk kwit, TUHAN eheik ale eke wereg a isi. Ai isimu an den onggo uruk kwit, “Wereg” ulug hweag-itihik. Airoho irihikdeg eke nim uruk kwit, “Nakni hat de raja Babel on enggikmu hobahaku!” ulug hweag-itihik.

¹⁸Airoho irihikdeg an den hein og-hauk kwit, “An den nolok fam nakni hat hobam mel, ap hat hapma yabuk duruk on mel, ite ap homi enobam mel fam de siag ke on dirihik mu an hele waroho kwelabe nobahakep?

¹⁹Nakni haren on nabi en uruk kwit raja Babel on en de o suma bin kwik waheg, nakni hat hebe mel sen-habik waheg, duhu fug uruk katswa on omano kema wereg?

²⁰Nakni hunuk bogdeg, ketia re an den heng hapuk kahi on su hol-nabin. An den at Yonatan obam o sabu hetdoho feserukmu ai nikangge mon-nabuk fug, an de warahi ha alereg anggere” ulug hweag-itihik.

²¹Airoho irihik mu re raja Zedekia en de an nebe ambe lilimol fam etma hetdoho nobahaukwag ulug hweag-esasi. Mu re at nebe etma welatihik, ne nukoho hundig-hundig de an roti og-nutuk kwit neg weregman de o kota ai fam roti wereg on mundoho eleg atsi.