Read Ninia Yali YEREMIA 38 Bible Online

YEREMIA 38 - Ninia Yali bible

YEREMIA 38

¹TUHAN en de wene su an den ap homi fam hweag-esowag ulug hweag-nitsi, “Kota su re An den tentara Babel on fam og-esahukmu re iren along elehap debehup. Ne, ap homi en eke o kota ilonggoma etma wereg lamuhup on de weim fam en ane, siburu obok en ane, ouk amben siag on en ane waramuhup. Famen ap sa en wilibik lalug ebe it Babel on enenggikmu og-esauk halug de, at ebe waruhup fug mu re ahap wendareg welaruhu” isi ulug hweag-esauihik. An den airoho hweag-esaukmu anyo re Sefaca hun Matan amloho anyo ha, Gedalya hun Pasyhur amloho anyo ha, Yukhal hun Selemya amloho anyo ha, Pasyur hun Malkia amloho anyo ha en holeg latswa.

⁴Ai fam de ap yabuk lehoma duruk enap etano re raja akit lausareg hweag-utuk kwit, “Ap su re ebe binggi watul. Aren uruk ale etma re ap tentara mel ne ap amu on mel o kota suma wereg on fam enendama kwelapuk anggere. Aren de ap homi let-enepuk de fug, ite alemare feseruk,” ulug hweag-utswa.

⁵Airoho uswama Raja Zedekia en onggo uruk kwit, “Fano! An den de hit kwe bal henepmin fug anggere hit henenda boruk ale etma neg at fam debeiyug” ulug hweag-esasi.

⁶Airoho isimu re iren an og-naplug de sabu liloho re ik bohwe eke at raja amloho Malkia en on raja obam bumbuk mu en horogma etma welatsi on anyo fam belap-napswa. Ik bohwe ai fam de ik elegma sabelep neg deg ma re an nebe sabelep fam obuk irihik.

⁷Eta li em de ap o Sudan on eke re at raja obam etma yabuk duruk katsi. Unuk de Ebed-Melekh. Aren holduk men de an nebe bohwe ai fam belabehesa urukmu holsi. Airoho holsireg de at raja ebe re sokole Gerbang Benyamin urukmu eta wene baldukmu melal-enepuk men de at

⁸Ebed-Melekh anyo etma lasireg raja fam uruk kwit,

⁹“Nakni hun kain welahen on, ap etman dehesa ale etma re mun siagdoho dehesa. Iren de Nabi Yeremia anyo ik bohwe habuligmu belabehesa. Anggere nauk on oho kota su fam mundoho eleg atsi mu re at ebe demdoho waratmisi lit deg” ulug hweag-itsi.

¹⁰Airoho isimu re raja en at Ebed-Melekh fam uruk kwit, “Ap henahan[22] hondog esalug de at Yeremia ebe owan waram fugmen lisoho wilibi feik lakiek,” ulug hweag-esasi.

¹¹Mu re at Ebed-Melekh nim ap henahan etano nim de o di angge su angge forukmu etmano lausareg de kain mining on wausareg iren sabu fam liloho an bohwe elma wereg ma belap nutswa.

¹²Airoho belabe folug Ebed-Melekh en an nobam uruk kwit, kain etma re an nekalma sapli angge fahet sabu en ken-ken duk no ulug fein isimu re, at Ebed-Melekh en isi ale anyo an higitdoho dirihik.

¹³Airoho deberihik mu re iren an nebe ik bohwe anyo fam en lisoho lahabe nobahaik wahausa. Airoho debelug de an nebe raja weregman ambe lilimol balegma omano hetdoho nobahausa.

¹⁴Nukoho eke amu on fam de Raja Zedekia en ap mingming enepuk kwit an nebe og-naplug at wereg ma, TUHAN Obam en sokole henahaneg on fam lowag ulug isimu, lauihikmen aren ele an nobam uruk kwit, “An den hat fam hein og-heamin anggere ebenamegdoho neg iyug, ne eke herahauk fug” ulug hweag-nitsi.

¹⁵Airoho isimu an den onggo uruk kwit, “An den demdoho on iminmen de nakni haren an nebe binggi wariek imihin; ne an den komo ale hweag-hitminmen de nakni haren higitdoho dimihin fug lit deg” ulug hweag-itihik.

¹⁶Airoho irihikmen Raja Zedekia en ele linglong an nobam ele sali uruk kwit, “Allah mundoho oluk wereg, Allah en enoluk debeseruk on ai unuk fam an den hombuk balduk kahi anggere an den hat hebe howareheg, ne ap en howarukwag ulug ap enenggikmu feheg, dimin fug,” ulug hweag-nitsi.

¹⁷Airoho isimu an den Zedekia fam uruk kwit, TUHAN Mun Along wereg on, Allah ap homi Israel on en apne wauk on anyo en de diroho eheik, “Hat lahe ap Babel enap fam sebe uruk halug de hat hebe howaruhup fug, ne kota su oho re han yaluhup fug. Ne, hat nim it hahain elekwe on nim de henahap wendat-aruhu.

¹⁸Famen haren it enenggikmu atuk ale herim deg halug de kota su re ap Babel on enenggikmu aruhu. Iren de mun alkan damukdoho han yaluhupmu re hat lil-aruhun fug” isi ulug hweag-itihik.

¹⁹Airoho irihik mu raja en onggo uruk kwit, “An de ap niron en ap Babel inibil heye lausa on etma fahet nakol duruk kahi. Aire an nebe it og-isil lauk em an nebe nong-hong nea ulug duruk kahi” ulug isi.

²⁰Ai isimu an den onggo uruk kwit, “Eleg nakni hat de it enenggikmu hobahaku fug. Nakni haren de TUHAN en diyug eheik ale etma duhun en heng hapuk kahi. Ne, hat airoho duhun halug de di on su on etma hwal atil neg lahumu nakni hat hebe howaruhup fug.

²¹Famen nakni haren hebe it enenggikmu og-esauk fug halug de fobik aruhu ale fahet de TUHAN en an nobam unug-hasi.

²²Na og-hauk hag fam hauihik on aire homi nakni hobam bumbuk fam wereg on etma re feleleng eneplug de raja Babel on akit lauk katswa. Airoho laukmu it kwe lauk kwit diroho uruk katswa, ‘Raja re ori on en enda nong-hong hehesa airoho dehesareg iren sebeloho foroho. Ketia re at eyog dahandoho ik sene fam obuk eheikma re it omano hihil ahesa’ il lauk mu” nil hauihik ulug hweag-itihik.

²³An den eke nim uruk kwit, “Nakni hat hohwe, homaliki mel mundoho re raja Babel on enekit og-eneplug lahup. Nakni hat hebe oho re it fam en lil aruhun fug. Nakni hat hebe re raja Babel on en sen-habeheg, kota su oho mundoho han yaleheg, duhu” ulug hweag-itihik.

²⁴Airoho irihikmen Zedekia en uruk kwit, “Hat hebe howaruk no re nit nenele ehe on au fahet de ap homi hweag-esa fug.

²⁵Ne, ap yabuk lehoma duruk on omano en holduk men de an hat ninim nele marehesa ulug holuhupdeg de it hat hakit watlug niren ehe ale etma hein og-habuhup. Iren de hat hebe howatul fug ulug hombuk balduk mu haren it fam abirangge etma dindil esahun halug de,

²⁶haren uruk kwit de, an de sabu hetdoho kwelap-enepukmu etma nikangge mon-nabuhup aire nerim ulug heng ihi, ulug hweag-esakiyug” ulug hweag-nitsi.

²⁷Airoho isimu weregman de ap yabuk lehoma duruk enap omano wahausareg de an hein og-nabik wahaswa. Ma re an den de at raja en iyug ulug isi ale etano higit-hagatdoho hweag-esauihik. Ai fam de ap misig en oho eke nit raja nim nenele matuhuk ale omano holswa fug mu re, iren diroho suroho ulug eke duswa fug.

²⁸ An de ap raja obam en ambe lilimol balegma etma hetdoho nobahausa ma weregman neg de o Yerusalem anyo ap selei on en del dausa.