Read Ninia Yali YEREMIA 39 Bible Online

YEREMIA 39 - Ninia Yali bible

YEREMIA 39

¹Zedekia ap homi Yehuda on fahet raja inatfagdeg welal-enepuk men neg de tahun soho on bigalem num angge wereg kweleg, Nebukadnezar raja Babel on anyo autsi dog yapuk enap esan nim lohwal halug Yerusalem bin kwik wahausa.

²Ne, at Zedekia ebe raja wereg kweleg neg tanggal sembilan salim bigalem ohwaneg on fam tahun nesanggo on fam deg kweleg de o kota fak lehet oho on anyo selei on en moluluk dusareg,

³Yerusalem sebelik kusa.[23] Ma re ap Babel enap en raja obahet yabuk lehoma duruk on omano re wahausareg de sokole unuk Pintu Gerbang Tengah urukmu etma lausareg hwerieg latswa. Airoho weregman re it enesahalimu etma re ap Nergal Sarezer mel, Samgar Nebo mel, Sarsekim o raja obam fahet kepala welatsi ahun ai mel, Nergal Sarezer Rabmag mel ne ap sehen foroho on enowesi fomane mel etma welatswa.[24]

⁴Airoho wereg ma Raja Zedekia mel autsi tentara abirangge en mel atsi ale omano inil hausareg de iren heye wiliplug hup anyo salim neg o Yordan fanggong fil etma laul ulug dung hauk katswa. Iren kwe o ap raja wereg obam en yabuk yaho on wereg kwe en de sokole eke fak lehet biren eta fam hundig on fene en wilipul ulug duruk katswa.

⁵Famen de tentara Babel on en it mug-eneplug lausareg de Zedekia re o Yerikho donggoman senetswa. Ai en iren de walug Raja Nebukadnezar akit o Ribla en daerah Hamat fam etma wereg ma wahausareg ebe binggi ware foul uswa.

⁶Kota ai fam en neg at omaliki oho at onggwareg il wereg kweleg enowatswa, ai en ap Yehuda on yabuk lehoma duruk on omano oho mundoho enowatswa.

⁷Ai en de Zedekia anyo il hulil esalug sabu het-debousareg walug Babel lausa.

⁸Etmano airoho duruk kweleg etano re ap Babel enap en de ap raja obam bumbuk anyo harep feheg, ap homi enobam nim, han yaleheg, Yerusalem fak lehet oho on moluluk-malalak eseheg, duruk katswa.

⁹Airoho debeswareg neg de ap o kota wereg on mel, ne it foma enonggwareg en it Babel on enenggikmu atswa on mel, de Nebuzaradan tentara Babel on fahet enowe welatsi on en feleleng eneplug lasi.

¹⁰Ap homi holduk on fomane mun kunggu on mel, enangge eleg on mel de o Yehuda embeseswareg anggur yabuk mel yabuk amu on mel og-esausa.

¹¹Raja Nebukadnezar en de it ap tentara Babel on enowe Nebuzaradan anyo wene diroho melaloho wilibukwag ulug hweag-itsi.

¹²“Yeremia ai herarik lalug de at ebe fanoroho hwalduk kamuk. Hiren diroho suroho ulug debouk fug, aren heng uruk angge etma higitdoho neg diyug” ulug wilibi foukwag isi.

¹³Mu re at Nebuzaradan nim autsi apma on biren, Nebusyazban mel, Nergal-Sarezer mel, Babel on en ap tentara eneyabuk leho on mel en de,

¹⁴an nebe o raja obam ambe lilimol balegma omano en og-naplug de at Gedalya hun Ahikam amloho, hun Safan omba ai en hondoko nahap wendareg angge nobahaik lowag ulug obam domohe fousa. Ma re an nebe ap homi enesahalimu welatihik.

¹⁵An nebe hele waroho ambe lilimol fam omano wereg kweleg etma re TUHAN en an mingming napuk kwit,

¹⁶ap Ebed-Melekh obam Sudan on ai fam uruk kwit de, TUHAN Mun Along wereg on, Allah Israel on enakni ai en diroho eheik iyug, “Endam an den irihik hag de, An den kota su fam anggin on feik waruhuk, sigdoho wereg on de fug. Ne, haren de etma atuk mu hil hahun.

¹⁷Famen de An TUHAN en de hat halong baloho fahat-husug laruhuk. Hat hebe re ap haren hakol enepuk kahen on etma fam og-esahup fug.

¹⁸An den hat hahap wendat-habuhukmu re ap en hat howaruhup fug. Haren An nobam hembisig wereg ma re, hat holuk ai wendareg welaruhun. Ulug An TUHAN en nele mundoho ihi” ulug hweag-umuk isi.