Read Ninia Yali YEREMIA 4 Bible Online

YEREMIA 4 - Ninia Yali bible

YEREMIA 4

¹TUHAN ele uruk kwit, “Ap homi Israel on yaho, hit waharuk ale henenda halug de An nakit sombandoho manik. Hiren de henanggembu An den nerim duruk kahi angge etma dam hwik-esalug de An nobam dipdoho neg duruk kamek.

²Hiren An nunuk fam hombuk baleheg, bekitdoho deheg, katukdoho deheg, demdoho deheg, duruk kamuhup halug de, ap di unggul unuk su unggul unuk en de An den it fanoap debesoukwag ulug heng napuk kamuhup, ne iren de An mot-napuk kamuhup” isi ebag.

³ TUHAN en ap homi Yerusalem wereg on mel Yehuda on mel fam ele uruk kwit, “Henanggwenang owan yabuk wutuk kahep fug on etma wit-dauk kamek; hiren a alog angge on wilipukmu foluk fug.

⁴Hiren An henakni TUHAN nim sali wat-wat atuhuk on anyo seneg lamuk, ne hit ap homi Yehuda on mel Yerusalem on mel de henebe An nobahet neg eneko fahat dalug welamek. Airoho duruk kamuhup fugmen de An nolok de indok en harep nauk kwit dihin ha yihin ha naukmu ap sa en famen oho nahuluk fug alereg anyo hag henobam duhuk. Abirangge etma re hiren henolok fam duruk kahep ai fam de hit henobam aik waruhu,” isi ebag.

⁵O kwenang mundoho fene etma trompet ele fu diek! Henele enamegdoho ngai diek. Ap homi Yehuda on mel Yerusalem on mel de, buroho o kota helep along bal angge omamneroho wirigmu etma lowag ulug hweag-esakiek.

⁶Kobokwe Duk Sion TUHAN en on anyo fam lauk on folo-folo hweag-esakiek, fol-folo etma lakiek henape mo ulug welam fug. TUHAN en de utara fil etman anggin on mun siahap duruk on mondorik waharuk.

⁷No singa heraho weregman wilibik waharuk hag, it enunggul unuk enunggul unuk angge Yehuda elehap dul ulug wahesa on anyo mundoho wilibik wahesa. Kota-kota it Yehuda on en etma re mundoho lobag uhumu, ap homi wereg lam fug alereg ma aruhu.

⁸Ai fahet de oba yareheg, fong wareheg, duruk kamek, fong watuk kwit enegdoho ulug sum karung on bug diek. TUHAN olok anyo Yehuda on fam en de seram atuk fug anggere.

⁹TUHAN ele uruk kwit, “Nukoho ai salim de ap raja-raja mel, ap yabuk lehoma duruk enap mel, de enenda siag aruhu ne imam de enowag elek duhup, ne nabi re youk lahup” isi ebag.

¹⁰Airoho isimu an den uruk kwit, “TUHAN Mun Leho welahen on nakni, Haren de ap homi Yehuda on mel Yerusalem on mel seiale hweag-esauihin! Haren uruk kwit henenda seroho neg welamuhup irihin famen ketia nit nenebe karog ambiangma amukoho lahe oma re” ulug hweag-itihik.

¹¹Li andigim aruhu salim ap homi Yehuda on mel Yerusalem on mel wene enobam hweag-esauk kwit hol ahanhan on ili angge lei fil en hit hinibil furik waharuk. Hol aire hol hundig durukmu alalangge harulug lauk on hag de fug,

¹²ite hol omamne on TUHAN en omaliki fam unggum fesoukwag ulug mingming deheikma waharuk.

¹³Furiek, selei on de hena hagdoho enam atuk. Enangge kereta dog yapuk anggere hol sielu hag, ne enangge kuda re suwe ikwesahop daroho lauk ale andomog deg famen mun lepengdoho lauk on deg. Aireg ma re yehei, nit de mundoho alemat amukoho lahe! Nit elehap nenebikohoreg!

¹⁴Yerusalem, hat hahap wendat-habukwag ulug hendama holok wereg on ai hwik-esakin. Huli ke huli hat hendama holok wereg on ai foroho lit neg welaruhun?

¹⁵O kota Dan fam en nim duk Efraim en on fam en nim ap wene yonggo siag on walug wahesa.

¹⁶Iren de ap enunggul unuk enunggul unuk ebere feseheg, ap homi Yehuda on enelugwe feseheg duruk kwit de selei[2] on o kwenang yatma on fam en waharuk ik wahesa. Iren de o kota-kota Yehuda on fam weim aplohok ikohoreg

¹⁷ne o Yerusalem de ap yabuk yahoma kahaleg wereg hag mase dukohoreg. Abirangge aire it enunggul unuk Yehuda on en TUHAN ele sahale folug duruk katswa fam atmisi. Ulug TUHAN ele mundoho eheik.

¹⁸Yehuda ao, hat honggwareg en neg anggin anggolo on ai hobam feik wahen. Hat hebe welahen ale mel, duruk kahen ale mel fam de anggin on ai hendama yehelik kwik waharuk ai.

¹⁹Yehei an nenda mundoho ouk hauk kwit, anggin hauk kwit welam fug ale aha. Trompet fu duruk on ele mel weim aplohok mil uruk on mel holihireg de an nenda mundoho elek-elek angge duruk, an nonggwareg en hambuk damin ulug dihi ha fug ale aha.

²⁰Anggin on eke wam eke wam duruk kwit o kwenang suno abirangge siahap deberuk. Fetagdoho neg an nobam sabo anyo siahap esauk, sum kain omano dilip-dalap esauk.

²¹Ap en mun enamururu doho weim yapuk on kumu enepuk kwit neg wereg ma re ke huli welaruhuk? Kea huli no trompet ele fu-fa esauk on etma holduk kwit neg welaruhuk?

²²TUHAN ele uruk kwit, “An nomaliki etma re mun morue deg, iren An fu nobaharuk fug. It de omalik sohou on hag deg lit, wenggelduk on dorangge ulug oho wereg fug; enolok ale duruk ale fahet de hebel-bebel deg, fano ale duruk ale fahet de nong-hong deg” isi ebag.

²³Kwenang fam etma nil fu hauk men, di angge su angge elegma birim deg, bohol fil nil lahap wauk men, yehei, seleg duruk angge eke wereg fug.

²⁴An den dom-dom mel duk-duk mel yaron omano fu hauk men, mun nik aleroho lang-fang hauk.

²⁵An den ap homi eke wereg ma esauk kahi fug suwe oho abirangge daruruk fug.

²⁶Kwenang mun hesiligmu omano unggul ahap neg atsi, kota re luluhundoho asenggep atsi, aire At TUHAN en omaliki fam olok besireg disi. (

²⁷TUHAN en uruk kwit de o kwenangma abirangge re lei birim uhu, famen Aren abirangge elehap debehu fug.)

²⁸Kwenang de fong waruhu, bohol de heik koruag aruhu. TUHAN ele mundoho isimu duhuk besi on aham aruhu fug. Aren wene mundoho kong disimu dorangge ulug oho yongno debehu fug.

²⁹Ap esan kuda fam lahalug waharuk on mel sehen anggen enap waharuk on mel enele amitmit durukmu re, ap homi enebe domog da leag la alereg. Ohwei fene it kwik lauk bule il kwe it laharuk. O kota abirangge dereng-dereng urukmu ap homi etma wereg ale fahet eke enendareg fug.

³⁰Hat Yerusalem su, hat de mundoho lin hehesa anggere di ale su ale eke duk fug alereg! Nunggwelug haren jubah mep on wan-deheg, halili angge emas, perak on mel fam lahabeheg, ne hil huhuni weheg, duruk kahen? It haren henda hundig enepuk kahen on omano en de hat fahet de mundoho enerim atsireg, iren de hat hebe hoatul ulug duruk kweleg etma re we alemaroho neg-dauk kahen.

³¹An nesanggo holduk men de hwe omalik enderikoho nenek duruk on en durukmu hag holdihik; hwe duhum on en omalik wandeba on enderikoho duruk hag, Yerusalem sat hopo eheikdeg oba yatuk. Enggik langdoho nenek duruk kwit: “Yehei, an mundoho alemat aikoho lahi an ap selei on en nowarukoho deg!” Uruk.