Read Ninia Yali YEREMIA 40 Bible Online

YEREMIA 40 - Ninia Yali bible

YEREMIA 40

¹At Nebuzaradan it Babel on tentara fahet enowe welatsi on anyo en an o Rama en loloho nobahasimu weregman TUHAN ele an nobam hweag-nitsi. An de ap homi Yerusalem on mel Yehuda on mel het eneplug o Babel laukmu etmano sabu hetdoho og-naplug lausa ma etma welatihik.

²Ap tentara Babel on enowe anyo en an namu wol-napsireg ele uruk kwit, “TUHAN Allah hat hakni ai en de o kwenang su mundoho luluhun duhuk ulug abug balsi.

³Airoho isi ale anyo re hat hunggul unuk on en siag duruk kwit At ele holoho duruk katswa fug mu ketia disi au.

⁴Ketia re an den de hat henggikmu kumbi het deg lahen on au loloho hobaharuk kahi. Mu re hat henda halug de Babel ninim lahuk, ne etma an den hwal-hapuk karuhuk. Famen hat lauk ale herim halug de ai oho anggin deg fug. O kwenang su fam en de hat de di kwe su kwe lowag ulug koloreg ma re hat henda boruk ale doho lauk karuhun” ulug hweag-nitsi.

⁵Airoho hweag-nitsi mu owan la fug kweleg, Nebuzaradan en uruk kwit, “Hat henda halug de ap Gedalya hun Ahikam amloho hun Safan omba raja Babel on en de at ebe o kota Yehuda fam etma fahet gubernur welamag ulug unduhuk fesi on ai akit sombandoho lakin. Lalug de hat at nim it ap homi we on nim welaruhun oho fano neg, ite hat henda boruk aleroho di kwe su kwe lauk karuhun halug we haren neg” ulug hweag-nitsi. Airoho isireg de aren siburu kwemangge mel nenda fanoroho ulug mel, og-nitsireg de an lowag ulug monde nobahasi.

⁶An de hun Gedalya akit o Mizpa lauihikdeg ap homi o Yehuda kwenang fam embeselug lausa on enesahalimu etma at nim bok welatihik.

⁷ Raja Babel on en de at Gedalya o Yehuda fam gubernur wereg lit, ap homi Yehuda on mun kunggu on etma wereg on omano melal-enepuk kamag ulug unduhuk fesi. Airoho disimen de it ap it tentara apma on mel leho on mel at raja Babel apma sebe uswa fug on etmano en Gedalya unduhuk fesi ale anyo fahet holswa.

⁸Ai fam de hun Netanya amloho Ismael nim, Kareah amloho Yohanan nim, hun Tanhumet amloho Seraya nim, hun Efai omaliki o Netofa on nim, hun Yezanya obam Maakha on nim de ap iron nim seberoho re at Gedalya akit o Mizpa lausa.

⁹Lausa ma Gedalya en it fam uruk kwit, “Hit de raja Babel on enggikmu amuhup ulug henakol duk fug. Ite nit nenanggwenang fam oma wereg lit de raja Babel on amingming angge amek. Hit henahap wendareg welamuhup ulug aire an den neg uruk kahi.

¹⁰Hit de o kota henenda boruk kwit etmano wereg lit de anggur kabogdoho fahat deheg, e anggen mel, zaitun mel kabogdoho fahat deheg, duruk kamek. An de o Mizpa wereg lit de ap Babel on waharuk halug de an den ap homi enunuk fam wene uruk karuhuk,” ulug hweag-esasi.

¹¹Airoho atuk kweleg omano re ap homi Israel on mundoho o Moab, Amon, Edom, kwenang kwe mel, o amu kwe mel wereg on omano en holduk men de, raja Babel on en de aren ap homi Israel on fomane o Yehuda fam welamag ulug hweag-esasi, ne aren de Gedalya gubernur welamag ulug unduhuk fesi urukmu holswa.

¹²Ai fam de it omano o it deg-bog uswa kwe omano embeselug de nikangge o Yehuda fam wahausa. It de hun Gedalya akit o Mizpa wahausareg de anggur mel, anggen amu on mel humdoho kabog-duswa.

¹³Airoho dusaman de hun Yohanan nim ap sehen foroho on enowesi mel it eneselei on enenggikmu atswa fug on etmano Gedalya akit o Mizpa wahausa reg

¹⁴iren uruk kwit, “Hun Baalis raja Amon on anyo en de hat binggi howarukwag ulug hun Ismael mingming disi ale aire hat de holuk deg a?” ulug hweag-utswa. Famen Gedalya en de iren uruk on ai demdoho uruk besi fug.

¹⁵Ai en at Yohanan en linglong Gedalya fam uruk kwit, “An den hun Ismael ai warik lamin fano; ai fahet de sa disi ulug ap amu on enoluk deg lamuhup fug; Aren hat howarukwag ulug etma re nunggwelug embesehe deg welahen? Airoho duhu ai fam de ap homi Yehuda on suma kabog dehesa on mel hat mel nikangge del-fol uhup ale fahet, ne airoho duruk halug de ap homi Yehuda on ando enoluk wereg on oma luluhun aruhu ale fahet deg” ulug hweag-itsi.

¹⁶Famen Gedalya en uruk kwit, “Airoho duk fug! Haren Ismael fahet ehen on aire seiale ehen!” ulug hweag-itsi.