Read Ninia Yali YEREMIA 41 Bible Online

YEREMIA 41 - Ninia Yali bible

YEREMIA 41

¹ Tahun ai bigalem sabiron wereg kweleg at Ismael hun Netanya amloho hun Elisama omba anyo re ap num en nim seberoho re hun Gedalya akit o Mizpa lausa. (Ismael ebe re ap raja enambiangma on ebe ap sehen seneg enap enowe welatsi ahun.) Lausa ma re it enebe seberoho siburu nauk kwit de,

²at Ismael nim ap num en etano en de it enenggarog lilisana le hun Gedalya at gubernur welamag ulug ap Babel on en unduhuk fousa on anyo ware fousa.

³At Ismael en it ap Yehuda on at Gedalya nim wereg on oho mundoho enowareheg, ne ap tentara Babel on famen wahausareg etma wereg on nim mundoho enowatsi neg.

⁴Nukoho ombolim on fam de at Gedalya watswa ale anyo ap enoluk am fug kweleg de,

⁵ap enebe delapan puluh en angge o Sikhem mel, Silo mel, Samaria mel en wahausa. Iren de enombanisong hwereheg, enesum dilip-dalap eseheg, enahap bal deheg, dusareg de waharuk kwit, iren gandum mel kemenyan amben fano angge mel TUHAN Obam wirigmu foul en ulug walug wahausa.

⁶Airoho duswa ma re at Ismael anyo o Mizpa en wilibik lasireg it enolohotma lasi. Lasireg de oba yatuk kwit de, “Gedalya anyo hinil haluhup en manik”

⁷Ulug ai isimu re it anyo folo-folo o kota bulmu etmano aik lausareg de at Ismael nim ori omano mel en it omano binggi enowatuk katswa. Famen it enesahalimu etano en enebe num en angge en uruk kwit, “Haren nit nenowatuk eleg! Nit de nenangge gandum oho zaitun oho, kin ahalue oho re biren heg foroho lahe. Ma re abirangge etma re niren o kota dag fil heraho fehe,” ulug hweag-utswa. Ai fam de at Ismael en it enowatsi fug, famen it amu on neg de enowatsireg enebe wareg omano re ik bohwe habuligmu hwik-esasi.

⁹Ik bohwe aire ele humon hun Raja Asa en de raja Israel on Baesa anyo en dog sinalik waharuk en habulsi on fam hwik-esasi.

¹⁰Ai en at Ismael en de raja ahwelani omano mel, ap o Mizpa wereg on at Nebukadnezar en de Gedalya en hwal-enepuk kamag ulug og-itsi on etmano nim sen-enepsireg de at Ismael en hetdoho hohohuk eneplug de o wilayah Amon fil etma lasi.

¹¹At Yohanan hun Kareah amloho anyo ha, ap sehen foroho on enowesi at nim wereg on etman ha en holduk men de at Ismael olok fam disi ale fahet holswa.

¹²Ai fam de it enautsi mel lausareg de at Ismael mutlug lausareg de at ebe ik sene humon unuk Gibeon wereg ma eta mug ha lausa.

¹³Airoho laukmu re ap at Ismael en het eneplug lauk katsi on omano en inil esauswareg de it enahayeg atsi

¹⁴mu re it anyo sombandoho re heye at Yohanan mel esan lohwaloho waharuk fil anyo lausa.

¹⁵Famen at Ismael nim autsi enebe ligin en nim de lil atswareg de heye o Amon kwenang fam etma lausa.

¹⁶Airoho dusama it Yohanan mel ap sehen foroho on omano mel en de, ap sehen seneg enap mel, homi mel omalik doron mel, ne ap raja wereg ma yabuk duruk enap at Ismael en Gedalya ware folug het eneplug lauk katsi on etmano mel, kabog-debeseswa.

¹⁷It mundoho re at Ismael en Gedalya watsi ale anyo fahet de ap Babel on fam enakol atsi. Aire at Gedalya ebe re raja Babel on en unduhuk fesimu o etma fam gubernur welamag ulug fesi ai fam duswa. Ai fam de it omano heye re o Mesir lausa. Lauk kwit kobokwe bulmu en de it o Kimham o Betlehem horogma etma bok atswa.