Read Ninia Yali YEREMIA 42 Bible Online

YEREMIA 42 - Ninia Yali bible

YEREMIA 42

¹Anyo airoho atsimen de ap homi mundoho, lohon, doron mel, ap sehen foroho on enowesi perwira mel, at Yohanan hun Kareah amloho anyo mel, Azarya hun Hosaya amloho anyo ha,

²an nakit wahsawareg enele uruk kwit, “Nenakni, haren hil hauk katihin hagdoho nit aure endam de nenebe hum deg latuhuk, ne ketia re nenebe dorangge neg welahe. Ma re nenakni haren hakni TUHAN Allah ai fam nit nenobahet somban imihin en heng hapuk kahe. Haren nit ando nenoluk welahe on eya nenobahet

³somban imihin mu re TUHAN Allah en de kwe ke fam lahup, ne niren keroho duhup ulug hweag-nesowagdoho” ulug hweag-nutswa.

⁴Airoho uswama an den onggo uruk kwit, “Aireg halug de fano ehep, hiren heng-nabehep angge ai an den wihi. An den de nit nenakni TUHAN Allah anyo fam somban imin, ne Aren onggo diroho ulug hweag-nutuk halug de an den abirangge hweag-hesamin; dem misig oho eke an den heramin fug” ulug hweag-esauihik.

⁵Airoho irihikmen iren an nobam uruk kwit, “Haren de nit nenakni TUHAN Allah anyo fam somban in, nit nenebe fanoroho welamuhuk en de niren At ele holoho neg duruk kamuhuk. Anggere Aren onggo siag ale uhu halug oho fano ale uhu halug oho re nit ai higitdoho duhuk neg. Niren lahe nenakni hat fene en TUHAN awene melaleg og-hitmisi on etma duhuk a eleg ai aire, we TUHAN At demdoho neg deheg, dipdoho neg deheg, duruk on ai en il nesauk ai” ulug hweag-nutswa.

⁷Airoho uswama nukoho num en welatlug, TUHAN ele an nobam isi.

⁸Ai fam de an den at Yohanan nim autsi perwira nim, ne ap foma amu on at nim wahausa on omano nim wamag ulug wol-enepihik.

⁹Wol-enepihik mu wahausa ma an den it fam uruk kwit, “Hiren an nobam heng napuk kwit An den TUHAN Allah Israel on ai fam heng dukwag ulug hweag-nutuhup. Ne, ketia re TUHAN en diroho eheik,

¹⁰‘Hit lahe kwenang su fam neg welamuhup halug de An den hit leho henobahakuk, sebele henobahakuk de fug; An den hit unduhuk henobahakuk, belabe henobahakuk de fug. An den de hit fam alemat atuk on henobaharihik ale ai fahet nenda hesilduk.

¹¹Hiren raja Babel on ai henakol duruk kwit neg welam fug. An den de at along fam en hit let-henebeheg, fiselaroho henobahakeg, duruk karuhuk en hit henesahalimu wereg laruhuk.

¹²An den hit fam nenda henepuk kahimu re An den de raja Babel on ai en hit henelaheg hesalug, henobam lakiek ulug hweag-hesowag ulug debehuk. An TUHAN en nele mundoho ihi’ isi” ulug hweag-esauihik.

¹³Famen de hit o Yehuda fam welahep on oman de henakni TUHAN Allah fam en henanduhun amu fil hwa-hwal lauk kwit, “Nit de o kwenang su fam wereg ale nenerim. Nit de o Mesir lahukdeg kwenang ai fam etma welamuhuk. Etman de nit weim yabeheg, weim yabukoho wol-enepuk kwit trompet ele fu durukmu holeheg, ne siburu obok anggolo heheg, duruk kamuhuk fug ulug henele uk fug.” Hiren lahe henomamne angge o Mesir lalug etma welamuhuk ulug duruk halug de, TUHAN Mun Along wereg on, Allah Israel on enakni anyo en hit fam hweag-esakiyug eheik on de su:

¹⁶“Weim nim siburu obok nim hiren henakol duruk kahep angge aire hit mug-heneplug o Mesir fam lahu, ne hit de o kwenang ai fam etman waramuhup.

¹⁷Ap mundoho enabi angge Mesir lalug etma welamuhuk ulug duruk on de weim famen ane, siburu obok famen ane ite ouk amben siag on famen ane hit etman waramuhup. Ap misig ulug eke An den anggin on enobam feik waruhuk on ai fam en lil aruhu fug, abirangge waramuhup neg.

¹⁸An TUHAN, Allah Israel on enakni anyo en nolok ahe anyo ap homi Yerusalem on fam hilili ferihik hag, airoho neg hit o Mesir lahup on fam henobahakuk. Ap en de enamelmeldoho hit kumu hesauk kamuhup. Hit de enalitno henepuk kwit hit henunuk de ap hururung enebukoho henunuk yiko uruk kamuhup. Hit de henanggwenang henamep wambisimu suma eke hinil hahup fug isi” ulug hweag-esauihik.

¹⁹Ai en an den nele eke uruk kwit, “TUHAN en hit hweag-hesauk kwit de hit ando o Yerusalem henoluk welahep on oma re o Mesir la fug isi. Ai fam de an den ketia hit wenggelukwag ulug

²⁰henelugwe foruk kahi ai, hit de kwasik humon misig eke duruhup. Hiren an nobam heng napuk kwit, nit nenakni TUHAN Allah anyo fam hit henobahet somban ukwag ulug uruhup, ne hiren sali watuk kwit, TUHAN en ele uhu on etma niren duhuk ulug uruhup.

²¹Mu re ketia an den de nit nenakni TUHAN Allah anyo en isi ale mundoho hweag-hisihi, famen hit de wene ihi on anyo muko duruk ale henerim deg.

²²Ai fam de, fu debeyek: O kwenang hiren yugdoho welamuhuk en lahuk uruk boruk kahepma ai en de hit henebe weim en ane, siburu obok en ane, ite ouk amben siag on en ane, hit waramuhup” ulug hweag-esauihik.