Read Ninia Yali YEREMIA 43 Bible Online

YEREMIA 43 - Ninia Yali bible

YEREMIA 43

¹TUHAN Allah Israel on enakni anyo en wene ap homi fam hweag-esakiyug isi ale an den mundoho hweag-esauihik.

²Airoho irihikmen at Azarya hun Hosaya amloho anyo nim, Yohanan hun Kareah amloho anyo nim, ne ap amu on mundoho winik-wonog uruk on omano nim en an nobam uruk kwit, “Hat de hele seiale uruk kahen. Nit nenakni TUHAN Allah ai en de nit Mesir lalug etma welam fug ulug ili isi fugmen.

³Hat de Hun Beria amloho Barukh ai wene hendama kwelabeheikma nit nenebe re ap Babel on en sebel nenusug laheg, nenowareheg, ite o Babel feleleng neneplug laheg, dukwag boruk kwit nit nim il deg ale uruk kahen” ulug uswa.

⁴At Yohanan oho ne it ap perwira omano en oho re TUHAN en ele isi ale muko o Yerusalem wereg ale enerim duruk katswa.

⁵ At Yohanan nim ap perwira omano nim en de ap homi o Yehuda fam wereg on mel, ne o amu kwe del-fol uswareg en nikangge wahausareg welatswa on mel omano re o Mesir og-eneplug lahuk uswa.

⁶Iren de ap et homi et, doron et, raja ahwelani hun Nebuzaradan en hun Gedalya en hwal-enepuk kamag ulug og-etfag on omano et an nim Barukh nim et mundoho og-neneplug Mesir lausa.

⁷Iren de TUHAN ele sahale folug de o Mesri lausareg de o kota Tahpanhes huli etma aik lausa.

⁸Etman de TUHAN ele an nobam uruk kwit,

⁹“Haren de helep humon neg walug de o kota ai en o pemerintah en wirigmu kwik laukmu etma kwenangma sale fein. Hat airoho durukmu aire ap Yehuda on en inil heowagdoho diyug.

¹⁰Ai en it enobam de, An TUHAN Mun Nalong welahi on, Allah Israel on enakni en de An namingming angge Nebukadnezar raja Babel on anyo o etma mondorik waruhuk. Mu re haren helep salehen on eta emberimmu re aren kemah kerajaan anyo wiri feik waruhureg at ebe hwerieg laruhu mu wuruhu.

¹¹Nebukadnezar ebe waruhureg de Mesir along elegapdoho feik waruhu. Ne, ap homi ouk amben siag on en waramuhup ulug eneko wereg on de ouk amben siag on fam en waramuhup. Ne, it sabu hetdoho og-eneplug lahup on eneg on de sabu het-eneplug lahup, ne it weim ambiangman waramuhup ulug eneg on de weim fam en waramuhup.

¹²An den[25] de it Mesir enap en kembu dewa enobam wirig on etma fene indok fisako kwelabuhuk, ne raja Babel on en de kembu ahut ilitdeg omano yaluhu, ite at hwelalug o at anggwenang fam lahu. Ap domba hwalduk on en asum fene biang lelduk hag, airoho neg raja Babel on en Mesir fin-fun hahureg ap en mel kwe baluk fug aleroho nikangge obam lahu.

¹³Kembu wirig o Heliopolis[26] Mesir fam etma wereg on de luluhun esahup, ne Mesir on en dewa apne wauk kwe etma re indok en mundoho han-yaluhup” ulug hweag-nitsi.