Read Ninia Yali YEREMIA 44 Bible Online

YEREMIA 44 - Ninia Yali bible

YEREMIA 44

¹TUHAN en an nobam ap homi o Mesir fam wereg on aire o kota Migdol mel, Tahpanhes mel, Memfis mel, daerah selatan fil wereg on fahet wene hweag-nitsi.

²At TUHAN Mun Along wereg on, Allah Israel on enakni anyo en it fahet isi on de su, “An den ap homi Yerusalem on mel, Yehuda fam en kota amu kwe on mel fam anggin on enobam feserihik ale hiren oho hinil hauhup. Ketia huli en anggere kota etma mundoho luluhun-lalahandoho deg ma ap homi wereg fug.

³Aire ap homi etma wereg on en siag duruk fam An nolokap kwelapuk katswa ma atsi. Iren de wam waroho feheg, dewa iren oho, ne it enombawi en oho hiren oho obahet duruk ale mel henapeleg on anyo obahet duruk katswa.

⁴An den de hit henobam hundig-handig ap nabi mon-enebik waharukmu iren de henolok ale duruk on An den nerim deg lahi on ai duk fug ulug ili uruk katswa.

⁵Famen hiren enele holeheg, fu debeheg, duruk katuhup fug. Hiren de siag duruk ale fahet bale fouk fug angge deheg, wam waroho dewa fam og-ereheg neg duruk katuhup.

⁶Ai fam de An nolok ahe anyo o kota Yehuda on mel, o Yerusalem on koboke kwe mel, fam hilili ferihik ai. Abirangge etma re An den han yaldihik mu re mundoho indok hanonggo neg kabog laharukmu hiren ketia hinil hauk kahep au.

⁷Ne, ketia re An TUHAN Mun Nalong welahi on hit hein og-hesa, hiren de nunggwelug hit henobam mundoho alemat hum ale atuk on ai duruk kahep. Hiren de ap hit henunggul unuk au abirangge ap et, homi et, doron et, omalik fou et mundoho elehap henobahail laukem hit henunggul unuk on au eke welamuhup fug ulug duruk kahep a?

⁸Nunggwelug hiren de An nolok napuk ale etma neg duruk kahep? Hit de waharuhup de o Mesir henapelegma omano wereg lit, hiren kembu wireheg, o kwenang ai fam kembu dewa wereg on fam di angge su angge folug og-ereheg, duruk kahep ai! Hiren de henonggwareg en luluhun-dauk fam hit ap homi di unggul unuk su unggul unuk kwenangma suma wereg on en enalitno henepuk kwit, hit henunuk de ap hururung enebukoho uruk kamag ulug duruk kahep a?

⁹O Yehuda kwenang fam en nim o Yerusalem koboke kwe en nim it henombawi en mel, raja Yehuda on enohwesi nim en mel, hit henohwesi nim en mel, henolok ale duruk katuhup omano re henapeleg atsi a?

¹⁰Airoho duruk katuhup famen, yoho su huli en anggere hit henenda sebele fahat-dauk kahep fug. Hiren de An nalong bolug leho nobahakeg, ne Nawene melaleg hit fam nim it henombawi fam nim og-hesauihik on anyo higitdoho duruk kahep fug.

¹¹Ai fam de An TUHAN Mun Nalong welahi on, Allah Israel on enakni en de hit il henebuhukdeg de Yehuda on abirangge luluhun debesehuk.

¹²Ne, ap homi Yehuda on ando enoluk wereg on en o Mesir etma yugdoho welamul boruk on de o etman enebe mundoho eleg amuhup. It enebe mundoho, doron et lohon et de siburu obok en mel, weim en mel, waramuhup. Ap homi en de it fam deg ale inil esalug de enalitno enepuk kamuhup. Ap homi hururung enepuk kwit de it enunuk yiko uruk kamuhup.

¹³An den o Yerusalem unggum og-itihik hag, o Mesir welamuhup on oho unggum og-esahuk. It de weim en mel, siburu obok en mel ouk amben siag on en mel waramuhup.

¹⁴Ap homi Yehuda on en ando enoluk wereg on o Mesir welamul ulug lausa on de ap misig ulug oho eke lil aheg, oluk welaheg, duhup fug. Iron en ap misig oho eke sombandoho Yehuda fam lela bohup famen de eke waruhu fug. Demdoho eke wamuhup fug, ite ap o oko lausa on de wamuhup” isi.

¹⁵Airoho isimu re ap homi humdoho an nakit wahausa, it etma re ap enohwesi en kembu dewa obahet di angge su angge og-utuk ulug enoluk deg on mel, it homi eta unduhuk latswa on abirangge mel, ap homi Israel on o Patros Mesir en selatan fil etma welatswa on mel, wahausa. Wahausareg iren uruk kwit,

¹⁶“Nit de haren TUHAN unuk yiko nit hweag-nesauk kahen ale etma nenesanggo holdul fug.

¹⁷Niren nenele sali watuhuk on de duruk kamuhuk neg. Niren de nenesinga Ratu Sorga ai obahet wam waroho feheg, ne o kota Yehuda fam omane en mel, o Yerusalem kwe fene omano en mel, nit nenombawi en oho, raja en oho, ap yabuk pemerintah fam lehoma duruk on en oho, nit nenonggwareg en oho, neneitogdoho nenesinga ai fam anggur ahaik hililoho obahet foruk katuhuk hag duruk kamuhuk. Airoho duruk katuhuk li em eta re nit nenasiburu wereg neg deg ma, nit de sigdoho deg lit anggolo ale ha fug angge welatuhuk.

¹⁸Famen niren ratu surga ai fam obahet foruk ale bale foruhuk li em, ne anggur at og-utuk on ulug obahet foruk ale embeseruhuk li em de, nit di angge su angge mundoho elegdoho neg welahe; ap niron de weim fam en nim siburu obok en nim waratswa” ulug uswa.

¹⁹Ai en it homi etmano en uruk kwit, “Nit nenahunsi en de niren roti hwe ratu surga ai ahut ilitdoho werareheg, obahet waroho yalaheg, dewa ai fahet anggur feseheg, duruk kamek ulug hweag-nesausa” ulug uswa.

²⁰Ap mel homi mel en wene airoho onggo uswa on etma fam an den uruk kwit,

²¹“O kota Yehuda fene mel, o Yerusalem kwe fene mel, it henombawi en oho, raja en oho, hit henowesi yabuk lehoma duruk on en oho, ap homi o suma on en oho, hiren oho, di angge su angge kembu obahet folug og-utuk katuhup ale omano re TUHAN en de apeleg deg ne Aren apeleg atsi ulug uruk kahep a?

²²Hiren kembu ilah fam di angge su angge folug og-utuk mu etma re TUHAN en kumu henusulug lit welam fug ale duruk. Hiren duruk kahep ale etma re mun henolok ale nalitnoroho duruk kahep. Hiren de TUHAN fam siag duruhupdeg Aren diroho airoho diyug ulug isi on fam higitdoho duruk kahep fug. Ai fam de ketia au hit henanggwenang mundoho luluhun deheikma re ap homi eke welam fug alereg, ne unuk de ap en hururung enebukoho unuk yiko uruk kamuhup. Ne, ap inil hauk on en de enamelmel hauk” ulug hweag-esauihik.

²⁴Airoho irihikdeg de an den ap homi etmano wereg on fam hweag-esauk kwit, yugdoho re it homi omano fam de TUHAN Mun Along wereg on anyo en de ap homi Yehuda on o Mesir wereg on fam de diroho eheik, “Hit nim hit henohwesi nim en de hwe Ratu Sorga anyo fam wam waroho yaleheg, anggur obahet folug og-ereheg, duruk kamuhup ulug hombuk balduhup. Ne, hiren sali uruhup ale anyo dipdoho neg duruk kahep. Anggere aire fano! Hiren duhuk ulug sali uruhup on etma duruk kwit neg welamek!

²⁶Ai famen de ketia An den hit ap homi Israel on o Mesir welahep on henobam uruk kahi on su holiek: An TUHAN nunuk bogdeg on anyo nonggwareg nunuk yiko hombuk balduk kahi anggere, hiren An nunuk yiko eke sali amu ale fahet watuk kamuhup fug. Hiren sali watuk kwit, ‘An den Allah oluk mundoho wereg on unuk!’ uruk kahi ulug uhup fug.

²⁷An den de hit henebe alemat aheg, henobam siagdoho welaheg, degman neg de weim en oho, ouk amben siag on en oho waramuhup ulug henobahakuk.

²⁸We ap enebe wenako nunggwe en hagdoho neg de lil amuhupdeg sombandoho o Mesir en Yehuda fam lahup. Ai fam de ap Yehuda on o Mesir wereg on en de iren enele uswa on higit aruhu a ite An den irihik on higit aruhu a ulug inil hahup.

²⁹An den unggum hit henobam henobahakuk ulug wenggeloho ferihik on ai demdoho amag ulug de An den hit henobam alemat atuk on o suma mondorik waruhuk.

³⁰ Hun Hofra raja Mesir on aire An den Zedekia raja Yehuda anyo Nebukadnezar raja Babel on en at aselei on ai en warukwag ulug enggikmu ferihik hag, at ai oho at aselei on en ebe watul ulug duruk on fam og-esahuk,” isi ulug hweag-esauihik.