Read Ninia Yali YEREMIA 46 Bible Online

YEREMIA 46 - Ninia Yali bible

YEREMIA 46

¹TUHAN en an nobam ap enunggul unuk fahet hweag-nutuk kwit,

² Aren Mesir fahet dag isi. Aren de hun Yoyakim, raja Yehuda on anyo melal-enepuk men neg tahun ohwaneg on wereg kweleg, raja Babel on Nebukadnezar anyo en tentara Nekho raja Mesir on en anyo o Karkemis Ik Efrat horogma etan along elehap debesi ale fahet hweag-nitsi. Wene ai fahet TUHAN en an nobam isi on de ebe su,

³“Ap Mesir on en tentara re esan anyo fik-fouk deg lit enap duruk kwit de, ‘Inggisim kabuk diek! Henasum bosie on ne henunggul asum baja helep on wan-diek! Dog bei angge fouk dulug de ap esan lohwaleg sahalimu kwiek! Hit kuda fam lauk kahep on de doaloho huratuk angge ililiek! Henangge kuda anduhunmu lahalug, weim yabik lakiek!’ uruk.

⁵Famen An TUHAN en esauk kahimu re it enakol en suhuloho lauk. Tentara iron de enalong elehap debeseruk en de enambol han fu ha fug angge heye lauk.

⁶Ap hebeleg on de buroho la fug alereg, ne ap enambong si-sereg on oho re it eneselei on fam en lil am fug alereg. It de dungdoho de utara fil en Ik Efrat aegma etma wat-dauk.

⁷Ik Nil leheruk hagdoho ite ik fu leheruk kwit elan kwe et delelangdoho wirig atuk hag on aire sa behep? Aire o Mesir on etma. Iren uruk kwit de, ‘An inatlug kwenangma mundoho sebelikoho lahi. An den de kota mel, ap homi wereg on mel mundoho elehap debesemin uruk.

⁹Hit kuda suma buroho lakiek! Kereta suma lauk kamek! Ap o Sudan on mel Libia on mel en ap sehen anggen on dog bei angge walug lauk kahep on mel de dog yabik kwiek. Eke hit o Lidia kwenang fam en ap sehen anggen on etma oho lakiek’ uruk” isi.

¹⁰Famen an Yeremia en uruk kwit de su re nukoho TUHAN Allah Mun Leho wereg lit Mun Along wereg on anyo en on; nukoho ai salim de Aren aselei on mundoho nim ambiangma enobam debesehu. At enggarog en de it enebe homoroho nahu, ne it enamep de mun miroho nahumu homorebehu. Nukoho su salim de TUHAN Mun Along wereg on anyo en de Aren waroho foruk angge omano utara fil Ik Efrat aegma etmano waroho feheik.

¹¹Yaho hit ap homi Mesir welahep on suma, hit de o Gilead[27] obat hera dik lakiek! Hiren airoho hera dik laluhup famen de hit hiling henebuk mu fano ahep ha on obat eke wereg fug.

¹²Hit deg lahep ale mun nenggali siag ale etma re ap unggul unuk amu on en mundoho enoluk atsi. Hiren henele hwiruruk kahep on de o kwenangma wereg on en mundoho holduk. Ap tentara eke en de eke fam dung duruk kwit it enebe seberoho kwenangma waroho ying-atuk.

¹³ Raja Babel on Nebukadnezar anyo en o Mesir bin kwik waharuk li em de TUHAN en an nobam uruk kwit de diroho isi,

¹⁴“Haren de wene imin on su o kota Mesir en de o Memfis mel, Migdol mel, Tahpanhes mel, fam wene unduhuk foruk kwit de, ‘Hiren fahat dalug lahep angge etma re mundoho weim fam en luluhun esakohoreg anggere hiren henalong bal-daluhup en fik-fouk diek!

¹⁵Nunggwelug hit henanggembu Dewa Apis omamne on aire heye lasi? Aire TUHAN en at along elehapdoho fesimu!’ ulug hweag-esakin.

¹⁶Hiren on ap tentara re humdoho dungdoho waroho ying-amuhup. Iren eke en eke fam uruk kwit de, ‘Nit de ap selei on enenggarog famen lil amul en de nit nenobam nenunggul unuk on en omano fam lakohon’ uruk kamuhup.

¹⁷Hun raja Mesir on ai fam unuk keron soalin: At unuk de, ‘Ele amusun li nalni’ ulug soalin.

¹⁸An de Allah mun noluk welahi on, nebe re raja, TUHAN Mun Nalong welahi on. Dom Tabor de dom amu on sahalimu koloma wolong deg hag, Dom Karmel ik laut yenggelegman koloma leho hag, de An nomamne fam hat howarik waharuk on de aireg.

¹⁹Hit ap homi Mesir on de ap en het heneplug lahup anggere fik-fouk duruk kamek. Memfis de o mululuk deg en neg kabog lahakureg obale derengdoho ap elegma on deg laruhu.

²⁰Mesir de sapi sei on hagdoho deg famen de muli sobon utara fil en ele ying dik waharuk.

²¹Aren ap tentara ibil amag ulug onggo bal-enepsi famen oho re sapi sei on hag deg ma re iren diroho suroho ulug duk fug alereg. Iren de hambuk halug kahaluk fug alereg lit de lil amul ulug suhuloho heye lauk. Nukoho it fam unggum welaruhu on de mundoho aik waha; it enobam anggin on aik waharuk on de li higit aha.

²²Mesir de aselei on mun horog aik waharuk en de heye lauk kwit kisu en hagdoho ele siririn dil lauk. Iren de at heroho bug uruk kwit at ebe re yaha en e mutuk hagdoho mutuk,

²³ne ohwei ahako on ap en foroho kuk fug alereg ma famen unggul ahap neg deberuk hag duruk. Tentara at aselei on de mun hum-ham aleroho bulue elang dotdeg kweleg along deg ma re wenahauk fug alereg. Ulug An TUHAN en nele mundoho ihi.

²⁴Ap homi Mesir on de it enunggul unuk utara fil on en enalong elehapdoho fesehupmu re enenggaliap debesehup. Ulug An TUHAN en nele mundoho ihi eheik ulug unduhuk feiyug” isi.

²⁵TUHAN Mun Along wereg on, Allah Israel on enakni en uruk kwit, “An den de at Amon dewa o Tebe on ai mel, Mesir on abirangge enanggembu dewa mel, raja mel, unggum og-esahuk. Raja Mesir on nim ap homi mundoho en kembu ai fam enenda hembisig wereg on de

²⁶An den raja Babel on Nebukadnezar nim, autsi tentara nim en it Mesir on enowatul ulug duruk on etma fam og-esahuk. Airoho duhukdeg en fobik en de Mesir nikangge atam welatsi hagdoho welaruhu. Ulug An TUHAN en nele mundoho ihi” isi.

²⁷ TUHAN ele uruk kwit, “Yaho, An nomaliki Israel on, henakol duk fug! An namingming angge Yakub de howag elek duk fug! Hat nim hat hambiangman ondoho on nim de o kwenang yatma hit sabu hetdoho henobahaik lausa man An den wendat-henebuhuk. Hit de henobam wamuhup deg, hit henanggwenang fam etma henambong seroho welamuhup. Hit de henenda seroho wereg lit de; hiren henakol duruk ale duruk kamuhup fug.

²⁸Anggere hit An nomaliki re henakol duk fug, An waruhukdeg hit wendat-henebik waruhuk. Ap enunggul unuk An den hit del-fol hesahuk kwe etma on de, abirangge An den elehap debesehuk, hit neg de airoho henobahakuk fug. Hit de unggum waruhu on fam en ohwal dahup fug, famen de hit henobam unggum aik waruhu on aire katukdoho deg on hiren we eta huli neg hwela alereg ulug on aik waruhu. Ulug An TUHAN en nele mundoho ihi” isi.