Read Ninia Yali YEREMIA 47 Bible Online

YEREMIA 47 - Ninia Yali bible

YEREMIA 47

¹ Raja Mesir on en o Gaza bin kuk eleg kweleg TUHAN en an nobam it Filistin on fahet wene isi.

²TUHAN ele uruk kwit, “Furiek, ik de utara fil en ik fu lehelug waharuk kwit hag de o kota mel ap homi wereg on mel kwenang abirangge mel enowarik waharuhu. Ap homi en let-nenebukwag ulug hum-ngai deheg, ne ap homi mundoho oba yareheg, duhup.

³Iren de no kuda eyog dap uruk on mel, kereta kilit-samog uruk on mel, eyog aplohok deke-deke lauk on mel holuhup. Ap homi lohon de enobam lilipna uhupdeg de enomalik doron wenggeluk fug aleroho amuhup.

⁴Ap homi Filistin on abirangge elehap debesehup li mundoho horog aik waha, ma re Tirus nim Sidon nim eke let-enebuhup fug. An TUHAN en de ap Filistin on ando enoluk welamuhup on mel, ne kereta ando mel elehap duhuk.

⁵Ap homi Gaza on de enenda humon hesilduk ale enobam aik waruhu; ap homi Askelon de enape moroho welamuhup. Ne, ap Filistin on en ando eneluk wereg on etman de ke huli fong watuk kwit neg welamuhup no?

⁶Hiren hwiruruk kwit, ‘TUHAN enggarog su, haren nit nenowarikoho duruk men neg de ke huli welaruhun? Hat de hawiligap fam sombandoho kulug etma bik-bok atlug welamin!’ uruk kamuhup.

⁷Famen, An den ap homi Askelon ik elan kwe wereg on etma enowarik lakin ihi ha man de, at ape bik-bok am alereg a?” Ulug isi.