Read Ninia Yali YEREMIA 48 Bible Online

YEREMIA 48 - Ninia Yali bible

YEREMIA 48

¹ At TUHAN Mun Along wereg on, Allah Israel on enakni anyo en Moab fahet isi on de su, “Ap homi Nebo wereg on de mundoho sunureheik ma re alemat atuk kamag! Kiryataim de ap en del-dehesa reg obahat it enalong balegma omam ne on omano re mun luluhun esehesama e ap homi etma wereg on de enenggali aha;

²Moab en awonog atuk on anyo re mundoho eleg aha. Ap selei on en de o Hesybon sebelik kwehesareg de etman ap homi enunggul unuk Moab on mundoho eleho fesehuk ulug wene matuk. Kota Madmen aire ap tentara en bin kuhupmu re ap enele o etman uruk on de mundoho bal aruhu.

³Holiek! Ap homi o Horonaim on en hum-ngairuruk kwit de, ‘Ap eleg aikohoreg a, o mun luluhun dikohoreg a’ ulug uruk ai.

⁴Moab de mundoho eleg aha! Omaliki doron enele ngaruruk on de o Zoar huli etman holduk.

⁵O Luhit lahaik lauk kwe en oba yatuk on mel, o Horonaim wambik lauk kwe en yi-ye uruk on etma holiek.

⁶Iren uruk kwit, ‘Folo-folo henebe del dakiek! Hit de no keledai iliangge leimu en lauk hagdoho lakiek!’ uruk.

⁷Hat Moab de enggat deg lahen on mel, henggik wereg deg lahen on mel fam henda hembisig lahen. Famen ketia hat hebe halong elehap hobahakup. Hanggembu kamos ai mel, hwal enap etma mel, at obahet yabuk duruk enap mel de feleleng eneplug hwik enebik lahup.

⁸O kota abirangge re mundoho luluhun aruhu, eke lil aruhu fug. Donggo kwe inim fanggong kwe nim de mundoho eleg aruhu. Ulug An TUHAN en nele mundoho ihi.

⁹O kwenang su re il misig fam neg mundoho eleg aikohoreg angge re Moab fahet helep nisan wiri feyek. At obam kota re mundoho eleg aruhu mu re ap misig ulug oho eke etma welamuhup fug” ulug isi.

¹⁰Ap TUHAN en yabuk dukwag ulug og-esauk men demdoho duruk eleg on etma re hururung deg lamag. Ne, ap enggarong fang deg liren ap watuk fug on de hururung deg lamag.

¹¹TUHAN ele uruk kwit, “O endam et anggere Moab de akol eleg angge neg wereg. At de sabu hetdoho hwik-enebik laukmu etma eke walug lauk fug. At de anggur ahaik ele sop deg lit wereg ma ikwag obale amu on fam eke keraloho kwelapuk fug on hag deg. Anggur aren on de amben fanoroho unduk buhundeg.

¹²Famen de li waruhu on fam de An den Moab de anggur hagdoho hilil esalug obale re kolorebeheg, erap debeheg, dukwag ulug mingming enebuhuk.

¹³Moab en dewa aire ap homi Israel on en Betel fam enenda hembisig latswa on anyo fahet enenda siag atsi hag, Moab de Dewa Kamos ai fahet enda siag aruhu.

¹⁴Keroho ap Moab on en uruk kwit, ‘Nit de weim yapuk nenap, tentara sehen anggen on weim fam en wil-wal hauhukdeg welahe, ulug de keroho uk alereg?’

¹⁵Moab nim obam bumbuk kota nim de mundoho luluhun esausa, ne aren on ap sauwe ebe on de mundoho enowatswa. Ulug An nele mundoho ihi. An de nebe raja TUHAN Mun Nalong welahi on.

¹⁶Anggin-fanggin Moab fahet on aire mundoho sok bakopma aik waha ma re il misig fam at mundoho luluhun aik kohoreg.

¹⁷Yaho hit henunggul unuk Moab inim horog kwe welahep on en at unuk bogdeg wereg ale henoluk deg on en de at fahet fong watuk kamek! Hiren uruk kwit, ‘Moab de along wereg alereg fug, omamne wereg ale nim lik-louk deg ale nim de mundoho eleg aha!’ uruk kamek.

¹⁸Yaho hit ap homi Dihon on, henebe kainma hwerieg lahepma etman wambik manik; hit de kwenangma ul fam hwerieg lamek. At hit henanggwenang Moab siahap duhu on de mundoho aik waha; ne aren de hit henobam obahat henalong balegma ai luluhun esahu.

¹⁹Hit ap homi o Aroer welahep on de kwe elanma unduhuk lit fu deberuk kamek! It ap lil atlug heye lauk on etma fam hein og-esauk kwit, ‘Keroho aha ma?’ ulug hein og-enebiek.

²⁰Airoho urukmu iren uruk kwit de, ‘Moab de mundoho ap enggikmu aha ma sebeleg on aha anggere at obahet oba yag-enebiek. Hiren de Ik Arnon som etma wene unduhuk foruk kwit Moab mundoho luluhun deheik, ulug iek’ uruk kamuhup” isi.

²¹TUHAN ele uruk kwit, “Unggum de o kota donggo leho kwe wereg on, o Holon, Yahas, Mefaat mel,

²²o Dibon, Nebo, Bet-Diblataim mel,

²³o Kiryataim, Bet-Gamul, Bet-Meon mel,

²⁴o Keriot mel Bozra mel fene mundoho wambeheik. O Moab en kota yatma on et horogma on et de mundoho unggum obam feheik.

²⁵Moab omamne wereg on de mundoho kong-debeheik, ne along wereg on de luluhun debeheik. Ulug An TUHAN en nele mundoho ihi” isi.

²⁶TUHAN ele uruk kwit, “Moab en de An nil hanim leho fahat-dauk en de at siomo dukwag ulug debeyek. At ebe re onggwareg en me wirig fam imbil-imbil angge laukmu ap en unda yatuk kamuhup.

²⁷O endam de Moab en Israel fahet de ap heraharuk on nim ap enangge waukmu sen-enepuk on hagdoho unda yag-enebeheg, hunggul kwal deheg, enepuk katihin fug no a?

²⁸Yaho hit ap homi Moab on de o kota embeselug de suwe muluk en a helep il bulereg kwe wutuk hag helep unggul kwe etma welamek.

²⁹Hit de mun winik-wonog uruk kahep! Hiren henawonog aheg, henenda leho fahat deheg, henele kwerereng eheg, leho fahat deheg, duruk kahep ale etma An mundoho noluk deg!

³⁰An TUHAN en de hit henawonog atuk kahep ale An noluk. Henele we hesangge matuk kahep, ne hiren duruk kahep on de ambiangma eke atuk fug.

³¹Ai fam de An den nele logdoho hit fahet nim, ap homi o Kir-Heres hit henobam indipmu on ai fahet nim oba yag-henepuk katmin.

³²An den de ap homi Yaezer on wereg famen de it ap homi Sibma on fahet neg de alongdoho oba yag-enepuk katmin. Kota Sibna aire e anggur yahoma enggik omalo re doaloho ik Laut Mati weregman o Yaezer huli etma fam deg on hag deg. Famen ketia re anggen hobi li yihiruk on mel, ne anggur anggen mel de mundoho eleho fesehesa.

³³O Moab mun hesilig obam anyo en enahayeg en enanggiluk duruk on omano re mundoho dereng eheik. An den de anggur ahaik berelduk angge famen bereldukmu waharuk kam no ulug firitog deberihik; ap en anggur wireheg, enahayeg deheg, duruk on eke wereg fug.

³⁴Ap homi Hesybon on mel, Eleale on mel en oba yatuk on de o Yahas huli etman hol-hauk, ne ap homi Zoar on mel, o Horonaim on mel Eglat-Selisia on mel wereg huli etman hol-hauk. It enahaik ahanggen on Nimrim anyo mundoho firog dehen oba yatuk.

³⁵An de ap homi Moab on en de iren di angge su angge folug yalduk kwe etma eleho feheg, ne iren kembu dewa fahet wam waroho og-utuk on etma eleho feheg, duhuk. Ulug An TUHAN en nele mundoho ihi.

³⁶Ap homi Kir-Heres enangge mundoho mel, o Moab kwe mundoho mel de abirangge eleg aha. An de ap en fili ele fololeg fam suni uruk kwit fip duruk hag deg lahi.

³⁷It enebe mundoho re enoruk hwereheg, enambanisong baleheg, enenggik baleheg, enenda wat-dauk kwit sum karung on wan-deheg, duruk.

³⁸O dum doaleg kwe en mel, kwenang oho kwe en mel de we oba yatuk mu neg hol-esauk. Aire An den Moab de ikwag kwenang on enerim en erab duruk hag deberihik mu.

³⁹Moab de mundoho asenggep luluhun eheik! Moab mun enggali aha! At de ap enunggul unuk at aluluk kwe wereg on etmano en enalitno deheg, unda yareheg, duruk ai en oba yatuk. Ulug An TUHAN en nele mundoho ihi” isi.

⁴⁰TUHAN ele uruk kwit, “Sue ikwesahop en ahwerabul langdoho sebelik waharuk hag, unggul unuk misig eke en Moab sebelik waharuk.

⁴¹At obam kota mel, along balegma obahat wirig on mel, de aben huhul hwelahup, ne autsi tentara re homi enomalik enderukoho duruk hag enakol en duruk kamuhup.

⁴²Moab de An nil hanim winik-wonog uruk en de mundoho luluhun aruhu mu it enunggul unuk misig on soaloho welaruhu fug.

⁴³It de Kwenang bohwe fam en nim, sabna leho fam en nim ne sehen enggela aplohok en nim sal-kwal uruk.

⁴⁴Ap sehen enggela aplohok en heye lahup on de kwenang habuligmu wambuhup, ne kwenang habuligmu ai en wilibuhup on de sapna fam ilag uhup. Abirangge etma re An den Moab luluhun debehuk ulug deberihik salim ai en aruhu.

⁴⁵Ap o oko lahupdeg welamuhup on en it enonggwareg en da fug alereg on de o Hesybon nenalong bal amag ulug lahup, famen de kota aire harep naukmu, ap Raja Sihon ebe wereg ma anyo ohore indok en nauk karuhu. Indok en de o kwenang huli-hulimu wereg on mel Moab en dom fene wereg on mel, ne o kwenang ap weim yapuk kwit neg wereg on en mel fam nauk karuhu.

⁴⁶Moab hat de mundoho alemat ahen! Ap homi Dewa Kamos apne wauk on de mundoho eleg ahesa, ne it enomaliki re sabu hetdoho og-eneplug lahesa.

⁴⁷Famen fobik en de An den o Moab kwenangma etma hwaloho fohuk. Ulug An TUHAN en nele mundoho ihi!” isi. At TUHAN en Moab fam debehu alere airoho etma.