Read Ninia Yali YEREMIA 49 Bible Online

YEREMIA 49 - Ninia Yali bible

YEREMIA 49

¹ Amon fahet TUHAN en isi alere su, “Nunggwelug kwenang unggul unuk Gad on en etma re ap kembu Dewa Milkom apne wauk on en del dausareg wereg? Ap homi Israel on en o etma fahet ili uk on de eke wereg fug en a?

²Ai famen de li aik waruhu salim fam An den ap homi o Moab on enobam kota Raba ai en weim enap durukmu holukwag ulug debehuk. Kota aire o meiyaleg neg kabog laharukmu re desa-desa aluluk kwe wereg on de mundoho han nahu. Airoho duhumu re it Israel en kwenang ai atam ap en deloho hwelausa on enenggikmen nikangge del-dahup.

³Yaho hit ap homi Hesybon on suma, o kota Ai anyo re mundoho luluhun deheikma re oba yatuk kamek! Yaho hit homi o Raba homi oba yi-ye uruk kamek! Henasum karung belahwi belaboho ulug wan-dakiek. Henenda nong-hong uruk en lag-wag uruk kamek. Hit henanggembu Dewa Milkom anyo nim ap hwal enap nim ne pemerintah eneyabuk lehoma duruk on nim de sabo hetdoho hwik-enebik laukmu etmano hwik-enebik lahesa!

⁴Yaho hit ap homi dipdoho duruk kahep fug on! Nunggwelug hiren henefanggong hesilig on etma fahet henawonog atuk kahep? Indip ke fam hit henenggik wereg ai fam henenda hembisig lahep? Hiren uruk kwit ap misig en oho eke nit nenowaruk wam fug alereg uruk kahep etma re keroho?

⁵Hit de An den enabut mun hape fam di kwe su kwe en henobam feik waruhuk. Hit de henemu domog en lil amul ulug buba urukmu re ap homi en eke hit andogdoho henobahakup fug.

⁶Famen fobik en ap homi Amon on enebe An den hwale fesehuk. Ulug An TUHAN en nele mundoho ihi” isi.

⁷ TUHAN Mun Along wereg on anyo en Edom fahet isi on de su, “Ap homi Edom on en de enenda fik-furoho wenggeluk fug alereg a? Ne, ap komo ale uruk on en de it fam wene komo hweag-esauk fug a? It enenda wenggeleg wereg on anyo re mundoho eleg atsi a?

⁸Yaho hit ap homi Dedan welahep on de sombadoho heye lakiek! Lalug de heraho lamek. An den de at Esau ambiangma on unggum og-esahuk ale li horog aik waha ma re mundoho luluhun debesehuk.

⁹Ap en anggur anggen dahanduk kwit de onggombi mu embeseruk neg, ne ap heraharuk on en o hup anggo herahaik watlug halug de at enda boruk angge on neg hwelauk.

¹⁰Famen An den[28] de at Esau ambiangma on de mun feleleng hahukdeg iren heraho ale etma mundoho ename fohuk; iren de enonggwareg en heraho fahat da fug ale aruhu. Ap Edom on mel at ori-erekwi mel, at horog kwe wereg on mel mundoho elehap debeserihik mu re ap misig eke lil atsi fug.

¹¹Hat Edom su! Hat homaliki wetien on etma re An nobam femihin mu re An den hwal-enepuk karuhuk. It homi sohwe hat hunggul unuk on en etman de An nobam enenda belap amag.

¹²Ap unggum og-esa fug on famen oho re unggum hwelausa neg, hit de hwelahuk fug ulug a? Hit de demdoho unggum hwelahup!

¹³An den An nonggwareg nunuk fam hombuk balduk kahi anggere o kota Borza aire ap embeserukmu mun namelmel on deg laruhu. Ap en de unda yatuk kwit at unuk yiko hururung enepuk kamuhup. Ne, o sili doron horog kwe etma wereg on de mundoho moluluk deg on neg aruhu. Ulug An TUHAN en nele mundoho ihi” isi.

¹⁴An Yeremia, en uruk kwit, “Yaho ap homi Edom on suma, an de TUHAN en wene eheik on eke wihi. Aren de ap yonggo angge di ap su ap enunggul unuk fam mon-enepuk kwit ap tentara esan lohwale feselug hit henowarik kwik wamagdoho ulug uruk kaha.

¹⁵TUHAN en de hat hebe homamne elegdoho enalitno hapuk ondoho hobahaku.

¹⁶Hat honggwareg en mot-dobahat-dauk kahen ai fam lal-hapuk. Haren boruk kahen eta hagdoho hat enakol hapuk on de wereg fug. Hat de helep elekwe dom unggulmu welahen, famen, haren hobam obale mun yit-yatma etlema suwe ikwesahop a wutuk hagdoho wirik lahakun famen TUHAN en etman hat belabe hobahaik waruhu. Ulug mundoho etma TUHAN en neg eheikma holihi” ulug hweag-esauihik.

¹⁷TUHAN ele uruk kwit, “Anggin-fanggin Edom fam aik waruhu on aire mun nik aleroho aruhu mu re ap homi kwe etma lauk on en inil hahupdeg de youk lalug enakol duruk kamuhup.

¹⁸ O Sodom, Gomora nim o sili doron maseroho wereg on mel mundoho harep nebag hag Edom oho airoho duhu. Ap misig oho eke etma welaruhu fug. Ulug An TUHAN en nele mundoho ihi.

¹⁹No singa ket sauwe on ohwei faregman Ik Yordan luluk omano en watlug domba enggelangge o leimu naukmu waharuk hag, An den ap homi Edom on fam kwik waruhuk deg ap Edom on it enanggwenang on fam en fetag-fetagdoho heye lowag ulug debesehuk. Airoho debesehukdeg de An den ap misig eke it melal-enepuk kamag ulug unduhuk fohukmu aren unggul unuk ai on melal-enepuk karuhu. Ap sa en An nim higit ha alereg? Ap sa en ambong se angge An nim wene baluk alereg? Ap melal-enepuk on eke en an nim wal-wal am alereg a? Eleg.

²⁰Aireg ma re An den ap homi Edom on fahet mel, ne ap homi o kota Teman on fahet mel fam debesehuk ale ulug wenggeloho ferihik ale etma holiek. It enomaliki oho re lit-eneplug lahupmu re ap homi mundoho enakol amuhup.

²¹Edom ap amu on enenggikmu aruhu mu re ap homi enele hum-ham ale saha-faha uruk kwit o kwenangma abirangge et elek duhu; ap homi o etma wereg on en ngai-wai angge duruk on de ik Laut Gelagah wereg huli etman holuhup.

²²Suwe ikwesahop en ahwerabul langdoho sebelik waharuk hag selei on airoho atlug o Borza sebelik wamuhup. Nukoho ai salim de tentara Edom on de homi enomalik enderukoho duruk hag enakol neg amuhup” isi.

²³ TUHAN en Damsyik fahet isi on de su, “Ap homi kota Hamat mel Arpad mel de wene siag on holehesareg enenda fituk kwit enowag elek duruk. It enenda sug-sag uruk kwit ik laut ahum funag-lenggag angge duruk hag nong-hong uruk.

²⁴Ap homi Damsyik on de enowag kororong eheikma enakol en heye lauk. It de homi enomalik enderukoho duruk hag it ouk en nenek duruk.

²⁵Kota unuk bogdeg ma anggiluk wereg obam anyo re ketia derengdoho ap elegma aha.

²⁶Nukoho ai salim de aren ap sauwe re enobam kota koboke kwe waramuhup, ne aren on tentara re mundoho luluhun esahup.

²⁷O Damsyik en fak lehet oho on etma An den han yaluhuk, ne Raja Benhadad obam istana re mun obaleroho han yaluhuk. Ulug An TUHAN Mun Nalong welaho on en nele mundoho ihi” isi.

²⁸TUHAN en unggul unuk Kedar mel o sili Hazor apma wereg on mel hun Nebukadnezar raja Babel on anyo en delsi on etmano fahet isi alere su, “Hat Nebukadnezar su, haren de o Kedar bin kwik lalug de ap homi timur fil wereg on etma mundoho elehap enebin!

²⁹It enangge domba, unta mel it enobam kemah ebe mel ilinggoma wereg angge mel huhul hwelalug de it fam hele hwiruruk kwit, ‘Ap sehen fangdoho henobam aik waha!’ ulug iyug.

³⁰Hit ap homi Hazor suma! An TUHAN en uruk kwit: Hit de fol-folo o oko lalug herag aik lakiek. Nebukadnezar raja Babel on anyo en de hit henekit bin kwik waikoho wene wareheik deg wereg. Aren uruk kwit,

³¹‘Lakohon manik! Niren de ap nit nenambong seroho fano welahe boruk on ai bin enowarik lakohon manik. It enobam kota re sokole humon mel kelog mel wereg fug mu re along deg fug’ uruk ulug hweag-hesauk kahi” isi.

³²TUHAN en Nebukadnezar fam eke uruk kwit, “Haren de it enangge unta mel enowam endag-dauk on abirangge mel huhul hwelakiyug! Ap enoruk horogdoho baleg on de An den di kwe su kwe del-fol esahuk. An den de it fam anggin anggolo on di kwe su kwe en debeseik waruhuk.

³³Hazor de mundoho-mundoho fahet nong aruhureg wereg ma re obale etma re olomene herag aik laukmuroho welaruhu. Ap misig oho eke etma welaruhu fug. Ulug An TUHAN en nele mundoho ihi” isi.

³⁴Hun Zedekia ap homi Yehuda on fahet raja inatfagdeg duruk kweleg horog etano re TUHAN en an nobam o Elam kwenang ai fahet ele isi.

³⁵TUHAN ele uruk kwit, “An den at Elam en ap sehen anggen on wereg ma enomamne deg on omano enowaruhuk.

³⁶An den de o Elam fam etma hol foma-foma en fu ha waruhuk, ne ap homi re An den di kwe su kwe mon-enebuhukmu re o kwenang amu kwe etma ap Elam on en o oko lauk on eleg angge eke welaruhu fug.

³⁷An den de ap homi Elam on en it enaselei it enowarukoho duruk on omano fam enakol dukwag ulug debesehuk. An den it fam mundoho nolok enepihik mu re it enebe mundoho luluhun debesehuk. It enowarukwag ulug An den tentara mon-enebik waruhukmu it enebe mun-mandoho eleg amuhup.

³⁸It enowesi raja mel ap yabuk lehoma duruk on mel de An den luluhun esahuk, ne it enanggwenang fam etma re An den takhta hweriegma wuruhuk.

³⁹Famen fobik it Elam on de An den hwaloho fesehuk. Ulug An TUHAN en nele mundoho ihi” isi.