Read Ninia Yali YEREMIA 5 Bible Online

YEREMIA 5 - Ninia Yali bible

YEREMIA 5

¹Yaho hit Yerusalem henap, hit henobam kota etma fene en kobokwe fene etma lakiek! Hera halug de hit hinil en hakiyug. O kota koboke kwe etman ap misig oho eke demdoho duruk kwit Allah fam dipdoho duruk on eke wereg ano.

²Hiren uruk kwit TUHAN apne wauk kahe uruk kahep, famen hiren airoho duruk fug kwit en.

³Ebe demdoho TUHAN en hit fam heng henepuk on de hiren dipdoho duruk on ai. TUHAN en hit henowatuk famen de ambum deberuk kahep fug. Aren hit sebele henobaharuk famen de hit hweag-hesauk ale fahet henahayeg deg fug. Hit de henenda omamne deg lit hit henesiag fam en henenda aham diek.

⁴An den boruk kwit, “It aire ap homi hesangge on di ale su ale oho enapeleg on. Iren de TUHAN en it fam en heng enepuk on mel, At endareg ale mel, enapeleg deg lit mun morue ale neg duruk.

⁵Mu re an den ap kaindeg enakit lamindeg nele marik larohon. It de TUHAN Allah en heng enepuk angge mel, At endareg angge mel etma enoluk deg,” irihik. Famen, it abirangge etma oho TUHAN en melal-enepuk ale fahet enerim deg; ne iren TUHAN ele holoho duruk ale oho enerim deg.

⁶Ai fam it enebe re singa en enggelaman senggel enebeheg, ne olomene serigala en ili angge leimu en miyog-mayog eseheg duhu. No macan tutul de it enobam kota horog kwe etma lag-wag uruk kwit senggelduk angge hera duruk karuhu, ne ap homi wilibik lauk on etmano re senggel enepuk karuhu. Abirangge etma re iren enesiag hum aleroho deheg, ne hundig-hundig Allah enambol yig-utlug laheg, duruk katswa fam aruhu.

⁷TUHAN ele uruk kwit, “Nunggwelug An den nomaliki enesiag elehapdoho fohuk no? Iren de An lin nealug Allah fug on amu on apne wauk. An den it enasiburu nauk on og-esaukmu it mun homoroho nalug en de, iren babi deheg, ne uang hwelakoho hambena duruk on omano enekit laheg, duruk.

⁸It de no kuda yohombuk sei on en amolmol anggolo ale durukmu duruk hag deg; it enemu domog en de enori enohwesi fahet enenda nauk.

⁹Airoho duruk kweleg etma re An den enunggul unuk aireg on aire unggum og-eseheg, iren duruk onggo enobam feheg, dihi ha fug alereg a?

¹⁰An den de ap selei on en it enangge anggur yabuk siahap dukwag ulug mondorik waruhuk, famen de mundoho elehap dukwag ulug de fug. An den ap selei on en anggur enggik etma deg dukwag ulug mingming enebuhuk, enggik etma re An den on fug deg ma.

¹¹Ap homi Yehuda on mel Israel on mel en de dik-demdoho An hwena napswa. Ulug An TUHAN nele mundoho ihi” isi ebag.

¹²TUHAN omaliki en de TUHAN fahet wene demdoho fug on uruk. Iren uruk kwit, “Ah, Aren di ale su ale duk fug alereg. Ne, nit de anggin on nenobam aruhu fug, ne weim en nenowatuk ale mel, siburu obok mel etma hahuk fug.

¹³TUHAN en hweag-esakiyug ulug uruk on de it nabi enobam wereg fug anggere, it etma re we hol hag beyek,” uruk.

¹⁴Airoho urukmu TUHAN di ale su ale duk ale neg deg on anyo en an nobam uruk kwit, “Yeremia, ap homi etma re airoho urukmu re, it de wene obabut siag on iren aruhu fug boruk on enobam aik waruhu. An den de An nele aire hat hambilikmu indok hag debehuk. Ne, enunggul unuk aire e yalduk on hag, deg ma re indok ai en enebe mundoho han yal-enebuhu” isi ebag.

¹⁵Yaho ap homi Israel on, TUHAN en de unggul unuk misig eke o yatman hit henowarik wamag ulug mondorik waharuk. Unggul unuk aire o endam etmat welatfag enap, enele re hit henapeleg on, ne enebe re mun enomamne enap waharuk,

¹⁶ne iron en sehen leheruk enap de mun enambong si-sereg enap, iren de enenda esa fug angge enowatuk enap.

¹⁷Iren de hit henanggwenang fam en anggen yihig etma mel, hit henangge nauk angge mel, elehap debelug de henomaliki binggi enowaruhup. Henowam sapi, domba mel de iren wat-dahup, hit henahan anggur yabuk mel, ara yabuk mel de iren luluhun esahup. Hit henobam henalong balegma omamneroho wirig on de iren luluhun esahup.

¹⁸TUHAN ele uruk kwit, “Airoho duhup famen de eta li em An den nomaliki elehap debesehuk fug.

¹⁹Famen, iren hein og-heauk kwit, nunggwelug Aren airoho nenepuk ulug, uruk halug de hat Yeremia en diroho iyug, iren enanggwenang fam en An nobahalug dewa enunggul unuk amu on en fam enobahet duruk katswa ai hag, it nikale ap bohon o kwenang amu on fam enamingming angge amuhupdeg welamuhup,” eheik ulug hweag-esakiyug ebag.

²⁰TUHAN en wene su it ap homi Yakub ambiangma on o Yehuda fam wereg on etma hweag-esowag ulug mingming napuk kwit diroho isi,

²¹ “Yaho hit ap morue henap sohou henap etman holiek! Hit de hinil wereg famen de hauk kahep fug, henesanggo wereg famen de holduk kahep fug!

²² An de TUHAN; nunggwelug hiren An fam henakol napuk kahep fug? Ebe demdoho re hiren An fam henowag elek durukam on! An den neg ik elahalet ai ik laut hulireg welamag ulug mundoho-mundoho fahet deberihik. Laut ahum imbileheg, funag-lenggag angge deheg, duruk famen de huli wareg on ai dahandoho laharuk fug.

²³Famen hit de henenda omamne deg lit hundig wene sahalduk kahep. Hiren de dahandoho duruk kwit An nobahalug lauhup.

²⁴An den de osit duruk li em, indip duruk li oho ne ambiangma aik lauk li oho osit mondorik waharuk kahi. An den neg hit tahun hundig-hundig etma fam anggen balduk li og-hesauk kahi, famen de hiren An nalong boruk ale fahet ebet hauk kahep fug.

²⁵Famen de hit henesiag etma fam fano angge kwe bale foruk kahepma re hit na fug angge welahep ai.

²⁶Yaho nomaliki, hit henesahalimu re ap enolok on wereg. Ap en suwe yep debelug, kwimisi ane, ulug nangno hauk kwit wereg hag, iren oho hit fahet airoho sabu yep debelug nangno henepuk kwit wereg.

²⁷Ap suwe senetuk enap en, suwe seneko yohwatuk angge fam suwe yohwatuk anyo hag de it ap etman ohore it enobam olma re seiale lal heheg hwelauk on en hopo dik deg. Airoho deg ma re it enalong wereg aheg, dungon aheg,

²⁸enebe fihileheg, enenggik weregdoho neg aheg atuk. It enolok fam duruk ale etma re huli-huli wereg fug. Iren de omalik wetien on enawene fahet katukdoho enebuk eleg angge deheg, ne ap homi sebeloho feseruk on enangge on fahet ili og-enebeheg, duruk fug.

²⁹Famen, An TUHAN en abirangge etma unggum og-esahuk; An den de it enunggul unuk au en enobabut duruk ale etma fahet ambiangma debesehuk.

³⁰Mun fulu bolan ale nim namelmel ale nim de o kwenang su fam eke atsi, aire:

³¹nabi en seiale eheg, imam en de it enenda boruk aleroho neg deheg, durukmu hit An nomaliki en oho re aireg on etma fahet henambono deg lahep. Famen de nukoho ahae fotog aik waruhu salim de hiren nunggwe ale eke duhup?” Isi ebag.