Read Ninia Yali YEREMIA 50 Bible Online

YEREMIA 50 - Ninia Yali bible

YEREMIA 50

¹ TUHAN en o kota Babel mel ap homi etma wereg mel fahet ukwag ulug an nobam isi on de su,

²“Eneg ale borebelug di ap su ap unggul unuk fam wene unduhuk foruk kwit Babel sebel aha iek! Ai fahet herahauk fug! It enanggembu Dewa Merodakh anyo re mundoho luluhun deheik, ne ahut ilit deg homi mel ap mel enabuluk kwe kohouk ilit deg angge re erapdoho yin-hun eheik, ne kembu aren on de mundoho wendal aha iyek.

³Unggul unuk misig eke o utara fil en Babel fam dog sinalik waruhureg o kwenang aire iliangge leimu hagdoho debehuk. Ap homi mel wam di angge su angge mel, de heye lahupmu re etma eke wereg lamuhup fug” ulug isi.

⁴TUHAN ele uruk kwit, “Nukoho eta li em de ap homi Israel on mel Yehuda on mel de An it enakni Allah hera napuk kwit enebe seberoho oba yatil wamuhup.

⁵Iren de o Sion lauk kwe koboke hein og-eneplug de kwe ai fam wamuhup. Iren de An nim wene sali mundoho welaruhu on waruhup deg de iren seneg lit neg welamuhup.

⁶An nomaliki re ap domba hwalduk on en dom fene embeserukmu longgo ulug wereg hag deg. It de dom eke fam en eke fam leil watil lauk kwit enobam dima wereg ulug de enapeleg hagdoho duruk.

⁷It de ap homi ininim ambi atuk on en de enobam sahali ulug yeik siagdoho enowatuk. An nomaliki eneselei on en uruk kwit, ‘Ap homi etma re TUHAN il hanim siag duruk katswa ma re niren duruk kahe ale aire siag fug. It enombawi re TUHAN fam demdoho boruk katfag ma re it oho re At fam neg dipdoho welam angge duruk’ uruk.

⁸ Yaho nomaliki Israel on o Babel en heye lakiek! Ap amu on de fobik henombolim lowag ulug de hit dam lakiek.

⁹An den ap enunggul unuk enomamne on humdoho utara en o Babel dog sinalik wamag ulug lit-enebuhuk. Iren de ap esan lohwalug de Babel nim weim yabik lalug along elehapdoho fohup. It etma re ap sehen anggen enap, iren dog leg haukmu re dahan atuk fug enap.

¹⁰Babel de mundoho huhul hwelahupmu re, ap huhul hwelahu on en de di angge su angge at endama bolug hwelahu. Ulug An TUHAN en nele mundoho ihi” isi.

¹¹TUHAN ele uruk kwit, “Yaho hit Babel henap, hit de An nomaliki herag-enepuhup. Hit de no kuda en ele ngin duruk hag ne sapi enggelangge naukmu hag henahayeg en hweik solog duruk katuhup.

¹²Famen hit de di ap su ap enunggul unuk enesahali mu ende enunggul unuk mun nong-hong deg on amuhup. Hit henobam kota humon aire ap homi en enalitno deheg, enggali ware feheg, duhup. Hit henanggwenang de mundoho unggul ahap neg atlug bug aruhu.

¹³An den nolok enobam fohukmu re Babel de o meiyaleg wereg ma ap homi wereg fug hag aruhu. Ap homi kwe etma lauk on en de youk lalug enamelmel duruk kamuhup.

¹⁴Yaho hit ap sehen anggen on! Hit de Babel walinggik lalug bin kuluhup en de fanoroho lohwaliek. At Babel en de An nobam siag disimu re hit henendog de Babel ebe fam fi-furoho leheik lakiyug.

¹⁵Kota ai maseroho etman de weim enap diyug. Ketia re Babel mundoho omamne eleg aha, at obam fak lehet oho on de housaloho kuruk kwit mundoho luluhun deheik. An den Babel en disi ale fam ambiangma deberuk kahi. Ai fam de iren ap homi amu on fam debeseruk katswa eta hag it enobam oho airoho debeseiyug.

¹⁶Ap homi en o etma yabuk wireheg, anggen yihig baleheg, dukwag ulug embesouk fug. Ap bohon o kwenang ai fam wereg on abirangge re ap tentara fam enakol en de it enanggwenang indipmu domog lahup” isi.

¹⁷TUHAN ele uruk kwit, “Ap homi Israel on de domba oluk no singa en muko del-fol esauk on hag deg. Keram ir de raja Asyur on en enowarik wahasi, ai en raja Babel on Nebukadnezar en enowag serep heg nasi.

¹⁸Ai fam de An TUHAN Mun Nalong welahi on, Allah Israel on enakni en de Raja Nebukadnezar ebe mel anggwenang mel de An den raja Asyur on unggum og-itihik eta hag debehuk.

¹⁹An den de ap homi Israel on it enanggwenang fam nikangge feseik lahuk. Iren de kwenang Dom Karmel nim o Basan nim fam en anggen yihig nauk kamuhup. It de kwenang o Efraim nim, Gilead nim fam en anggen yihig en homo debesehu.

²⁰Eta li em de Yehuda on nim Israel on nim de An den ap homi enahap wendat enebuhuk on etma enesiag napelehapdoho fesehukmu re siag fam en mundoho horeg welamuhup. Ulug An, TUHAN en nele mundoho ihi” isi.

²¹TUHAN ele unggul unuk misig utara [29] fil wereg on fam uruk kwit, “Ap homi o Merataim mel Pekod mel wereg on etma bin enowarik lakin. It enebe binggi enowareheg, elehap debeseheg diyug. An den diyug ihi ale etma dik lakin. Ulug An, TUHAN en nele mundoho ihi” ulug hweag-itsi.

²²Weim aplohok de o kwenang etma fam dung duruk, ne hum-ham ale luluhun duruk.

²³O kwenangma mundoho re Babel en del-esaukmu al sahal atuk katsi, famen ketia re louk anyo somboreheik! O kwenang ai fam aha ale fahet ap enunggul unuk mundoho en hol-halug youk lahup.

²⁴TUHAN ele uruk kwit, “Babel, haren de An nim wal-wal amul ulug duruk kahen, ai fam de An den sabu hat hobahet yep-hobaharihik on anyo hapelegdoho duruk kahenma re anyo fam luhut ahen ai.

²⁵An nasehen foroho lahimu o anyo sok husi fehi, ne An nolok fam nasehen omano wilibi feik wahi. Aire An TUHAN Mun Leho welahi on en de yabuk o Babel fam etma misig eke duhuk en dihi.

²⁶Babel ai unggut foman-foman housaloho kulug aren gandum anggen baloho fahat dalugmu etma dolulu kwiek! Hiren huhul hwelaluhup angge etma re gandum anggen baloho kabog lahapuk hag kabog-diek! O kwenang ai mundoho eleho feyek! Ando eke welamag ulug embesouk fug!

²⁷Aren tentara re mundoho enowariyug! It mundoho il homogdoho debeseiyug! Unggul unuk Babel on aire it unggum og-esauk li mundoho horog aik waha ma enelaheg e!” isi. (

²⁸Ap homi o Babel en heye o Yerusalem wahausa on en de nit nenakni TUHAN Allah anyo en iren TUHAN Obam wirig anyo fam debousa ale anyo fahet onggo debesesi ale dindilswa.)

²⁹ TUHAN ele uruk kwit, “Ap sehen anggen on etman Yerusalem dog sinalik kukwagdoho hweag-esakiek. Ap sehen wauk ale enggat on etma mundoho lit-enebiek. O kota ai fam salik lalug de ap misig oho eke foldongdoho wilibukwag ulug embesouk fug. Aren de An Mun Namu Eneg welahi on, Allah Israel on enakni anyo fam mun nong-hong deg ale disi anggere, at obabut deg ale ai higitdoho, ne aren disi ale nim duruk ale nim eta higitdoho ambiangma at fam oho debeiyug.

³⁰Nukoho ai salim at omaliki ap sauwe re o kota koboke kwe waramuhup, ne autsi tentara re mundoho luluhun esahup. Ulug An, TUHAN en nele mundoho ihi.

³¹Babel ao, hat de mundoho henda leho fahat-dauk kahen! Ai fam de An TUHAN Mun Leho welahi on, Allah Mun Nalong welahi on anyo en de hat howaruhuk. Hat unggum og-hutuk lire mundoho aik waha.

³²Hat hunggul unuk on enenda mun leho fahat-dauk on aire dungdoho ying-aik wambuhup. Ap misig en oho eke hat inamag ulug let-habuhup fug. Hat hobam kota etma re An den han yaleheg, ne di angge su angge etma maseroho wereg on de mun eleho feheg, duhuk” ulug isi.

³³TUHAN Mun Along wereg on anyo en uruk kwit, “Ap Yehuda on mel Israel on mel de sebel esaukmu wereg. It sabu hetdoho feseik lausa on en de ning-nangdoho kahal enusug wereg lit de loloho wilibi feseruk ale fahet enerim deg.

³⁴Famen An de it enahap wendat-enepuk on mun nomamne on, nunuk de TUHAN Mun Along wereg on ai welahi. An namu en neg it enawene ai fahet indip bilingguhuk deg o kwenangma etma enenda seroho welamag ulug debeik waruhuk. Famen ap homi Babel on fam de yeik o sel kwelapuk on mel enakol on mel, debeseik waruhuk” isi.

³⁵TUHAN ele uruk kwit, “Babel aire ap homi holduk on mel, pemerintah mel ap enggat-fenggat deg enap mel mundoho eleho feseyek! Iren de mun nik aleroho enakol hauk!

³⁶Nabi Babel fam wereg on omano mundoho eleg ahesa! It etma re mun sohoureg lit seiale uruk enap. Babel on tentara re mundoho eleg ahesa! It de mundoho enakol neg aha!

³⁷Iren enangge kuda mel kereta mel weim yapuk angge etma luluhun esakiek. Ap sehen seneg enap weim yap-nesowag ulug onggo bal-enepswa on etmano mundoho eleg ahesa! It de mundoho enomamne eleg deg! Babel angge enggik wereg angge etma mundoho luluhun esakiek! At angge etma mundoho faloho wakiek!

³⁸At eyabukmu ik wirig atuk on mel etma firitog debeyek. Babel de kembu mun namelmel on en hopo deg ma re ap mot-duruk on de siomo duruk anggere,

³⁹ ai fam Babel etma mungguat olok on mel, muruahun[30] mel, suwe unta mel, wereg ma aruhu. Li mundoho-mundoho etma fam de ap homi o etma wereg ale fahet eke enenda deg lamuhup fug.

⁴⁰ An den o Sodom, Gomora nim o sili maseroho wereg on nim mundoho eleho ferihik eta hag, An den Babel airoho eleho fohuk. Mu re ap homi misig oho etma eke welamuhup fug. Ulug An, TUHAN en nele mundoho ihi.

⁴¹Unggul unuk misig mun omamne humon de utara fil etman waharuk. It de ap raja weim yapuk enap humdoho nim waharuk.

⁴²Iren de enasehen mel inggisim mel sin-sen waharuk; it enebe re enolok enobam haro deg lit de enenda esauk fug on. Ik laut aplohok weratuk hag iren kuda ap Babel on enowarik kukoho buroho waharukmu eyog dap de airoho duruk.

⁴³Airoho waharuk ulug urukmu holug de raja Babel on de at owag kororong uruk. At mundoho akol neg atuk mu re homi enomalik enderukoho ouk en nenek duruk hag duruk.

⁴⁴No singa ket sauwe on ohwei faregman Ik Yordan luluk omano en watlug domba enggelangge o leimu naukmu waharuk hag, An den ap homi Babel on fam kwik waruhuk deg ap Babel on it enanggwenang on fam en fetag-fetagdoho heye lowag ulug debesehuk. Airoho debesehukdeg de An den ap misig eke it melal-enepuk kamag ulug unduhuk fohukmu aren unggul unuk ai on melal-enepuk karuhu. Ap sa en An nim higit ha alereg? Ap sa en ambong se angge An nim wene baluk alereg? Ap melal-enepuk on eke en an nim wal-wal am alereg a? Eleg.

⁴⁵Aireg ma re An den ap homi Babel on fahet debesehuk ale ulug wenggeloho ferihik ale etma holiek. It enomaliki oho re lit-eneplug lahupmu re ap homi mundoho enakol amuhup.

⁴⁶Babel ap amu on enenggikmu aruhu mu re ap homi enele hum-ham ale saha-faha uruk kwit o kwenangma abirangge et elek duhu; ap homi enunggul unuk amu on en oho holuhup” ulug isi.