Read Ninia Yali YEREMIA 51 Bible Online

YEREMIA 51 - Ninia Yali bible

YEREMIA 51

¹TUHAN ele uruk kwit, “An den de hol sielu siahap duruk on[31] o Babel fil mel ap homi wereg fil mel warik wamag ulug mondorik waruhuk.

²Hol en gandum ahap fi esauk hag de An den ap Babel on etma luluhun enebukwag ulug ap mon-enebik waruhuk. Nukoho ai salim de o kwenang ai fam unggut foma-foman kwik watlug fun-fandoho enowaruhup.

³Ap tentara en enasehen bising howag ulug seleho feheg, nit it enasum dog yapuk kwit wan-duruk on ai fam enawonog amag ulug debeseheg, duk fug. Iron en ap sauwe re enoluk embesouk fug. Iron tentara etma abirangge welelenggen esakiyug!

⁴It de enebe dog en wareg hum alereg lit o kota koboke kwe etma waramuhup.

⁵An de, TUHAN, Allah Mun Nalong welahi on, Allah Israel on enakni Mun Namu eneg welahi on en de Israel nim Yehuda nim en de An nil hanim siag duswa famen An den it lin-esalug lahuk fug.

⁶Hit henonggwareg en del daluhup en de o Babel en heye lakiek. At asiag en watuk li em hit oho henowaruk no. Aire An den Babel olok en duruk katsi on nim obabut duruk katsi on ambiangma unggum obam fohuk li re ketia au anggere.

⁷ Atam Babel de gelas emas on hagdoho An nenggikmu wereg ma o kwenangma abirangge siomo debeseruk katsi. Ap enunggul unuk de gelas ai fam en anggur ahaik nauk angge en wenenebo on atuk katswa.

⁸Famen de fetagdoho re Babel anyo wamburuk kwit erap deheik. Ma re at obahet oba yag-enebiek, at ebe ayebil fam en fano atmisi ano ulug, at obahet obat hera diek.

⁹ Ap bohon o etma wereg on en eke en eke fam uruk kwit, ‘Niren de Babel let dul ulug dehe famen de at airoho aha ma duk fug ale aha. Anggere niren o kwenang au embeselug nit nenanggwenang domog fam laul aire fano. TUHAN en Babel fam unggum mun omamneroho og-ereheik deg mun luluhundoho debeheik.’ Uruk kamuhup” isi.

¹⁰TUHAN omaliki en uruk kwit, “Nit de demdoho on fil welahe ale anyo re TUHAN en unug neseheik ai. Anggere nit de o Yerusalem laul de nit nenakni TUHAN Allah en deheik ale etma dindilik lakohon manik” uruk katswa.

¹¹TUHAN en de Babel luluhun esaroho re ap raja Media on enobam yonggo fesi. Aren ap TUHAN Obam anyo luluhun debousa on fam ambiangma debeseikoho re airoho disi ai. Ap sehen seneg enap enowesi perwira en de, “Dog ambiang wereliek! Dog bei angge fouk diek!

¹²Babel en fak lehet oho on etma fam housaloho kwik laul en de eneg ale diek. Ne, ap saleg on de omamne debeiyug. Ap enaluluk unduhuk on de fouk debeiyug. Ap kwe bal-enepuk on fik-fouk debeseiyug!” uruk. TUHAN en de ap homi Babel on fam debesehuk ulug wenggeloho fesi ale anyo disi.

¹³ O kwenang aire mundoho dungon wereg ma ahaik wirig atuk on oho humdoho wereg; famen at oluk wereg ale fahet de mundoho eleg aik laha ma re ebe eleg atuk on horog aik waha.

¹⁴TUHAN Mun Along wereg on anyo en At onggwareg unuk fam hombuk balduk kwit, aren ap o Babel enowarik kukwag ulug de no bulue elang hagdoho mondorik waruhu, ne iren de enalong amuhupdeg unggul luhutuk kamuhup ulug hombuk balsi.

¹⁵TUHAN en de At omamne fam kwenang wal-debag, Enda wenggeleg fam kwenang buhun-debesireg At enggat deg fam bohol diahan debebag.

¹⁶Aren ele fam amin ulug uruk kweleg, ik huli-huli wareg[32] on anyo aplohok funag-lenggag angge debag. Kwenang ambiang-ambiang etman hena mondorik watfag, ne osit sahalimu re oweal lepeng deberuk katfag, ne hol de obale waroho forohoman mondorik watfag.

¹⁷Airoho debag ale etma halug de ap homi en fu dobahat-dauk kwit, at de morue deg ne wenggelduk ale on de wereg fug ulug fureberuk. Ap emas lalduk ale enoluk on de iren kembu ahut ilit duruk angge omano re ebe on fug ne oluk oho wereg fug en orohole wambuhu.

¹⁸Kembu etma re ebe angge fug deg ma re bulipdoho enalitno duruk ale airoho fano. Li aik waruhu on fam de it enebe mundoho eleg amuhup.

¹⁹Allah Yakub en on aire kembu etma hag on fug; At de di angge su angge wal-debag ahun. Unuk de TUHAN Mun Along wereg on ai; Aren de Israel omaliki amag ulug momal-enepfag.

²⁰TUHAN ele uruk kwit, “Babel ao, hat de helep louk helep hag, An nasehen dog yapuk on deg latihin. An den de hat fene ap enunggul unuk enunggul unuk angge nim, kerajaan omano nim enowarukwag ulug hat og-hapihik.

²¹Haren de ap kuda fam lahalug lauk on mel kuda ebe mel ap kereta en walug lauk on ebe et angge et mel luluhun dukwag ulug og-hapihik.

²²Haren ap mel homi mel sauwe on sobal on mel, hwelani duhum ap sauwe mel enowarukwag ulug An den og-hapihik.

²³Haren ap domba hwalduk on mel domba ebe mel, ap yabuk wutuk on mel, angge lembu kwenang moholdik lauk angge anyo mel, ap enalong wereg on mel sehen seneg enap enowesi perwira mel elehap debesoukwag ulug og-hapihik” isi.

²⁴TUHAN ele uruk kwit, “An den Babel nim ap homi etma on nim iren o Yerusalem enolok fam debousa anyo fam ambiangma ketia debeseruk kahi ale etma hakiek.

²⁵Hat Babel su, hat de dom en o kwenangma welelenggen duruk on hag deg lahen. Famen An, TUHAN hat il habuhuk. An den de hat lit heahukdeg, imbil-ambal healug de indok nahunmu ul amag ulug embesehuk.

²⁶Haren helep feleroho welaruhu on etman de dem misig oho o wurukoho eke wahup. Hat li mundoho-mundoho fahet iliangge lei hag aruhun deg welaruhun” ulug isi.

²⁷Hat raja utara on[33] ai! Weim sinalik kuruk kwit eneg ale din! Ap enunggul unuk en holukwag ulug trompet ele furin! Di ap su ap enunggul unuk lit eneplug de Babel nim weim yabiek. Ap kerajaan Ararat on mel, Mini on mel, Askenas on mel oho re dog sinalik wamag ulug hweag-esakin. Bin kuruk on ai melal-enebukwag ulug ap misig eke panglima unduhuk fein. Kuda no bulue elangdoho deg on omano wakin.

²⁸Babel inim weim yabukoho ap enunggul unuk amu on omano fik-fouk debesein. Ap raja Media enap mel enalong wereg enap mel, ap log-lohon mel, tentara o kwenang iren sebeloho wereg on fam omano en mel wamagdoho wol-enebin.

²⁹An den Babel anyo mun unggul ahap neg debelug ap homi wereg elegma doho debehuk ulug wenggeleg lahi on anyo debemin ulug durukmu re kwenang de elek duruk kwit mil duruk.

³⁰Tentara Babel on de weim yapuk ale embeseswareg de o enalong balegma omano wereg. It de enaluk anggin neg atswareg enowag nonggog isimu wereg. O kota fene sokole humon omano ap en dukom esalug kwik wahesa, ne o wirig de mundoho harep fehesa.

³¹O kota anyo unggut foma-foman bin kwik wahesa ulug enowe raja Babel on hweag-umukoho re ap yonggo atam deg fobik deg lauk.

³²Kwe foma fil nindig-atuk mu re ap selei en kwe balehesa, ne nit nenalong balegma ulug wirig angge omano mundoho han yalehesa. Tentara Babel on de inil elek dehesareg duruk.

³³It de no gandum anggen sahaldukmu en duruk hagdoho we horog il misig fam neg ap selei on en enalong elehap debelug sobit-sabat esakohoreg. Ulug An, TUHAN Mun Nalong welahi on Allah Israel on enakni en nele ihi” isi.

³⁴Yerusalem de raja Babel on en luluhun debesesireg mundoho nasi; kota aire ap en ikwag ik eleho foruk hagdoho debesi. Kisu menawe humon en hagdoho aren Yerusalem bil esasireg de o kota ai fam en fano angge omano re ahummu yohwatuk kwit siag on de hwik-esasi.

³⁵Ap homi Sion henele uruk kwit, “Babel aire aren nit fam nenobahasi hag at fam de enolok en orohole siagdoho deberuk on etma obam aik wamag!” iyek. Ap homi Yerusalem on en uruk kwit, “Babel aire aren nit fam ouk-bouk nenobaharuk katsi hag at fam de ouk-bouk obam aik wamag!” uruk kamek.

³⁶Ai fam de TUHAN en ap homi Yerusalem wereg on fam uruk kwit, “An den de hit henawene ai fahet indip hera duhukdeg de it heneselei on en hit henobam debousa ale etma An den oho it fam ambiangma debesehuk. Ik wirig atuk on mel ik eleruk wilipuk on mel o Babel fam etma An den mundoho firitog debehuk.

³⁷O kwenang ai re o meiyaleg en neg kabog laharuk on aruhu mu re olomene etma herag atuk mu aruhu. Ap en de enamelmeldoho kumu hauk kamuhup, ne ap en etma wereg ale fahet eke enenda deg laruhu fug.

³⁸Ap homi Babel on de no singa en hagdoho ngolu duruk, ne singa omalik en hagdoho kouwa duruk.

³⁹Iren enangge nela ulug obok horog su atuk li em de de An den it nauk on fahet fouk debehukmu re it nahupdeg siomo deheg, enape moreheg, duhupdeg nohokup on aire inatuk kamuhup fug.

⁴⁰An den it de no domba, kambing omalik mel, domba yohombuk on mel warukoho walug lauk hag An den og-eneplug lahuk. Ulug An, TUHAN, en nele mundoho ihi” isi.

⁴¹TUHAN ele uruk kwit, “Babel o kwenangma abirangge en mot-deberuk on anyo re ap en delehesareg sebelik kwehesa! O kwenang aire ap enunggul unuk amu on de enamel-mel deg on aha.

⁴²Ik laut de o Babel huli lahakeik; ik ahum funag-lenggag angge duruk kwit de o kwenang ai warik laha.

⁴³Aren on kota omano re mun namelmeldoho iliangge leimu hag deg. Ap en etma welaheg, kwe ai fam laheg, duruk ale eke enenda deg fug.

⁴⁴O Babel kwenangman kembu Dewa Bel anyo An den unggum og-uruhuk. Aren del dasi angge etma nikangge obalma feik wamag ulug debehuk. Di ap su ap en at eke apne wauk kamuhup fug. O Babel fak lehet omano mundoho langgoroho wambeheik.

⁴⁵Anggere yaho hit ap homi Israel on! Etman heye lakeik. An nolok mundoho ahe lahakeikma duruk kahi anggere hit henebe ohwal dakiek.

⁴⁶Hiren ap ele ulug-walug ale holduk kahep on fahet henenda fit atlug henakol duk fug. Tahun hundig-hundig etma re wene amuroho neg uruk wene etma re o kwenangma misig eke ilinggoman ap enolok en debeseruk ale mel, ne ap raja en eke nim weim yapuk ale fahet ane uruk.

⁴⁷Li aik waruhu on fam de An den Babel fam kembu etma mundoho unggum og-esahuk angge re demdoho beyek. O kwenang ai fam de mundoho bulipdoho belabe fesehup, ne ap homi wereg on de abirangge enowaruhup.

⁴⁸ Unggul unuk utara fil en waruhureg Babel luluhun deberukmu aire bohol fam nim kwenang fam nim wereg angge en de Babel anyo ap selei on enggikmu aha ulug enahayeg en amit-mit duruk kamuhup.

⁴⁹ At Babel en disi fam de ap homi o kwenangma humdoho waratswa, famen ketia re ap Israel on enowatsi mu waratswa on etma fam de Babel mundoho sebel aik wambeheik. Ulug An, TUHAN, en nele mundoho ihi” isi.

⁵⁰TUHAN en ap homi Israel on o Babel wereg on fam uruk kwit, “Hit de ap enowatuk on fam en lil ahep! Anggere re hit nangno duruk kam fug ketia folo-folo lakiek! Hit henebe henobam etman yatma welahep famen de An henakni TUHAN nim o Yerusalem nim fahet wenggel-hakiyug.

⁵¹Hiren uruk kwit, ‘Hit de ap en enalitno nenepuk kwit nenenggali wat nenepuk; nit de TUHAN Obam wirigmu ambe omano fam ap bohon hweria aik kusama nenorohole wamburuk.’ Uruk kahep.

⁵²Ketia re An nele uruk kahi on su fu debeyek, li aik waruhu on fam de An den Babel on kembu etma unggum og-uruhuk. O kwenang ai abirangge fam de dog wareg en yebil hum deg en de ap en nenek duruk on holduk kamuhup.

⁵³At Babel bohol fam lahaik lalug at along balegma ap en senerik lahauk fug on fam lahauk alereg famen oho re, An den de ap en moluluk dukwag ulug mon-enebihi ha alereg. Ulug An, TUHAN, en nele mundoho ihi.

⁵⁴TUHAN ele uruk kwit, “Henesanggo holiek! O Babel fam de o kwenang ai fam mundoho luluhun-lalahan atsi ale fahet nenek deheg, oba yareheg, duruk.

⁵⁵An den de Babel luluhun deberuk kwit de enele anggilukdoho uruk on omano bale foruk kahi. Ap selei re ik laut ahum funag-lenggag angge dil hag waharuk, ne tentara re weim enap dil dog sinalik kuruk.

⁵⁶It de Babel siaho feheg, ap sehen seneg enap sen-enebeheg, it enasehen welelenggen eseheg, dukoho waharuk. An TUHAN en neg at olok en duruk on etma fahet unggum og-uruhuk, ne Babel de aren duruk katsi ale higitdoho An den oho debehuk.

⁵⁷An den de ap pemerintah enobahet yabuk duruk on Babel enap etma mel ap enenda wereg enap mel melal-enepuk on mel tentara mel de siomo debesehuk. Mu re it eke in amuhup fug wen mundoho-mundoho fahet nohoruk kwit welamuhup. Ulug An den nele ihi; An de nebe raja, An TUHAN Mun Nalong welahi on anyo.

⁵⁸O Babel fam fak lehet mun omamne on etma re An den luluhun esahukmu re kwenang nim higitdeg laruhu. Sokole humon yatdoho wirig on etma re An den mundoho han yaluhuk. Mu re ap enunggul unuk en anggolo-fanggolo duruk on etma we alemaroho neg duruk, aire iren duruk angge etma indok en neg nahumu. Ulug An, TUHAN, en nele mundoho ihi” isi.

⁵⁹Raja Zedekia anyo onggwareg fahet along baloho duruk on ulug de at Seraya hun Neria amloho hun Mahseya omba anyo welatfag. At Zedekia raja Yehuda fam weregman neg tahun ohwaneg on wereg kweleg de at Seraya anyo Zedekia inim o Babel lasi. Mu re an den at fam duhu ale ulug eke hweag-itihik.

⁶⁰Babel fam anggin-fanggin aruhu ale ulug mel, o kwenang ai fahet deg ale mel de an den buku yinggilig angge misig eke fam mundoho bale ferihik.

⁶¹Airoho deberihikdeg an den at Seraya fam uruk kwit, “Hat hebe o Babel mundoho aik lalug halug de buku au fam lisu baleg wereg on oma re ap homi etma wereg on fam abirangge bilinggiyug.

⁶²Airoho bilinggulug de somban de diroho iyug, ‘TUHAN, Haren mundoho uruk kwit o kota su re mundoho luluhun debehunmu, ap inim wam di on su on nim de mundoho eleg amuhup, ne obale suma re iliangge leimu hag mundoho-mundoho aruhu’ irihin ulug somban iyug.

⁶³ Haren lahe buku au ap homi etma wereg on fam mundoho bilinggulug halug de, buku au fam helep eke het-debelug de Ik Efrat ahumu hwik hauk kwit,

⁶⁴hele diroho iyug, ‘Diroho neg Babel de aruhu. O kwenang su re TUHAN en anggin-fanggin obam feik waruhu on ai fam de mundoho obuk uhumu re eke enam aruhu fug’ ulug uruk kwit hwik hakiyug” ulug hweag-itihik. Yeremia en isi on de su huli eya.