Read Ninia Yali YEREMIA 52 Bible Online

YEREMIA 52 - Ninia Yali bible

YEREMIA 52

¹At Zedekia ebe raja Yehuda on fahet enatfag li em de umur dua puluh satu tahun deg kweleg inatfag. Aren de o Yerusalem fam etma tahun nanggolop en melal-enepuk katfag. Isinga re hwe Hamutal hun Yeremia obam kota Libna on ai ahaloho.

²At Raja Yoyakim en duruk katfag hagdoho re Raja Zedekia oho TUHAN il hanim siag duruk katfag.

³TUHAN en ap homi Yehuda on mel Yerusalem wereg on mel fam olok enepfagdeg Aren enalong bal-enebuk fug angge muko wilibi fesebag. At Zedekia en de Raja Nebukadnezar Babel on anyo ele sahale folug debag,

⁴ ma re Nebukadnezar inim ap sehen foroho enap abirangge nim de at Zedekia raja wereg lit melal-enepuk men de tahun soho on wereg kweleg tanggal sepuluh bigalem oho sepuluh wereg kweleg o Yerusalem bin kwik watfag. Iren it inindip along balegma re o kota dag fil witfagdeg ap maseroho kwelap-enepuk kwit fak lehet webag,

⁵airoho debagdeg kota ai huk enepuk kwit neg weregman de at Zedekia ebe melal-enepuk katfag on anyo tahun sebelas on atfag.

⁶Tanggal sembilan bulan ohwaneg on tahun ai fam de siburu obok mun anggoloroho lahabag ma re ap homi enengge nauk angge mundoho eleg latfag,

⁷ ne o kota fak lehet anyo re ap selei on en kululuk esalug kwebag. Hup anyo salim de ap Babel on de it huk enepuk kweleg famen de tentara Yehuda on mundoho re heye o Yordan donggoma etma lebag. Iren de koboke hun raja obam bumbuk wereg kwe anyo en de fak lehet anyo ambiang biren ahundip deg kwe sokole anyo fene wilibik lebag.

⁸Famen tentara Babel on en Raja Zedekia mutlug lebagdeg de o Yerikho donggoma etman senetfag. At autsi omano abirangge re at lin-esalug longgo ebag.

⁹Airoho senetlug de Raja Zedekia anyo raja Babel on Nebukadnezar akit walug o kota Ribla daerah Hamat fam etma watfagdeg ebe binggi waruhup ulug unggum og-etfag.

¹⁰O kota ai fam en neg at onggwareg omaliki omano il kumu enusug kweleg iren binggi enowatfag, ne it Yehuda fam yabuk lehoma duruk on oho re mundoho enowatfag.

¹¹ Airoho enowatfagdeg de at Zedekia anyo il hulil esalug de sabu hetdoho re o Babel walug lebag. Etman de at ebe sabu hetdoho kwelap enepukmu febag ma wilibik wam fug angge weregman neg etman waratfag.

¹²Tanggal sepuluh bigalem foab on wereg kweleg ne at raja Babel on Nebukadnezar anyo en melal-enepuk kwit weregman neg tahun sembilan belas on deg kweleg, hun unuk Nebuzaradan aire o Yerusalem watfag. At aire eyabuk de hun Nebukadnezar wene komoroho hweag-ereheg, ne it ap raja along baloho wereg on omano fahet kepala welaheg, deg latfag ahun.

¹³ At Nebuzaradan en de TUHAN Obam anyo mel, raja obam bumbuk mel, o Yerusalem fam en ap yain-kain enobam mel de mundoho han yalfag.

¹⁴Airoho debagdeg de at autsi en de o kota fak lehet anyo mundoho moluluk debag.

¹⁵Ai en de ap homi o kota ai fam wereg on, ap yabuk duruk ale enggat on ando wereg on mel, ap kunggu on mel, ne ap foma it Babel inibil heye lebag on omano mel de abirangge hun Nebuzaradan en feleleng eneplug de Babel lebag.

¹⁶Famen de ap homi mun dem kunggu on mel, enangge mun eleg on mel, o Yehuda fam etmano embesebagdeg de anggur yabuk mel yabuk amu on mel wutuk kamuk ulug hweag-esebag.

¹⁷ O TUHAN Obam en no perunggu eyog mel, kereta mel, ikwag perunggu ebe mel de ap Babel on en erap debebagdeg de perunggu ebe re iren hohouk dulug it enanggwenang fam lebag.

¹⁸Ai walug lauk kwit iren nin walug lebag anggere: olog duruk angge mel, ul mezbah fam en forukmu obale mel, pelita obale mel, wam waroho yalduk kwit amep ologdoho foruk angge mel, dupa yalduk angge mangkuk mel, ne iren wene kabog-duruk kwit duruk angge foma mundoho inim walug lebag.

¹⁹Ai en emas, perak on mel, mangkuk dot-doron mel, olomesag mel, wam waroho yalduk kwit amep ologdoho foruk angge mel, ul ologdoho foruk angge mel, pelita owag eyog mel, amben angge dupa fahet mangkuk mel, mangkuk anggur TUHAN obahet folug hililoho kwelabe foruk katfag angge mel, mundoho etma re at Nebuzaradan en at onggwareg fahet hwelebag.

²⁰Di on su on Raja Salomo en TUHAN Obam fahet ulug hilinggebag on, kereta mel, waruk bejana mel, ne bejana ai leko wereg angge sapi nesanggo en mel, de mun anggin hum alereg ma re anggin ilit duk fug alereg latfag.

²¹No perunggu eyog biren etare higitdeg latfag: emberim de 8 meter mase deg ale re 5,3 meter ne bik-bul de kolo deg latfag. Perunggu ai ayuhuk wilim deg latfag ale re 75 milimeter en. Eyog lahabeg on etma hemberimmu re eyog unggul eke 2,2 meter en angge welatfag. Unggul ai maseroho etma re no delima anggen ilitdoho mendaho latfag famen abirangge re no perunggu on en neg deg latfag.

²³E delima anggen unggul etma domog de ebe seratus en welatfag famen de sembilan puluh enam en neg apma fil en oho enameg latfag.

²⁴Ai en foma at Nebuzaradan en hun Imam Agung Seraya mel, hun Zefanya apma welatfag on anyo mel, ap henehan o TUHAN Obam anyo sokole kurukmu kahaleg latfag on mel,

²⁵raja onggwareg fahet komo duruk on o kota ai fam welatfag on mel, panglima mel at apma wereg lit it tentara enobahet lisu balduk on mel, ap yain-kain enebe enam puluh en mel amu on mel sen-enepfag.

²⁶Airoho sen-enepfagdeg aren ap etma mundoho Raja Nebukadnezar akit o Ribla,

²⁷wilayah Hamat fam etma og-eneplug lebag. Etman de it yeik siagdoho enowareheg, enebe binggi enowareheg, debag. Airoho neg ap homi Yehuda on it enanggwenangma en de sabu hetdoho hwik-enebik laukmu etmano feseik lebag on

²⁸etma enebe seberoho re 4.600 en. Nebukadnezar en de ap etma sabu het-eneplug lauk kwit de diroho og-eneplug lebag: At ebe raja wereg lit melal-enepuk katfag on anyo tahun sabiron on fam de ap enebe 3.023 en og-eneplug lebag, ne ap o Yerusalem on de 832 en angge at ebe raja wereg on anyo tahun delapan belas wereg kweleg og-eneplug lebag. Ne, ap enebe 745 en de at Nebuzaradan en Raja Nebukadnezar de melal-enepuk kwit neg weregman tahun dua puluh tiga on wereg kweleg og-eneplug lebag.

³¹Tanggal dua puluh lima bigalem nesanggo on wereg kweleg, ne tahun tiga puluh tujuh on fam at Yoyakhin anyo sabu hetdoho hwik-enebik laukmu etmano hwik dik lebag ma etma wereg kweleg, de at Ewil-Merodakh anyo o Babel fam raja inatfag. Airoho inatfagdeg de tahun anyo fam de aren hun Yoyakhin fam elaheg bebagdeg ebe sabu hetdoho wereg ma omano en loloho wilibi feheg,

³²at fam fano ale debeheg, debag. At Yoyakhin de it raja foma sabu hetdoho hwik enebik lebag on omano sebeleg kweleg at neg yabuk leho on og-etfag.

³³At de asum sabu hetdoho weregman wandoho welatfag on nonggoloho amu on wan-dalug de at ebe wereg li etma re hun raja obam etmano siburu nenggeg, uang at endareg aleroho og-ereheg, duruk katfag. 2