Read Ninia Yali YEREMIA 6 Bible Online

YEREMIA 6 - Ninia Yali bible

YEREMIA 6

¹Yaho ap homi Benyamin on, hit de o oko lakiek! O Yerusalem embeselug lakiek! o Tekoa fam trompet ele fu dulug de o Bet-Kerem fam etma eneg angge fahet indok hobu feyek! Anggin on mel obabut siag on mel de utara fil en kwik waikoho duruk.

²Kota Sion mun ebe on au famen de TUHAN en luluhun debehu;

³ap enalong wereg enap de enautsi tentara mel enobam sabo saluhup. Ne, o kota ai maseroho re iren ap tentara en tenda wiroho nohoruk on anyo wiruhup deg it enemu domog en obale enenda boruk aleroho wiri folug welamuhup.

⁴Airoho wereg lit iren diroho uruk kamuhup, “O Yerusalem bin kukoho lahe anggere fik-fouk diek! Niren o nukoho au fam kukohon lahe!” Uruk kamuhup. Airoho ulug en iren nikangge uruk kwit, “Nit mundoho andomog ale dehe, o mundoho hup aikoho nenahohe mundoho yat-atuk oma re.

⁵Niren de o hup angge bin kul deg de o kota ai fam enalong balegma ulug elehet oho on ai luluhun esa kul.” Uruk katfag.

⁶TUHAN di ale su ale duk ale neg deg on anyo en ap enalong wereg enap etman e mureheg, o Yerusalem huk dik kuruk kwit fahet duk it inindip enalong balegma fahet wireheg, dukwag ulug melal-enepsi. TUHAN ele uruk kwit de, “Kota su re ilonggoma etman aren ap sebeloho feseruk katsi ai fam An den unggum obam fohuk.

⁷Ik eleruk fam en ik ebe on wilibik waharuk kwit wereg hag, kota ai fam en de enolok on neg anggen baloho lahapuk. O ai fam en de hape fam debeseruk ale mel, ap enangge del-dauk ale mel, neg holduk kahi; yebil mel enahap fam ouk wereg on di kwe su kwe wereg ma neg hauk kahi.

⁸Yaho hit Yerusalem henap, hiren mundoho anggolo hauk kahep etma re hit wenggeleg lamag ulug henobaharuk! An den hit lin hesalug hit henobam kota au ahamdoho re ili angge lei ap homi wereg elegma hag debehi ha ale i” isi ebag.

⁹TUHAN di ale su ale duk ale neg deg on en ele uruk kwit, “Israel de mundoho unggul ahap neg debelug, no anggur anggen abirangge dahandukmu mep pi uruk hag deg lamuhup. Ai fam de nukoho ando wereg on eya fam de ap homi ando wereg on eta enahap wendat-enebiek” ebag.

¹⁰Airoho ebagma an den onggo uruk kwit, “TUHAN nakni, an den de sa mel fam nele imin, ne sa mel enenda wenggeleg welamag ulug hweag-esamin? It de enenda haro deg lit fu deberuk fug on. Haren hweag-esakiyug uruk ale omano an den hweag-esaukmu re iren unda yatuk kwit enerim duruk on wereg.

¹¹TUHAN nakni, Haren holok enobam femin ulug duruk kahen on ai ohore an nendama fululung duruk! Mu re sebel halug welam ale re anggin deg” ulug hweag-itihik. Airoho irihikmen TUHAN ele uruk kwit, “Holok behen on aire omalik doron o kota koboke kwe wereg on mel, ap sauwe on kabog-duruk on etma mel fene hilili feik lakin. Ap nim homi nim de mundoho sen-enebuhup. Ne, ap homi mun sobal atswa on oho re eke lil amuhup fug.

¹² It enobam wirig de ap amu on fam og-esahup, ai hagdoho re it eneyabuk mel enohwesi mel oho ap amu on og-esahup neg. Ne, ap homi o kwenang su on de An den unggum og-esahuk.

¹³It enebe abirangge re doron et lohon on et hwenaroho duruk kwit enonggwareg enamu hwelaul ulug on neg hera duruk. Ne, ap imam nim nabi nim en famen oho ap seiale hweag-esauk.

¹⁴ An nomaliki enebene yebil etma fahet, iren de yebil dot angge boruk, iren uruk kwit de, ‘Eleg embesein, nit de fanoroho hambuk deg ma welahe’ uruk famen ebe airoho deg fug kweleg.

¹⁵Ebe demdoho re iren mun me nape ale etma durukmu re enenggali ha on. Famen it de enorohole ambum deg lit enenggali eleg. Ai fam de it oho ap amu on hagdoho dungdoho wat-dahup; mu re An den unggun og-esahuk ai fam de it enoluk wereg ale anyo o fotog aik lahu. Ulug An TUHAN en nele mundoho ihi” ebag.

¹⁶ TUHAN en omaliki fam ele uruk kwit, “Hit de kwe hwandohal duruk kwe etma unduhuk lit de fik-furoho kumu deg lamuk! Koboke endam on omano fahet koboke re ke on fanoreg ulug hein og-eneplug de, hit henenda hambukdoho welamuhup en de kwe ai on mug hakiyug,” isi. Famen iren uruk kwit, “Eleg, nit de kwe ai fam mug-hauk ale nenerim!” uswa.

¹⁷Airoho uswama re TUHAN en di li em su li em de eneg angge ulug trompet ele holiek ulug hweag-esauk kamag ulug ap kahaleg on feseruk katsi. Famen ap homi omano en uruk kwit, “Nit de holduk ale nenerim deg” uruk katswa.

¹⁸Ai fam de TUHAN en uruk kwit, “Ap henunggul unuk etman henesanggo holiek! Hit de An nomaliki on enobam aruhu ale ai henolukdoho welamuhup.

¹⁹Hat kwenang su fu debein! An nomaliki en de An den hweag-esuak kahi on omano wa fug angge welaheg, ne An nele holoho duk fug angge deheg, duruk. Airoho duruk kwit it enemu en melale folug duruk on ai ambiangma re An den anggin on enobam feik waharuk kahi.

²⁰Nunggwe fahet iren amben fano angge kemenyan o Syeba on mel ne amben angge o kwenang yatman An nobahet walug waharuk? An de iren nobahalug og-nutuk on etma wa fug ale napuk. Iren An nendama nahayegdoho ulug waroho yal-nutuk on etma nerim napuk.

²¹An den duhuk fam ap homi su dungdoho ying-amuhup. Akni et omaliki et, are et, ori enobam foma fil on et mundoho eleg amuhup,” isi ebag.

²²TUHAN ele uruk kwit, “Unggul unuk mun omamne on misig eke re o yit-yatma utara fil etman waharuk. It de weim yabukoho waharuk.

²³Iren de enasehen mel fit mel lik-louk waharuk. Enangge kuda fam lahalug o Yerusalem dog sinalik kul ulug buroho waharuk on eneyog dap durukmu re ik laut ahum funag-lenggag angge duruk kwit aplohok hag duruk.”

²⁴Airoho urukmu holfagdeg de it Yerusalem wereg on de di ale su ale duk fug ale neg atfag. It de homi enomalik enderukoho ouk en nenek duruk hag, enakol neg aik watfag.

²⁵It de kobokwe ma wamburuk ale oho, ne yabukmu la ale oho re di kwe su kwe omano ap enowatuk on neg wereg urukmu re enambong seroho la fug ale atfag.

²⁶TUHAN ele omaliki fam uruk kwit, “Henasum karung on wan-dalug de ul fene etma imbil-ambal uruk kamek. Ap unggul elehap duruk on en de mun fetagdoho neg hit henowarik waikoho deg anggere, fong watuk kwit ap enomalik wandeba on waratuk mu oba yatuk hag duruk kwit welamek” isi ebag.

²⁷Airoho ebagdeg TUHAN en Yeremia fam uruk kwit, “Haren de no logam abut balduk ai hag An nomaliki etma enabut bal-enebin. It enobabut deg ale furoho kumu esakin!

²⁸It mundoho re enenda haro deg lit wene sahalduk on, perunggu mel bosie mel wirik hag deg on. It de enobabut mun siag ale duruk kwit di kwe su kwe ap enabug siag saharil lauk on.

²⁹Logam indokma weraho on anyo re mundoho ahanhan deheik, famen de sing on anyo nunumdoho eleg atuk fug. An nomaliki on en enolok wereg on etma ahayeroho fesehup fug kweleg famen An nomaliki buhun on amag ulug duruk ale su re we alemaroho.

³⁰It de no perak ap en hwik-esauk on hag ulug uruk kamuhup ulug aire An TUHAN en nele mundoho ihimu anggere” ulug ebag.