Read Ninia Yali YEREMIA 7 Bible Online

YEREMIA 7 - Ninia Yali bible

YEREMIA 7

¹TUHAN en de an o At obam wirigmu etmano lalug de sokole it ap Yehuda enap wene kabog-dul en ulug kwik waharuk on fam eta unduhuk lit, wene diroho hweag-esakiyug ulug nobam folug mingming napsi. Ne, wene it hweag-esakiyug isi on de su, “Hit henobabut mel, henebe welahep ale mel aham diek, hit airoho duruk halug de An TUHAN di ale su ale duk ale neg deg lahi on, ap homi Israel enakni Allah anyo en hit o suma welamek ulug hweag-hesahuk.

⁴Hit de ap en lal-henepuk kwit, ‘Su re TUHAN Obam wirig, demdoho su TUHAN Obam, nit de nenakol eleg angge welamuhuk’ ulug hweag-hesauk on etma fam demdoho bouk fug.

⁵Hit henebe welahep ale mel henobabut duruk kahep ale mel aham diek. Ne, hiren de ap eke fam katukdoho on neg duruk kamek.

⁶Ap bog on mel, omalik wetien on mel, homi sohwe mel, sebeloho feseruk ale aire durukkam fug. O kwenang su fam en ap siag duruk eleg kweleg enowaruk fug. Ne, kembu ilah omano fam apne wa fug. Hiren airoho duhup halug de hit henebe elehap henebuhu anggere.

⁷Hiren lahe henobabut aham deheg, henebe wereg ale hwale feheg, ne abirangge etma duruk ale bale fohup halug de, An den hit o kwenang it henombawi fam enangge on amag ulug og-esauihik on au fam neg welamek ulug hweag-hesahuk.

⁸Famen, dik-demdoho hiren de we alemaroho fahet seiale wene omano fam dip deberuk kahep.

⁹Hiren de ap enangge herahakeg, ap wareheg, babi laheg, seiale wene eheg, Baal fam waroho og-ereheg, ne dewa hit henapeleg on omano apne weheg, duruk kahep.

¹⁰Hiren abirangge etma airoho dulug de, hiren An nakit An nonggwareg nobam wirigmu suma watlug, hiren uruk kwit, ‘Nit de nenenda seroho welahe!’ ulug de hiren nikale duruk kahep on me nape ale omano dik lauk kahep.

¹¹ Hiren boruk kwit An nobam aure ap herahani ena wirigmu boruk kahep a? Hiren duruk kahep on abirangge etma An mundoho nil hauk kahi.

¹² Hit o Silo[3] kota endam An den nobahet duruk kwit kabog-durukmu ulug momaloho ferihik mu anyo lakiek. Lalug de it An nomaliki Israel on en enesiag duruk fam An den o ai fam deberihik ale etma hinil kumu hakiyug.

¹³An den nin uk nan uk hit henobam nele uruk kahi famen, hit holduk ale henerim deg lahep. Hit de siag abirangge etma duruk kwit, An den wol-henepukem de henele onggo uk eleg angge welahep.

¹⁴Anggere, An Nobam wirig hiren henenda hembisig welahep on, An den henombawi mel hit mel fam og-hesauihik mu aure, An den endam o Silo fam deberihik eta hag debehuk.

¹⁵An den hit henori-henerekwi Israel on muko wilibi feserihik hag, hit oho An nolohotman muko wilibi henobahakuk,” isi ebag.

¹⁶TUHAN ele uruk kwit, “Yeremia, haren ap homi oma enobahet somban uk fug. It enobahet haren let-enebin eheg, enobam somban eheg, duk fug. An de heng uhun angge ai hele holuhuk fug anggere, an limi nabuk fug.

¹⁷Hat de it ap etman o kota Yehuda on en fam mel, o Yerusalem en koboke kwe mel duruk katswa ale mundoho hil hauihin!

¹⁸ Omalik doron de e wiroho kabog-duruk kweleg, ap lohon de indok nonggwale folug, homi en de kue kembu hwe on dewi Ratu Surga ulug uruk on anyo fahet werako foul en ulug menenduk. Ne, eke An nenda ouk howag ulug de iren anggur ahaik ilah amu on fahet folug og-utuk.

¹⁹Famen, ebe demdoho re An nenda oukap napuk de fug, ite it enonggwareg oukap-dauk fam de enenggali atuk.

²⁰An de TUHAN Mun Leho welahi on en o wene kabog-duruk obam su mel, ap homi fam mel, wam, mene, bak hag angge mel, e wilibig on fam mel, kwenang fam en anggen yihig fam mel, nolok humon hililoho fohuk. An nolok de indok ambulbul ulog-alog haukmu nahuluk fug alereg hag duhuk,” ulug hweag-nitsi.

²¹TUHAN ele uruk kwit, “Yaho hit An nomaliki, hit de di angge su angge folug mezbah emberimmu yalduk kahep on etma re mun alkandoho yalduk kahep, ne foma re hit nauk kahep ale aire henoluk deg. Famen An TUHAN en hweag-hesauk kwit, abirangge etma nauk kamuhup ai fano! ulug uruk kahi.

²²An den hit henombawi o Mesir en og-eneplug wilibik waharuk li em, An den it fam wam An nenda nahayeg howag ulug waroho yalduk ale nim ne amu on fahet yalduk kwit duruk ale nim fahet wene melaloho hweag-esauihik fug.

²³An den de we An nebe it enobahet enakni Allah wereg ma it An nomaliki atlug welamuhup en de An nele holoho duruk kamuk ulug neg hweag-esauihik. Ne, it enenda enahayegdoho welamuhup en de An nawene melaleg wereg aleroho neg duruk kamag ulug hweag-esauihik.

²⁴Famen de iren holuk fug angge deheg, fu debouk fug angge welaheg, duruk katfag. Airoho duruk kwit de iren de enendama enolok deg on mun hapereg on anyo neg duruk katfag. It enebe re fano aik lauk katfag re fug, ite eke nim mun enolok aik lauk katfag.

²⁵It henombawi o Mesir en wilibik watfag li en angge ketia huli re An den namingming angge nabi omano hit henekit mon-enebik waharuk kahi.

²⁶Famen hiren eke holeheg, furebeheg, duruk kahep fug. It henombawi re horog ha reg latfag famen hit neg de henenda haro deg lit henolok hum deg lahep,” ulug isi ebag.

²⁷Ai en TUHAN ele uruk kwit, “Aireg ma re Yeremia ao, haren abirangge etma An nomaliki fam hweag-esauk kahen famen de iren hat hele uruk on etma fu deberuk kamuhup fug. Ne, haren it wol-enepuk karuhun famen de iren enele onggo uruk kamuhup fug.

²⁸Anggere, haren it fam hweag-esauk kwit de, ‘Hit henunggul unuk aure At henakni TUHAN Allah anyo fam ele holoho duruk ale henerim deg lahep on. Hit de unggum henobam aik wahasimu hauhup on omano fam en mamul-dauk kahep fug on, hiren henakni TUHAN fam dipdeg welahep fug mundoho longgo isi, ne henele fam oho dindilduk kahep fug on’ ulug hweag-esakiyug” isi.

²⁹TUHAN ele uruk kwit, “Yaho hit ap homi Yerusalem on de fong watuk kamek! Henoruk bale folug de hwik-esakiek! Dom-dom anggolop kwe etma suni oba suni wilipuk kamek, An TUHAN en mundoho nolok berihikdeg, hit mundoho domako henobahaki anggere.

³⁰Ap homi Yehuda on de enolok siag on duswa. Kembu iren on An den nerim hauk kahi on omano re An nobam olma fousama emereg on atsi.

³¹ Mezbah misig eke unuk Tofet aire iren o Hinom donggoma, iren kembu enda ahayeg howag ulug enomaliki waroho yaldukmu fahet wutswa. Aire iren airoho dukwag ulug An den mel hweag-esauihik fugmen, ne aireg on etma re An nendama ulug oho ebet atuk katsi fug on famen duswa.

³²Ai fam de li andigim aik waruhu salim ai fam obale etare unuk Tofel uhup fug, ite Hinom donggoma uhup fug, ite Ap unggul eleg atsi mu uruk kamuhup. Kwenang etare kwenang amumu eke wereg fug anggere ap waratuk on sal-enepukmu uruk kamuhup.

³³It enebe wareg de suwe en mel olomene en nauk angge aruhu mu re amu angge en eke kwe bal-enebuhu fug.

³⁴ O kwenang su re mundoho lei iringgig on aruhu. Enahayeg en enele uruk on mel, hweap lombo enepukmu pesta duruk kwit uruk on mel de o kota Yehuda on mel ne o Yerusalem koboke kwe en mel An den eleho fohuk.