Read Ninia Yali YEREMIA 8 Bible Online

YEREMIA 8 - Ninia Yali bible

YEREMIA 8

¹Li ai fam de ap raja enowag solong nim, pemerintah enobahet Yehuda fam yabuk lehoma duruk katswa on enowag nim, imam mel nabi mel ap homi Yerusalem on fomane enowag solong mel de it sal-enepswaman feyaloho wilibi feseik wamuhup,

²aire kabog-debelug nikangge saluhup en de fug, ite ololo angge siag on hagdoho kwenangma embesehupmu welaruhu en duhup. Ap etma enowag solong etma re embesehupmu re iren enanggembu dewa ap debelug enenda hundig deheg, obahet deheg, apne weheg, kwe hweag-nesowag ulug heng deheg, duruk angge mo mel bigalem mel, sohwalanggen mel, etma enolohotma welaruhu.

³Ai fam de ap enunggul unuk mun enolok on au fam en enoluk wereg on An den di kwe su kwe del-fol esauihik mu wereg on etman de it enoluk wereg ale fahet enerim deg lit waratuk ale fahet neg de enenda deg lamuhup. Ulug An TUHAN en nele mundoho ihi” isi ebag.

⁴TUHAN en an nobam omaliki diroho hweag-esowag ulug hweag-nitsi, “Ap waroho ying-aman de nikangge inam alereg, ne ap kobokwe enenda nong-hong longgo uk men de nikangge wam alereg.

⁵Famen hit An nomaliki en hundig-hundig henunggul kwani-kwani An nobahalug neg lauk kahep etma re nunggwelug? Hiren de henanggembu anyo henengik bugdoho sen dalug lit de An nakit sombandoho waharuk ale fahet henerim deg lahep!

⁶An den fanik-fanoroho henele holduk kahi famen, hiren ebenamegdoho uruk kahep fug. Hiron ap misig en ulug oho re henolok fam duruk kahep ale etma fahet nenambik en ulug henenda wat-dauk kahep fug. Ite eke uruk kwit, ‘An nasiag de ke no?’ uruk kahep fug. Hit de no kuda en dog yapukmu kuruk kwit mon-halug kuruk hag, hiren oho kobokwe henemu en heradauk kahep.

⁷Suwe walu en de at nangging li em nohorukmu lamin ulug de oluk deg, ne suwe muluk nim, suwe hwelalim hag on nim, suwe murai nim en oho re obale wereg ma hihiloho amumu lauk ale fahet de enoluk deg. Famen hit An nomaliki re An den wene diroho diyug suroho diyug ulug hweag-hesauihik on anyo fu deberuk kahep fug.

⁸Hiren henambong si-se angge henele uruk kwit, nit nenenda wenggeleg on deg lit TUHAN awene melaleg nenoluk deg ulug uruk kahep ai ambi! Hakiek, An nawene diroho diyug airoho diyug ulug hweag-hesauihik on anyo it Allah omaliki en duruk ale nenoluk deg ulug uruk kwit hwenaroho duruk enap etman aham duruk ai.

⁹Ap wenggeleg ale neg deheg, enoluk mel hum deg enap hit henesahali kwe wereg on etma re enenggali aruhu. It de wenggelduk on longgo uhumu re nik-neng uhup. An den komo enepuk kahi on wauk ale enerim deg etma re, ketia re enenda wenggeleg nangginig on it enobam wereg e?

¹⁰ Airoho duruk ai fam de An den it eneyabuk etma re ap yabuk akni amu on fam og-ereheg, it enohwesi re ap amu on fam og-eseheg, duhuk. It enebe abirangge doron et log on et enonggwareg dung atuk on fahet kwe ohwal-ohwal heradauk. Ne, it imam mel nabi mel en famen oho re ap homi seiale hweag-esauk.

¹¹ An nomaliki enebe yebil wereg on omano iren de dorangge boruk. Iren uruk kwit de, ‘Ah ai embesein we dorangge en deg, mundoho fano deg anggere hakol eleg’ uruk. Famen airoho deg fug kweleg famen uruk.

¹²Yaho hit An nomaliki on, hiren de mun enalitno hauk ale omano neg duruk kahepma re henenggali hauk kam on! Famen hit henorohole ambum deg lit henenggali eleg. Ai fam de ap amu on waroho ying-atswa ai hag hit oho airoho ying-amuhup; ne An den unggum og-hesahukmu re hit henoluk welahep on ai mundoho eleg aik lahu.

¹³Ap en kwenang fam en anggen baloho kabog-duruk hag An den nomaliki oho airoho kabog-debesele ulug nenda boruk kahi. Famen de An nomaliki re e anggur mel ara mel anggen yihiruk eleg on hag deg, enggela famen oho mundoho sawet disi. Ai fam de An den ap bohon watlug it enanggwenang sebeleg welamag ulug hweag-esauihik ai. Ulug An TUHAN en nele mundoho ihi” isi.

¹⁴Allah omaliki en uruk kwit, “Nunggwelug niren amu ale duruk kahe fug? Nit de o kota elehet omamneroho oho kwe etma o oko lauldeg etma waramuhuk fano. Nit nenakni TUHAN Allah en nit de mundoho eleg amuhup ulug wene kong disi. Niren At fam siag duruhukmu Aren nit asig ap watuk angge nowag ulug og-nesasi.

¹⁵Mu re ketia re ap olok en duruk ale neg kweleg, niren alemaroho nenenda seroho nenobahakeg, hilinggi nenobahakeg, duhu ulug nenenda ebereg lit welamul aire fug.

¹⁶Nit nenaselei on de o kota Dan fam wereg; ne kuda iren on en ngin duruk on de mundoho holduk kahema o kwenang suno abirangge fam enakol neg aha. Ap selei on aire nit nenanggwenang mel, nenobam kota abirangge mel ap homi nenebe mel luluhun dukoho waharuk aire” uruk katswa.

¹⁷Airoho uruk katswa ma TUHAN ele uruk kwit, “Furiek! Ketia re An den kisu hit henesahali kwe mondorik waharuk kahi ai, kisu etma re aeg kamol wereg ma hwal-ale fam oho waruk fug on” ulug ebag.

¹⁸Nenda mun hesilduk kwit fili en lenggatuk hag napuk, nendama ik su-su wamburukmu hag deg ma hiling am fugdoho ouk hauk kahi.

¹⁹Holiek! o kwenang abirangge fene oba lenggu kululung eheik, an nunggul unuk on en oba yatuk kwit diroho uruk, “Akni TUHAN Sion fam on anyo re kema weregman? enakni raja anyo re kema wereg?” Ulug hein og-enepuk. Airoho urukmu it enakni raja en uruk kwit, “Nunggwelug haren kembu dewa mundoho siag angge ai fam en helenggen dimi-debelug alukwema horohole belabeg sahaun-duruk kahen? Haren kembu wutuk kwit duruk fam, nunggwelug An nenda Haren oukap kwelabe nobaharuk kahen?” Uruk.

²⁰Ap homi Israel on en enele uruk kwit, “Anggen balduk li mel, hebi laharuk li mel mundoho laha, famen nit de nunggwelug nenahap wendat atuk fug?” Ulug uruk.

²¹An nunggul unuk on ouk mun anggindoho deg en de an nenda mundoho sebe eheik; ande fong watuk kwit nenda fituk kahi.

²²Nangginig ale atsi fam ketia huli en an nunggul unuk on enaouk fano atuk fug? O Gilead[4] fam abirangge oma re, ouk hiling enepuk on mel obat mel eleg en duruk a?