Read Ninia Yali YEREMIA 9 Bible Online

YEREMIA 9 - Ninia Yali bible

YEREMIA 9

¹An nunggul su re ik sene ik en hoporoho yenggeleg on hag deg lalepman, ne an nil su ik sul angge hag deg ma ik wamburuk kwit neg welalepman de fano ahi! Airoho deg laman de ap an nunggul unuk on selei on en enowatswa on etma enobahet, nukoho mel hup anggo mel oba yag-enepuk kale angge aho.

²O ili angge leimu etma ap kwema lauk kwit nohorukmu eke wereg ma hweahaleman de an nunggul unuk on ahayeroho la ulug it an nunggul unuk on embeselug heye etma lele. It de ap hwenaroho neg duruk enap, ap dipdoho duruk eleg on kabog misig lohwaleg lit,

³seiale uruk ale fahet fik-fouk deg lit wereg on. O kwenang su abirangge fam de demdoho duruk on anyo re sahareg wereg fug, hwenaroho duruk on neg di kwe su kwe wereg. TUHAN ele uruk kwit, “An nomaliki en de enolok on bale fouk fug anggere duruk, iren An fahet nenakni Allah ulug fag-duruk fug,” ebag.

⁴Yakub en debag hagdoho iren oho enemu domog en enori seiale lal-enepukmu re, enori nim fam en oho re hebeloho neg durukam alereg, ne enori enamepsi famen oho re demdoho ulug bouk fug alereg. Wene seiale wene sahareheg, ap enabug siag on baleheg, dukoho re ap enemu domog lauk.

⁵It enebe abirangge en de lal-lal atuk mu, bekitdoho uruk on eke wereg fug. It enambilik de seiale uruk ale fahet obale wat-atsi, iren de siag on embesouk fug alereg. Iren de enolok ale on neg deheg, seiale on neg eheg, duruk kwit hundig-hundig durukmu re, iren de TUHAN anyo mundoho domako embeseswa.

⁷Ai fam TUHAN di ale su ale duk ale neg deg on anyo en uruk kwit, “An nomaliki aire il ebe on amag ulug de logam abut balduk hag An den nomaliki enabut bal-enebuhuk. An nomaliki mundoho siag duswa on etma fam An den keroho dihi ha alereg?

⁸It enele uruk alere dog weik bombaleg on en ap watuk hag, mundoho namelmel deg. It enambilik fam wilibik waharuk on de we enapenen ale neg uruk, It enele urukmu re mit deg ma ap enda lisuruk, famen iren sabu yep duruk men deg.

⁹Yaho, ap enunggul unuk aireg on au fam it duruk onggo An den enobam fouk fug angge welatmin a? An den de it duruk onggo enobam debesehuk; ulug An TUHAN en nele mundoho ihi” ulug ebag.

¹⁰Airoho ebagma an Yeremia en uruk kwit, “An de enggelangge o lei kwe mel, dom-dom fene mel, mundoho bug-liog isi, ne ap homi oho kwe etma fam lauk fug ale eta fahet oba yareheg, fong wareheg, duruk kahi. Wam endetuk on mel amu on mel de mundoho longgo uswama enele dereng isi ai fam oba yatuk kahi” irihik.

¹¹TUHAN ele uruk kwit, “Yerusalem de An den o molulukdoho lobag uhu on debehuk, olomene herag atuk mu debehuk. O Yehuda fam kota etma re mun dereng deg ma ap homi wereg fug mu debehuk” ebag.

¹²Airoho ebagma An den hein og-hauk kwit, “TUHAN nakni, o kwenang su ili angge lei hagdoho iringgigmu unggul ahap neg deg lamag ulug embeseswa ma ap en oho kwe etma eke lauk fug aire nunggwelug? Ap airoho deg ale etma fahet fu debouk ale oluk on eke wereg a? Haren de ap sa fam wene etma walug hweag-esa lowag ulug enamegdoho hweag-itihin?” ulug hweag-itihik.

¹³Ai irihikmen TUHAN en onggo hweag-nutuk kwit, “Etma atsi ale aire An nomaliki en an den hweag-esauihik ale omano fu debouk fug angge duruk katswa fam atsi. It de An nele holoho duruk katswa fug, ne An den diroho airoho diyug ulug hweag-esauk ale higitdoho duruk katswa fug.

¹⁴It de enombawi en mamul-enepfag hag de enenda omamne deg lit kembu Baal fam apne wauk.

¹⁵Ai fam de, An TUHAN di ale su ale dihi ha ale neg deg on, ap homi Israel enakni Allah anyo en duhuk ale su hesanggo holin: An nomaliki re kwenang al hag angge mel, asig angge mel nowag ulug og-esahuk.

¹⁶It de ap enunggul unuk it enombawi en oho ne iren oho enapeleg on fam og-esahuk. An den de ap tentara esan mondorik waharuk kwit neg weregman it enowaruhupmu An den mun felelengdoho eleho fesehuk” isi ebag.

¹⁷TUHAN di ale su ale duk ale on anyo ele omaliki fam uruk kwit, “O kwenang su fam atuk ale etma fu debeyek, ne ap oba yatuk on folo-folo wol-enebiek. It watlug suni oba suni wiliplug oba yatuk kamagdoho wol-enebiek,” ulug isi.

¹⁸Ap homi Yehuda on en uruk kwit, “Iren nit fahet oba suni fol-folo wilibukwagdoho hweag-esakiek, ninilue nenerohole fene dia liloho-laloho belabukwagdoho” uruk katswa.

¹⁹O Sion fam oba suni wilipuk kwit de, “Nit de mundoho eleg ahereg nenenggali aha. Nit nenanggwenang anyo niren embesehe, nit nenobam wirig molulukdoho lin deg” uruk katswa.

²⁰An den uruk kwit, “Yaho hit hwelani mundoho, TUHAN ele uruk on holiek! Enahwelani fam de oba suni mamul esakiek, ne hit henehebi fam de fong watuk suni hweag-esakiek.

²¹Waratuk on de jendela fololeg elekwe kwik wahareg ap raja ebe wereg ma etmano kwik laha; aren de omalik koboke kwe mel, ap sauwe kwenang ohoma mel en senggel enebeheik.

²²Airoho deheikma re alalangge kwenang emberimmu wereg hag, it enebe wareg di kwe su kwe ahum buag uruk; gandum anggen mundoho baloho folug kabog-duk fug angge embeselug lauk hag it oho airoho deg. Airoho TUHAN en hweag-esowag ulug eheikma hweag-hesauk kahi ai” ulug hweag-esauihik.

²³TUHAN ele uruk kwit, “Ap enggat on en de at enda wenggeleg deg ale fahet awonog aruhu hayog, ne ap omamne on de at omamne deg lit awonog aruhu hayog, ap dung on de at enggik wereg ale fahet awonog aruhu hayog.

²⁴ Ap sa en amu angge fahet eke awonog atmin boruk halug de aren An oluk deg lit fu-nobaharuk kwit awonog atuk kamag; ne An den mundoho-mundoho fahet nenda hundig enepuk kahi ale fahet nim An den unggum nim katukdoho duruk ale nim o kwenangma mundoho omamne deberuk kahi ale fahet at oluk deg ma awonog atuk kamag. Abirangge etan de An nendama nahayehap nobaharuk. Ulug An TUHAN en nele mundoho ihi” isi ebag.

²⁵TUHAN ele uruk kwit, “Li andigim aik waruhu salim An den ap Mesir on, Yehuda on, Edom on, Amon on, Moab on mel, ap ili angge leimu en enoruk horogdoho balduk on,[5] mel, unggum og-esahuk. It etma re enebe ap Israel on hagdoho enahap enenggalimu on balduk famen de it Israel on et it nim et enahap enenggalimu balduk ai fam eneg aleroho sali wareg on anyo iren holoho duk eleg angge re iren ap enahap enenggalimu on baleg eleg lit hag duruk,” ebag.