Read Ninia Yali RATAPAN 1 Bible Online

RATAPAN 1 - Ninia Yali bible

RATAPAN 1

¹O kota Yerusalem su atam mun anggiluk deg latsi on anyo, ketia mundoho diring-dereng deg, atam de ap enunggul unuk amu on sahalimu re at neg bogdeg latsi, ketia re hwe sohwe on hag aha. Endam de kota mun mit-mot deg latsi obam famen, ketia re amingming on debehesa.

²Hup hundig oba yatuk mu re, ilue orohole fene durulug wamburuk. It at fam enenda hundig duruk on misig en oho eke, at onggonduk fug. At ori on en yoma-debelug de ahamdoho at aselei on atuk.

³Ap homi Yehuda on de sebeloho fahat enusug lit enomamne hasimeg debeserukmu anggin anggoloroho hauk kwit, It enobam indipmu etmano embeselug wilip atswa. Ketia it enebere enobam hambukdoho enenda yuag atlug wereg lam fug mu, ap enunggul unuk amu on enesahali kwe etmano wereg. It airoho anggin anggolo hauk kweleg, it enaselei on en hukdoho kwelap enepuk katswa.

⁴Nukoho leho on fam de, hweap misig ulug oho eke Allah obam wirigmu etmano waharuk fug. Hwelani suni uruk hwelani etmano re ouk-bouk hauk, imam de anggolo-fanggolo hauk, o sokole humon fam etmano re ap homi eke wereg fug, o kota Sion anyo re fong waroho wereg.

⁵It neneselei on de iren nit sebeloho nenobaharuk kwit atlug, it enalong atuk. At asiag humdoho deg ma, TUHAN en de at anggin-fanggin humdoho howag ulug deberuk. Ap homi re sabu het-eneplug, mun feleleng eneplug de hwik enebik laukmu etmano feseik lasi.

⁶O kota Yerusalem unuk bogdeg welatsi ale anyo re, we o endam etma duswa ale ulug dindilduk on hag deg. O ap fam ap homi melal-enepuk on de no rusa siburu obok en omamne eleg deg hag enomamne eleg deg. Airoho deg lit de it eneselei on en mug-eneplug waharuk men ohore enomamne eleg atuk.

⁷Mundoho luluhun aheg, ouk-bouk heheg, disimen neg de, Yerusalem enggik weregdoho deg lit endam deg latsi ale etano ebet hauk; Airoho ebet hauk kwit de ap homi o etma on ap eneselei on enenggikmu atuk kweleg, ap misig en oho eke let-enebik wahausa fug boruk. It airoho siahap atuk ale anyo kumu halug, it enelesei on en unda yag-enepuk.

⁸Yerusalem de siag mun menape on neg duruk kwit, at onggwareg en singapdoho fahat-dauk. O endam ap homi en at along bolug leho foruk katswa on etmano en de, ketia at abulukwe kohouk deg ale anyo fahet enal belesim wat-esauk. At orohole wamburuk en de, obam siroho wereg.

⁹At ebe emereg alere mun enameg deg, famen at ebe fam aruhu ale fahet de aren fureberuk fug. At ebe mundoho luluhun-lalahan isi, famen ap misig en oho eke onggonduk fug. At aselei on mundoho enalong atswa ma, ai fam aren TUHAN en elaheg neowag ulug heng duruk.

¹⁰Angge di angge su angge mundoho at aselei on en del dausa. Airoho del daswareg iren de o Allah Obam wirigmu, it ap homi TUHAN omaliki fug on de o ai ilonggoma kuhup hayog ulug ili wereg ma anyo kurukmu at il esasi.

¹¹O ai fam ap homi wereg on de, mun anggilik-anggoloroho nauk on heradauk; Nit warahe ha no ulug nenoluk welamul en ulug de, it enangge onggo hum angge fam wauk on etmano re iren roti nim onggo bal-dauk. Yerusalem en hwiruruk kwit, “TUHAN nakni, an hil fu neakin, an anggin-fanggin hauk kahi ale su fu nobahain” uruk.

¹²“Yaho hit ap homi kwe fam lauk kahep on en, hinil halug fu neakiek![1] TUHAN en an nobam olok humon nobahasireg, anggin humon nobam fesi angge furiek? Ouk-bouk humon an den ketia hauk kahi au hag on de eke wereg behep?

¹³Bohol fam en TUHAN en indok belabik wahasi on en de, an nendamat han werag-werag nasi. Aren an nalukwema sabu yep debesi on fam de an nebe ilag irihik. Airoho atihikdeg wereg lit an nukoho hunduko etmano ouk hwelauk kamag ulug namu neg nobahasi.

¹⁴Aren de an nasiag omano abirangge wasireg, misigmu het-debelug, an nanggolobag ma sukni fesimu anggin en de an nomamne elehap napsi. TUHAN en de an nebe it na weim on enenggikmu og-esasimu, an den it nim wal-wal atlug nebe ohwal da fug ale atsi.

¹⁵An nautsi sehen anggen enap o au fahet ningdoho duruk enap omane re TUHAN en maben deg hag besi, Aren de an nautsi ap sauwe on mundoho eleg amag ulug de ap tentara lit-lat esasi. Ap en no anggur ahaik berelduk omano hag, Aren ap homi an nunggul unuk on mundoho sobit-sabat esasimu re luluhun atswa.

¹⁶Ai fam de nilue mundoho durulug wamburuk, an nebe onggone nobahakeg, nendama nahayeg kwelabe nobahakeg, duruk on eke wereg fug. It neneselei on mundoho yuag uswa ma re, an nunggul unuk on enangge mundoho eleg eneg aik lasi.

¹⁷An den nenggik lahabe folug let-nabukwag ulug duruk kahi famen de, an onggon napuk on eke wereg fug. Mundoho di kwe su kwe omano en de TUHAN en neneselei on mondorik waharuk; mu re it watlug an nowarik waharuk. An de ololo angge hwik-esauk on deberuk hag nobaharuk, ite it enesahalimu en me enape angge hag deberuk.

¹⁸Famen we TUHAN neg de demdoho on wereg, Aren wene melaleg isi on omano an den sahale folug dirihik. Yaho hit henunggul unuk amu on en de an nele henesanggo holiek, an anggindoho welahi ale ai neakiek. An nomaliki sauwe nahwelani duhum mundoho sabu het enepswareg, feleleng eneplug de hwik-enebik laukmu feseik lausa.

¹⁹An den nori horogdoho ninim hundig lahe on omano wol-enepihik, famen de iren an ohware napuk katswa. Ap imam mel it enunggul unuk au melal-enepuk enap mel, o kota koboke kwe omano waratswa. Nenoluk welamul en ulug nauk on hera dauk men waratswa.

²⁰TUHAN nakni! An fu nobahain, an nenda re mundoho si eheikdeg nobam fog eheik, an den endam kwasik ale duruk katihik on etmano fahet nenda wat-dauk kahi. Koboke kwe ap enowatuk on deg, o elekwe ap wareg wereg neg deg.

²¹TUHAN nakni! An den hobam anggilik-anggoloroho uruk kahi on etma hesanggo holin, ap en eke an onggon napuk on wereg fug. Haren an alemat amag ulug nobaharihin mu re, it naselei on etmano en de enahayeg hauk. Nukoho haren abug irihin on anyo wamag; an anggin anggolo hauk kahi eya it oho howag ulug debesein.

²²Iren enolok fam duruk ale etma fubi debesein, ne An den hat hil hanim siag duruk katihik fam Haren nobaharihin au hag it oho airoho debesein. An de ouk en nenek duruk kahi, Nenda hesilduk kwit kolo kwe yareg” ulug oba yatfag.