Read Ninia Yali RATAPAN 2 Bible Online

RATAPAN 2 - Ninia Yali bible

RATAPAN 2

¹TUHAN olok hasimeg durukmu, Sion fam de Aren heikap deberuk. Israel unuk andodogdoho bohol leho etle hag deg on anyo re, Aren kwenangma hwik-esa wambik waha. At TUHAN olok en deberuk li em de, At obam o Sion wereg on anyo oho re ohwale foruk fug.

²O Yehuda kwenang fam enggela lei wereg on etmano, Aren enda ha fug anggere mundoho luluhun esasi. At olok hasimeg de o kwenang ai fam elehet huk omamneroho oho on omano domag esaukmu re luluhun-lalahan uruk katsi. Kerajaan ai inim ne it o etma melal-enepuk on nim de, Aren mundoho sebele fesesimu re mundoho wendaleg on atswa.

³At olok leyeroho re, Israel on enomamne wereg on anyo mun somborebesi. Nit nenaselei on en nit nenowarik kwik waharukmu re, Aren nit let-nesa fug angge embesesireg welatsi. Indok ambulbul ulog-alog hauk kwit di angge su angge mundoho elehap deberuk anyo hag, TUHAN en nit nenebe abirangge airoho olok nenobam fesi.

⁴Nit de At aselei on hagdoho, Aren asehen lisi folug, Andog de nit ninibil leheik wahasi. Ap nit nenendama nenahayeg kwelabe foruk on etmano, Aren abirangge enowatsi. Aren de indok asisingag baloho lauk hagdoho, o kota Yerusalem suno fam olok en debesi.

⁵TUHAN de nit nenaselei on hagdoho atsireg, Aren Israel mundoho yeik luluhundoho ware fesi. Aren de elehet omamneroho hukdoho oho on mel, ap raja ebe wereg ma o bumbuk omano mel mundoho luluhun esasi, ne ap homi Yehuda on fam de fong anggolo siag humdoho howag ulug debesesi.

⁶Aren de At onggwareg obam, it At omaliki on kabog-dulug At apne waukmu anyo mundoho luluhun esasi. Ap homi en nukoho Sabat mel ne nukoho leho on amu on mel, enapeleg amag ulug debesi. At mundoho olok en angge anyo re it ap imam mel, raja mel de erimdoho embesesi.

⁷TUHAN en de mezbah mun amu eneg on anyo erim ulug embesesi, ne At onggwareg Obam anyo embesesi; o ai fak lehet oho on etmano re ap selei on en moluluk esowag ulug embesesi. O endam niren TUHAN obahet deheg, pesta deheg, duruk katuhukmu, etmano it nenaselei on enalong atswareg enahayeg en duruk.

⁸TUHAN en boruk kwit o Sion fam fak lehet oho on etma, mundoho moluluk duhuk besi. Fak lehet etma abirangge moluluk duhuk ulug, Aren mundoho foman-foman ilit debesi. Fak lehet oho on mel, ap lahalug kahalegma helep fam yatdoho wirig on mel etmano, ketia re mundoho meiyaleg angge kabog laharuk.

⁹Sokole humon hilinggig on etmano abirangge kwenang en salsi, e nunggulig sobang deg on etmano mundoho somborisi; raja ebe mel, it pemerintah fam yabuk leho on duruk enap mel de mundoho hwik enebik lausa ma etmano wereg. TUHAN Awene melaleg anyo mamul-enepuk fug; it nabi re TUHAN en husumbi eke hweag-esauk fug.

¹⁰O kota fam ap yain kain omano re enele uk fug angge kwenangma hwerieg wereg; ite fong waroho ulug de ul ununggulmu lahabe feheg, sum karung on wan-deheg debelug wereg. Hwelani duhum on ohore enunggul wamboroho kwenangma belabe folug wereg.

¹¹An bale fouk fug angge oba yatuk kwit neg weregman de nil mundoho fireheik, an nenda koloma yaroho nahut haeg neg aha. It nunggul unuk on omano airoho siag atuk mu, omalik doron nim, omalik fou on nim o kota koboke kwe en enape morurukmu re nenda mundoho wat-dauk kahi.

¹²Enebe fililing deg angge oba yatuk kwit enesingasi fam enesiburu mel enahaik mel og-nesowag ulug heng enepuk. Ap dog wareg on hagdoho koboke kwe omano waroho ying beya uruk kwit enaknisi-enesingasi waratswa on omano enouwaham waratuk.

¹³O Yerusalem, Kota Sion fam mundoho nenda hundig on suno, hat hebe luluhun ahen alere ik laut yenggeleg wirilig etman hag ahen. Hat henda onggonoho ulug, an den keroho dihi ha alereg? Hat anggin hauk kahen au hag deg airoho eke hausa on eke wereg fugmu, hat deg lahen ale aire ap eke en eke hwaloho hobahauk fug alereg.

¹⁴It nabi en hat hweag-hutuk katswa on etmano re, we seiale wene nim laleg ale nim neg uruk katswa. Iren de hat hasiag wereg on anyo ename foruk katswa fug, ai fam de hat hobabut aham duruk katihin fug ai. Airoho duk angge famen de iren hat hobam, we enele en laleg ale hat henda wakoho ale neg uruk katswa.

¹⁵Hat hebe abirangge mundoho luluhun atihin mu re, ap homi kwe etma lauk kwit de hat bulip hapuk. It enenduhun kweldoho yanderuruk kwit de diroho uruk, “O kota mun ebe on ap homi kwenangma abirangge en kota ai fahet enahayeg hauk on anyo ai a?” uruk.

¹⁶It haselei on mundoho en de enerim fam hat horohole kumu heauk, iren de hat unda yag hapuk kwit unggul luhutuk. Iren uruk kwit, “Kota anyo re niren mundoho moluluk debehe! Airoho debehuk ulug nangno hauk kwit welahe on anyo li ketia higit aik waha ai!” uruk.

¹⁷TUHAN en airoho henobahakuk ulug nit eberukwag ulug hweag-nesauk katsi on mel, Aren ebetsi on mel, anyo mundoho debeheik. Nite enda nenesa fug angge mundoho luluhun neseheikdeg, nit neneselei on de enalongap debeseheik. Nit airoho siag atuk mu nesalug, it neneselei on enahayeg dukwag ulug debeseheik.

¹⁸Fak lehet Yerusalem fam etma, TUHAN obam henele hwiriek! Ik nukoho hundig hup hundig wirig atuk hag hinilue liloho belabiek. Bale fouk fug angge oba yatuk kwit neg weregman, henebe mundoho henowag kororong ukwag!

¹⁹Hit henendama boruk kahep ale etma TUHAN fam hililoho lahap umukoho hwiruruk kwit de, hup andundu etma re ekenim-ekenim henoluk amuk. Hit henomaliki kwe unggut-unggut kwe siburu obok en enape moruruk on etma fahet Aren enda nesowag ulug, obam heng duruk kamek.

²⁰TUHAN nakni, it Haren anggin-fanggin enobam feseruk kahen on etma hil esalug furebesein! Haren de airoho eke debeserihin on wereg a? Enesingasi en de enomalik enenda hundig angge omano nauk, imam mel nabi mel de Hat hobam mun amu enegma omano en enowatuk.

²¹Ap sobal on et sauwe on et koboke kwe waroho ying beiya uruk, duhum sauwe karog elman warahesa. Hat holok nenobam foruk salim aire, Haren hahummu siag nesa fug angge it mundoho enowatihin.

²²Haren de nit nenaselei on niren nenakol enepuk kahe on omano enayonggo ferihin mu, nit maseroho omano en enolok fam pesta duruk. Niren kul-dauk kahe on mel nenenda enusug lahe on mel omano iren mundoho enowatswa. Haren holok nenepuk salim aire ap misig ulug oho eke lil atlug heye lausa fug.