Read Ninia Yali RATAPAN 3 Bible Online

RATAPAN 3 - Ninia Yali bible

RATAPAN 3

¹Allah olok an nobam aik wahasimu, ap mundoho anggilik-anggoloroho hauk kwit wereg on de we an.

²An nebe Allah en yit-yatma lit naplug lalug de, o mundoho heik koruag deg ma etma nobahaik lauk.

³Nukoho hundig omano an enda hundig nea fug angge, an nebe fam yeik hundig-handig nowatuk.

⁴Aren de an nayebil nebe fene omano mun anggolo ale deberuk, ne an nowag de mundoho sombo reheik.

⁵Aren de an nebe ouk anggoloroho welaheg, fong waroho welaheg, dukwag nobaharuk.

⁶An de ap o atam etma waratswa on hagdoho, Aren o mum deg ma welamag ulug lit napuk.

⁷Aren de sabu mun omamne on fam an het nobahasimu re, an wiliplug la ale kwe eke wereg fug.

⁸An let nabukwag ulug nenek-yobaruruk kwit heng dirihik famen Allah en an nele hol napsi fug.

⁹Aren de an nanggobokwe lauk kwe omano, helep lehet oko kwe bal napuk.

¹⁰At de no beruang en hagdoho nangno neauk, no singa en hagdoho an kahal napuk.

¹¹Airoho dulug an nebe sik-mug naplug lalug kwe dahandoho wilibik lalug an nebe dindil dendaldoho debelug embeseruk.

¹²Aren de asehen lisi folug, andog de an bising napmin ulug duruk.

¹³At andog de an nahap fam foroho nowarik wahareg, nenda anggen fologdoho nowareheik.

¹⁴Nukoho hundig etma ap homi an nebe fahet unda yag napuk kwit neg wereg, ne an nebere iren enalitno napuk on deg lahi.

¹⁵An nasiburu nauk on mel nahaik nauk on mel de, Aren we asig angge on neg og-nutuk mu nauk kahi.

¹⁶An norohole re Aren kwenangma dag nobahakeik, naeg de helep fam kwek neheikma naeg mundoho langgoroho laha.

¹⁷Airoho deg ma re mun anunuroho nenda se ha fug angge welahi, enenda enahayeg hauk kwit wereg ale etma re keroho hauk ulug de an mundoho napeleg atsi.

¹⁸An de nebe fam buhun ale omano mundoho eleg atsi, An den TUHAN fam nenda ebereg wereg ale anyo oko lasi.

¹⁹An dag watuk kahi ale mel nebe nong deg lahi ale mel eta fahet ebet halug de, asig angge en ap watuk on naukmu hag deg lahi.

²⁰Ai fahet hundig-handig ebetuk kwit neg weregman de an nenda anggin kwelap atuk.

²¹Airoho deg lahi famen de an den wene indip eke su ebet hauk li em de an nenda ebereg on anyo enam atuk:

²²TUHAN en enda hundig nenepuk on aire mundoho welaruhu, At enda kain fam nenepuk on aire elegam fug alereg,

²³o hubet hundig-hundig etma re keron neg enam atuk, demdoho TUHAN aire dipdoho neg duruk!

²⁴TUHAN aire an nonggwareg nangge we misig neg angge on deg ma ai fam de At fam neg nenda ebereg welahi.

²⁵TUHAN en de it ap At obam enenda ebereg wereg on mel, it ap homi At heraruruk on mel fam de enobam fanoreg wereg.

²⁶Anggere nit nenebe hambuk dalug nangno hauk kwit weregman de Aren nit let nenebik waruhu fano;

²⁷nit nenebe sauwereg li em en hambuk halug duruk ale mamuluhuk fano.

²⁸TUHAN en nit nenobam anggin-fanggin nenobaharuk li em de nit nenemu domog hwerieg wereg lit nenele eleg angge bok welamuhuk fano.

²⁹Fobik atuk ale fahet nenenda ebereg wereg ane hag deg anggere, niren sebele fahat dalug nit dehe ha fug alereg ulug welamuhuk.

³⁰TUHAN en de li mundoho-mundoho etma nit erim en embesehureg welaruhu fug anggere,

³¹ap en enenggik dagdoho nenowatuk kweleg famen oho, bulip nenepuk kweleg famen oho re nenebukwag ulug embeselug welamuhuk fano.

³²Aren de nit nenebe enda hundig nenepuk on aire mun huli-huli wereg fug on fam nenepukmu re, Aren ouk-bouk nenobam og-nesalug en ohore enda nenepuk kwit wereg.

³³Aren de enda fano fam nit ouk-bouk heheg, nenenda fu en deheg, dukwag ulug nenobaharuk.

³⁴Nit nenoluk anyo sabu het deg ma omano anggin hauk kwit wereg halug,

³⁵ne ap en dipdoho duruk eleg fam wene aham faham esauk kwit,

³⁶TUHAN en nit nenangge nenonggwareg en on ulug og-nesauk on omano eleg atuk famen ohore, TUHAN demdoho oluk deg ma re fu nenobaharuk kwit wereg.

³⁷TUHAN endaman ai amag boruk eleg kweleg de, demdoho ap homi ai on fahet di on su on ulug duk fug alereg.

³⁸Fano ale siag ale duruk on etma re, TUHAN diek uruk halug neg duruk.

³⁹Ap asiag[2] duruk onggo unggum og-utuk kweleg, nunggwelug ngururuk kwit neg wereg?

⁴⁰We niren nenebe keroho welahe ulug hwale fahat dalug de, TUHAN Allah boholma wereg on anyo akit sombandoho waharuk kamul. Niren nenenda sok husi folug somban ukohon,

⁴¹

⁴²“TUHAN nenakni, nit de Hat hele sahale folug siag duruhuk, ne Haren nit nenesiag hapelehapdoho nenobaharihin fug.

⁴³Nit nenebere Haren sik-mug neneplug lauk kwit Haren binggi nenowatihin, hat henda nesalug nenepuk kahen on anyo re hat holok sahalimu etma heraho ferihin.

⁴⁴Hat holok aire anggulog mun heik on hag deg ma re, niren somban uruk on de ai foroho lahaik wam fug alereg.

⁴⁵Ap homi o kwenangma suma abirangge inil hanim nit de Haren ololo angge hwik-esauk on hag nenobaharihin.

⁴⁶Nit de it neneselei on mundoho en enal belesim wat neseheg, unda yag nenebeheg duruk;

⁴⁷nite alemat atuk on mel siag atuk on mel nenobam aik wahasimu, nit nenebe ohore anggin deg ma re nenakol nim welahe.

⁴⁸Ap homi an nunggul unuk on omano mundoho siag ahesama re, an nilue re ik wirig atuk on hagdoho wamburuk.

⁴⁹An de bale fouk fug angge oba yatuk kwit neg weregman,

⁵⁰nenakni TUHAN hat hebe boholman nit fu nenobahakun.

⁵¹Nit nenahwelani o kota niren on fam oma esalug de an nenda mundoho hesilduk.

⁵²Wene indip eleg kweleg it naselei on an enerim napuk kwit suwe mutlug lauk hagdoho an mug naplug waharuk.

⁵³Bohwe habulig iringgig on fam an nebe nolukengge hwik nealug an nebe anyo helep en sal napil laharuk.

⁵⁴Airoho deberukmu ik yenggeldik laharuk kwit nunggul huli laharukmu, an den boruk kwit, ‘An anyo ketia hulien noluk eleg atuk kahi boruk kahi!’

⁵⁵TUHAN nakni, an den bohwe ele mun yaron ilonggoman Hat wol hapuk kahi.

⁵⁶TUHAN nakni, Haren an let nabin ulug heng habihi on ai fahet Hat hesanggo lat da fug ulug heng hapuk kahi. Ai fam de an den somban ihi on ai Hat hesanggo holehendeg Hat hebe an horogdoho watlug; Haren uruk kwit, ‘Howag elek duk fug’ ulug hweag-nerehen.

⁵⁷

⁵⁸TUHAN nakni, an nawene fahet Haren hwale nobahaken, an noluk anyo Haren nahap wendare nobahaken.

⁵⁹It selei on an enerim napuk on en enolok fam duhuk ale ulug weim abug uruk on mel, iren enolok fam duruk on mel Hat hil neauk kahen. Ma re TUHAN nakni, an nawene ai fahet Hat nibil amin.

⁶⁰

⁶¹TUHAN nakni, an sebeloho nobaharuk ale aire Haren neauk kahen; iren duhuk ale ulug wene matuk on de Hat mundoho holuk deg.

⁶²Iren nukoho hundig etma an nobahet wene matuk kwit wereg, an nebe alema re nobahaukoho re duhuk ale ulug enele siag ale matuk.

⁶³O hubet en angge hupmu huli etma, ande iren unda yag napuk on atuk kahi.

⁶⁴TUHAN nakni, it aire iren duruk ale eta higitdoho unggum og-esakin,

⁶⁵Haren hururung enebin, ne it enebere enenda mundoho wat-dauk kwit welamag.

⁶⁶It enebe sik-mug eneplug lalug elehap debesehunmu, o kwenangma oman mun felelengdoho eleg amag” ulug somban ebag.