Read Ninia Yali RATAPAN 4 Bible Online

RATAPAN 4 - Ninia Yali bible

RATAPAN 4

¹Emas ombagbag helag-felag angge duruk on suno kun deheik, helep o Allah Obam wirig on anyo koboke kwe del-fol deg.

²Endam de hwelani omalik o Kota Sion on de emas onggo wereg on hag deg latswa, famen ketiare waruk helep on fam laleg on hag debeswa.

³No olomene serigala en famen ohore omalik ag mondotuk, famen de an nomaliki suwe unta o leimu en deg hagdoho enolok deg.

⁴Enomalik fou ag mon-enepuk elegma enenda ahe en waratuk, omalik doron enasiburu nauk on heng uruk famen ap it og-esauk on eke wereg fug.

⁵It etma eneitogdoho nauk angge unduk buhun on neg nauk on omano, enebe di angge su angge ebe on neg wereg ma wereg on omano, ketiare lobo-lobo anggeril ololo angge hwik-esaukmu etmano nauk on heradauk, ne enebe re koboke kwe omano waratil lauk.

⁶ Ap homi Edom enap fam ap homi en eke diroho suroho duk elegman unggum Allah enggik en il misiham homogdoho og-esasi on de maben deg famen, an nomaliki neg de unggum anggindoho og-esasi.

⁷O endam de nit nenowesi melal-nenepuk katswa on etma re no kapas il sing eleg angge kut deg hag deg latswa, it enebe re enomamne doho ning deg lit, enobam ouk eleg angge fano deg latswa.

⁸Famen ketia it enorohole re sing deg alere sinduk de maben deg famen it neg de mun sing elemik[3] deg, it enebere koboke kwe etmano ilang-bulang urukmu re ap homi eke fubi debesouk fug alereg. E ahap mundoho wirik kelog duruk on hag de, it enahap de enowag fam bug kelog deg.

⁹It de enangge nauk on elegma re, enebe dohen-dohen waratuk, it ap dog ambiangman waratuk on etma re fano famen de siburu obok en waratuk etma neg de anggin deg.

¹⁰ Yaho anggin on an nomaliki enobam aik wahasi on aure mun nik aleroho atsi, homi enenda sakoreg lit duruk on omano en famen enasiburu nunggwangge nak ulug de enonggwareg enomalik osoko nauk angge oma?

¹¹TUHAN olok wereg on anyo mundoho hilili fesimu, o Kota Sion anyo harep al obaleroho nasi.

¹²It ap raja wereg on enasahalimu eke en mel, ne ap homi o kwenangma wereg on enesahalimu misig eke en mel, o kota Yerusalem fak lehet oho on sokole ai fam de it enaselei on kuswa re fug boruk kamuhup.

¹³Famen it ap imam mel nabi mel enesiag fam de ai on mundoho atsi. Iren de ap kwasikdoho duruk eleg on etmano enowatswa ma atsi.

¹⁴Ap inil bug on koboke kwe fag-fag angge noruk hag, ap kota Yerusalem fam melal-enepuk on etma re airoho deg. It enasum de ap mep en mun sing deg ma re, ap en ulug oho bal hauk ale enerim deg.

¹⁵Ap en uruk kwit de, “Hit de henebe emereg lahep, nit sen nesa fug, suman lakiek!” uruk. Mu re it enebe o dag watil it enunggul unuk eke on weregman de eke on wereg ma lauk famen de ap misig en ulug oho suma yugdoho welamek ulug hweag-esauk fug.

¹⁶TUHAN de At onggwareg en neg omaliki omano del-fol eseheg, imam omano enalong bouk eleg angge debeseheg, it melal-enepuk on enda hundig esa fug angge welaheg, duruk kwit Aren it furebeseruk fug.

¹⁷Nit kwe ke en let-nenebik watmisi ulug ninil youregman neg ninil ouk deheik, niren de it enunggul unuk misig eke en furoho let-nenebuk fug on famen iren let-nenebukwag ulug ebereg welahe.

¹⁸Nit wiliplug laukmu it neneselei on en inil og-nenepuk en de nit wiliplug kwema lauk kahe fug. Nukoho nit neneluk wereg ale fahet de mun dip ik waha, nit waratuk ale fahet mun horog aik waha.

¹⁹Suwe rajawali en darulug lauk alere andomog deg hag famen it nit mug-neneplug lauk on en mun folo-foloroho lauk. Iren de dom kwe omano nit mug-neneplug lalug, lei kwe omano en de nit kwe bal-nenepuk.

²⁰Iren de ap raja TUHAN en momaleg on anyo senetswa, ap niren boruk kwit nenoluk og-nesa alereg, ne nit neneselei on famen de aren along bal-nenebuk alereg boruk kahe on anyo iren senetswa.

²¹Yaho hit Edom henap mel Us henap mel etma, hiren duk alereg li etma unda yareheg, henahayeg deheg, diek! Anggin on aire hit henobam oho aik waruhu mu, hit henebe siomo duhupdeg de henonggwareg en henabuluke kohouk-dauk kamuhup.

²²Sion de aren siag disi on fam, ketia unggum obam fesimu hauk kwit wereg; ketia re nit TUHAN fotog neseheg, sabu hetdoho hwik enebik laukmu og-neneplug laheg, duhu fug. Famen de hat Edom ao, hat de TUHAN en unggum og-huruhu, hat hasiag duruk kahen on etma mundoho ename fohu.