Read Ninia Yali RATAPAN 5 Bible Online

RATAPAN 5 - Ninia Yali bible

RATAPAN 5

¹TUHAN nenakni, nit nenobam atsi mu hauk kahe ale au fahet fubi nenobahain, nit mundoho sebeleg on hag atuhukdeg welahe ale ai fahet hil fu nesalug kumu nesakin.

²Nit nenangge nenabinggi angge omano re ap amu on enenggikmu atsi, nit nenobam wirig de ap bog on en kulug wereg.

³Nit nenaknisi re it nenaselei on en enowatswa, ketia nit nenesingasi sohwe wereg, ne nit de wetien on welahe.

⁴Nenahaik nauk on mel nenahan yalduk on mel de niren onggo bal-dauk kahe.

⁵Nit de wam fam duruk hagdoho yabuk anggin on dukwag ulug hweag-nesauk, nit mundoho lilipna nenepuk famen kel wat-dowag ulug hweag-nesauk fug.

⁶Nit de o Mesir lalug heng-heng on aik lauk kahe, nit nauk on de Asyur on fam heng enebik lauk kahe.

⁷Nit nenambu-nenombasi siag duswa on ketia enebe eleg atswa; famen de it enasig duswa on fam ketia nit ambiangma hauk kahe.

⁸Nit de ap enamingming angge nim higit on omano en melal-nenepuk; mu re ap it enalong apman fiselaroho wilip nenepuk on eke wereg fug.

⁹O kota dag fil de ap watni neg lag-wag uruk, mu re niren nauk on hera da alere re nenowaruk ulug duruk kahe.

¹⁰Nit de nenasiburu obok en anggin anggolo haukmu, atlug de nit nenahap de indok ahanhan en hag fulung duruk.

¹¹Homi o Sion homi omano re ap en enomamne hasimeg ininim seberusa, hwelani duhum o Yehuda hwelani omano re o sili dot deg kwe omano en emere feseswa.

¹²Nit nenowesi melal-nenepuk on omano re ap en sen enepswareg e fam borebeseswa, nit nenaknisi sobal de mot-debeseswa fug.

¹³Nit nenomaliki ap sauwe re anggen yihig sahaloho belapukmu omano yabuk dukwag ulug enomamne hasimeg hweag-esauk, nenomaliki ap omalik de e haruruk on omano anggin en sebel enepuk.

¹⁴Ap sobal on de o kota sokolma kabog-duruk katswa hag kabog-duruk fug, ap sauwe on enesahali kwe omano en binggong ele eke uruk fug.

¹⁵Suni yunggulduk suni omano ahamdoho oba suni atsi mu re, nit nenahayeg wereg on anyo mundoho longgo isi.

¹⁶Nit nenambono hauk kahe on de mundoho eleg atsi, nit siag duruhuk fam de mundoho alemat atuk kahe.

¹⁷Dom Sion anyo fam de dereng-dereng uruk ne ap en mundoho embeseswa; ma re etma olomene neg lag-wag uruk. Ai fam de nit mundoho nenobam song isi, nit oba yatuk men neg de ninil obuk eheik.

¹⁹Famen de nenakni TUHAN hat neg de mundoho halong wereg laruhun, ne Hat de li mundoho-mundoho fam melal-nenepuk kwit welaruhun.

²⁰Haren nit li anunuroho fotog nesauihin deg welahen oma ambi? Haren de li mundoho fahet nit hapeleg atsi a?

²¹TUHAN nenakni, Haren nit nikangge sombandoho Hat hakit hondog neneplug nenobahaik ma; nit oho sombandoho Hat hakit wamuhuk! nenebe endam deg latuhuk hag deg lamuhuk en de hwale nenobahain.

²²Ite Haren nit mundoho fotog nesauihin men a? Haren nit fam holok nenepihin on aure huli-huli wereg fug a? 25