Read Ninia Yali YEHEZKIEL 1 Bible Online

YEHEZKIEL 1 - Ninia Yali bible

YEHEZKIEL 1

¹ Tanggal lima bigalem ohwaneg on fam tahun tiga puluh [1] wereg kweleg, ne hun Raja Yoyakhin anyo sabu hetdoho hwik dik lausa huli en de tahun foap on fam deg kweleg, an Imam Yehezkiel hun Busi amloho anyo re o Babel en Ik Kebar aegma etma ap Yahudi on sabu hetdoho hwik-enebik lausa on fomane nim welatihik. Airoho weregman fetagdoho etano bohol healsimu an den na og-hauk hag fam Allah deg ale hawihik. An den holdukmen de TUHAN ele nobam urukmu holdihik, ne At along wereg ale anyo omamne degma hawihik.

⁴An nunggul leko fu hauk men de, utara fil etman, sielu firulug waharukmu hawihik. Anggulog hum angge en latil waharuk kwit, bohol aluluk kwe etano re seleg humon fisatil waharuk katsi. Oweal etma lebeg-lebeg haukmu, amumulite, perunggu amumulit hag angge yebelelang urukmu hawihik.

⁵ Anggulog ai anggelegma etma kerub[2] ohwan angge, ai enoluk ap homi hagdoho wereg on esawihik,

⁶famen de it enebe fam hundomog de enorohole re ohwan heg degma, enahwerabul de biren heg deg latswa.

⁷Eneyog de bekit biligmu no perunggu bekdoho seng deberukmu deg hag amumulit deleng uruk katsi, eneyog ahap de, no banteng eyog ahap hag omamne angge kwelabeg latsi.

⁸Orohole ohwan ahwerabul biren angge omano deg kweleg de, it enahwerabul apmane domog de enenggik de ap homi enenggik hag angge kwelabeg latswa.

⁹Enebe hundomog enahwerabul sehelet misig on anyo re wirilig mu re, enahwerabul atog fam de eke en eke ahwerabul bal hauk men duruk katswa, airoho durukmu re it oluk wereg angge ohwan etano en de, unggut ohwan hilinggi foruk katswa, ne it lahe enebe lebe duruk kwit halug de it enebe domog de enden da fug angge re bekit enelukwe fil neg hwal dauk katswa.

¹⁰ Eneluk wereg on ohwan ai enebe hundomog enorohole ohwan etmano hundomog aham deg faham deg welatswa, enelukwe fil de ap orohole on, ombandu bekit fil de, singa orohole on, ombandu foma hware fil de no banteng orohole on, ambol fil de suwe ikwesahop orohole on deg latswa.

¹¹Enahwerabul misig eke re kolo kwe etlema lang degma re, ahwerabul atog en de it enoluk wereg on foma fil on ahwerabul atog bal hauk katsi, ne ahwerabul wut misig[3] eke re siroho re ebe saleg latsi.

¹²Onoluk wereg on ohwan angge etano en de enerohole unggut ohwan ilit doho fu degma re, etman ke fil laul ulug wenggelduk halug enorohole hundomog wereg ale etanoroho lauk katswa, eke fil lakoho enebe hebel hauk katswa fug, enorohole wereg ale etano muko neg lauk katswa.

¹³ It eneluk wereg on etma enesahalimu[4] etman de indok nonggwalegman indok anggen fil-fil duruk hag, ite esahe ambulbul ulog duruk hag, ulog durukmu, nahul am fug ale duruk katsi. Indok ai ambul bul ulog alog hauk kwit asisinggag baloho wilipuk katsi.

¹⁴It eneluk wereg on etma re fol-folo ale neg duruk kwit, oweal lebeg uruk hagdoho lag-wag uruk katswa.

¹⁵ An den abirangge etma duruk ale fahet fureberuk kwit weregma, an den hauk men de eiyog birim ohwan angge kwenang emberimmu wereg latsi, airoho weregma re birim misig de oluk wereg on[5] misig aluluk wereg laikoho deg latsi.

¹⁶Birim ohwan ai orohole re misig ale degma helep weliom permata amumulit deleng uruk hag duruk katsi, ne birim eke bik bulmu etma diahan deg latsi.

¹⁷Airoho degma re eyog birim etmano re unggut ohwan higitdoho omano fene lauk katswa.

¹⁸ Birim etmano masereg kwe omanore il anggen[6] neg hopo dik deg latsi.

¹⁹Onoluk wereg on etma ekema-ekema it laul boruk kwe omano laukmu re enoluk wereg on etmano en omamne enepukmu atlug deg birim etma laukmu re enombolim lauk katswa. It enoluk wereg on omano lahe lebe-lebe koloma laharuk em oho, ne bok atuk em ohore, eyog birim omanore enombolim neg lauk katswa.

²² It eneluk wereg on etma enenggulmure, helahe no kristal amulit dereng uruk angge hagdoho diahan deg latsi.

²³Helahe anyo apmare it enoluk wereg on omano enahwerabul enebe hulilib deg on omano fam lam duruk kwit eke ahwerabul bal hauk katswa, ai en eke fam de enebe hulilip doho kwelabeg latswa.

²⁴ It lahe darurukmu halug de, an den ele holdukmu ahwerabul aplohok fun duruk on hol haukmu re, ele re ik hul solu mondorik wamburukmu ele hag deheg, ne ap tentara esan humon laukmu eneyog aplohok dap-dap uruk hagdoho deheg, ne Allah Mun Along wereg on anyo ele urukmu hag deheg, durukmu hol hawihik. It lahe daruruk ale embeseruk halug de enahwerabul omano siroho foruk katswa,

²⁵famen de it enenggul furoho helahe baleg on emberimmu etlemano en ele uruk on holduk katihik.

²⁶ Helahe baleg on anyo emberim mu re takhta huratuk angge orohole hag angge eke helep nilam on fam wirigmu re, emberim mu re ap hag angge eke hweriek latsi.

²⁷ Emberim fil etlema re no perunggu indok ambulbul sahalimu weregma hag helag-felag angge uruk katsi. Apma fil de seleg ombagbag helag-felag angge duruk katsi,

²⁸ne orohole re aham deg faham deg uware deg hag deg latsi. Aire seleg helag felag angge on Allah wereg ale unug nitsi alere ai.