Read Ninia Yali YEHEZKIEL 10 Bible Online

YEHEZKIEL 10 - Ninia Yali bible

YEHEZKIEL 10

¹ Ai en an nil de helahe baleg angge it kerub [18] enenggulmu wereg angge fu heheg, ne eke takhta huratuk angge helep nilam on fam buhun deg hag angge hawihik.

² Ai en Allah ele ap sum linen wandeg on anyo fam uruk kwit, “Eyog birim kerub enapma wereg on sahali kwe etma kwin, kulug de indok anggen dorangge lohon okore, indok anggen ai kota ai fam del-foldoho kwik esakiuk” urukmu hawihik. Ai isimu ap anyo en higitdoho duruk mu, an den fureberihik.

³Ai en at kwik laukmen de kerub omano re TUHAN Obam wirig anyo foma selatan fil unduhukmu, hena misig eke moholug TUHAN Obam wirig on anyo abirangge fam nim ambe lilimol baleg on ilonggoma nim hopo deberuk katsi.

⁴TUHAN ebe wereg aleroho enegdoho ulug de seleg kerub omano fam en ulog haukmu re o TUHAN Obam wirigmu kwik laukmu etmano hihiloho lauk katsi, airoho durukmu atlug de ambe lilimol fam etma seleg ambogbag duruk katsi.

⁵Kerub etma enahwerebul aplohok lambumbuk hauk on de, Allah Mun Omamne wereg on anyo ele urukmu hag ambe lilimol dag fil en holduk katswa.

⁶TUHAN en ap sum linen on wandeg on anyo fam indok asing kerub eyog birim apma wereg angge omano wowag ulug mingming disimu re, ap anyo kwik lasireg de eyog birim duruk angge etano misig eke aluluk unduhuk latsi.

⁷Airoho unduhukmu re kerub etmano misig eke enggik indok nonggwalegma it enesahalimu wereg angge anyo fam kwelabe fesireg, indok aro omano foma lohon oko ap sum linen on wandeg on anyo fam og-utukmu hawihik. Og-itsimu re ap anyo en wasireg lasi.

⁸An den nil hauk men de kerub etma enahwerabul apmare enggik ap enggik hag angge wereg latsi.

⁹ An eke nil haukmen de it kerub etma ohore hundomog birim misig heg enombandu mu welatsi. Eyog birim ohwan eta ebe ambiregma no permata il mun ebe on hag ambogbag amumulit deleng uruk angge deg latsi. Enebe hundomog de eyog birim eke amu on ebe bik-bul etma diahan deg latsi.

¹¹Airoho degma it kerub etma enebe kwe uluhun ohwan fam lauk katswa. It enebe aham da fug angge kema fil laul ulug enenda boruk ale higitdoho lauk katswa.

¹² It enebe abirangge fam enombolma nim, enenggikmu nim, enahwerabul fam nim, eneyog birim fam etma nim, de inil abirangge hoporoho wereg neg deg latsi.

¹³An hol haukmen de eyog birim etma re unuk, “Hol sielu” uruk katsi.

¹⁴ Kerub enebe hundomog de enorohole ohwan aham fahamdeg latswa. Orohole atam on aire no banteng orohole deg latsi, bireneg on de ap homi enorohole deg latsi, henahaneg on de singa orohole deg latsi, ohwaneg on de suwe ikwesahop orohole on deg latsi.

¹⁵Kerub etmare atam Ik Kebar ikma an nil esawihik on omano. Hundig-hundig kerub etma lebe duruk mu re, enahwerabul wirilug de darulug koloma lahakeg, bok aheg durukmu, eyog birim omano oho re kerub omano en sebeloho weregma atlug de inim lauk katswa.

¹⁸Airoho durukmu seleg TUHAN ebe wereg ale eneg doho ambogbag duruk on etmano sok TUHAN Obam kurukmu anyo embeselug kerub enemberim mu oko lauk katsi.

¹⁹An nil esaukmen de it kerub etmare enahwerabul leko kwenang embeselug daroho laukmu re, eyog birim etmano oho inim lauk katswa. Airoho laswareg de it enebe sokole o TUHAN Obam wirigmu kwik lauk on timur fil wereg on anyo fam bok atuk katswa, ne ombagbag duruk angge anyo re it enemberim mu welatsi.

²⁰Airoho weregma re kerub etma re atam Ik Kebar aegman Allah Israel on en apma weregma an nil hawihik on anyo ulug ebet hawihik.

²¹Kerub etma hundomog enorohole re ohwan, enahwerabul de biren wutdoho biren welatsi, eke ap enenggik hag angge ahwerabul apma etma wereg latsi.

²²Kerub etma enorohole[19] re an den Ik Kebar aegman nil esawihik on omano enorohole hag deg latswa. Enebe domog de bekitdoho enelukwe fil lauk katswa.