Read Ninia Yali YEHEZKIEL 11 Bible Online

YEHEZKIEL 11 - Ninia Yali bible

YEHEZKIEL 11

¹Ai debelug, an anyo Allah heime en haroho TUHAN Obam wirig sokole timur fil yendegma etma nobahaik lasi. Etman an nil hauk mende, ap enebe 25 en weregma etma enesahalimu re ap enunggul unuk ai melal-enepuk on enebe biren enap, hun Azur amloho Yaazanya ha, hun Benaya amloho Pelaca anyo ha wereg latswa.

²Airoho weregma Allah ele an hweag-nutuk kwit, “Ap homi waratuk on su yei, eyare ap o kota su fam wene kwasik ale wenggeloho feheg, wene komo enenda firoho feseruk ale hweag-eseheg duruk enap.

³Airegma anggere, ap homi waratuk on su, unggum an den it og-esahuk ale fahet wereg on ai haren it hweag-esakin. Aire iren diroho uruk ale ai fahet, ‘O suma we il misig[20] welatlug niren o suma nikangge wuruhuk. Kota su re ikwag, ne nit de ino ilonggoma yohwareg on welahe. Nit de waruk ai ilonggoma welahema angge re nit indok en han werag nenepukmen nenahap wendareg welahe halereg’ ulug uruk ai fam” ulug isi.

⁵Ai en TUHAN Aheime nobam aik wahasimu, TUHAN en omaliki Israel on omano fam wene hweag-esa lowag ulug an mingming napuk kwit, “Yaho unggul unuk Israel on yei, hiren uruhup ale mel melaloho foruhup ale mel ai an noluk deg.

⁶Airoho hiren ap homi humdoho enowatuk katuhup fam, o kota kwe fene ap wareg neg hopo isi.

⁷Ai fahet ulug de An TUHAN Mun Leho welahi on en nele hit fam uruk kahi: Demdoho kota sure waruk dangge on wereg famen, ino ilonggoma yohwareg on de hit de fug, ite ap wareg hiren wat-enepuhup on etma! Hit de An den o kota su fam en muko wilip henebuhuk mu wilip amuhup!

⁸Karog fahet de henakol deg lahep a? An den ap karog walug henowarik wamag ulug mon-enebik waruhuk.

⁹Hit de an den o kota man og-heneplug wilibuhuk deg ap bog on og-esahuk. An den unggum waratuk on hit henobam fohuk.

¹⁰Hit henenggwenang miningen man folok heg henowaruhup mu, hiren an TUHAN anyo hit heneluk amuhup.

¹¹Hit kota su ilonggoma lioloho welamuhup fug, waruk ilonggoma ino angge yohwareg wereg hagdoho wereg lamuhup fug, kwenang Israel fam en di kwe su kwe wereglamuhup on etma an den siko muko unggum og-hesahuk.

¹²Ai fam de hiren an TUHAN anyo henoluk aheg, ne wene melaleg an den on omano mel, diroho diuk suroho diuk ulug an den irihik on omano mel embeselug unggul unuk amu on heneluluk kwe walinggoho wereg on en enawene melaleg omano mutlug laheg, duruk katuhupmu unggum og-hesauk en henoluk amuhup” ulug hweag-esoag ulug hweag-nitsi.

¹³Airoho isimu an wene ai fahet nele uruk kweleg, hun Pelaca anyo daloroho wamburuk kwit waratsi. Airoho waratsimu an norohole belabeg sahaun dirihik deg hwiruruk kwit, “Yehei TUHAN Mun Leho welahen on nakni, Israel on apuhuno eiya abirangge haren enowatuk kahen a?” irihik.

¹⁴TUHAN ele eke nim an hweag-nutuk kwit,

¹⁵“Ap homi waratuk on su yei, hat nim hori nim hele waregma welahep on etma fahet, ap homi Yerusalem wereg on en enele matuk kwit enele diroho uruk, ‘Ap hele wareg hwik enepswama wereg on etmare o Yerusalem suman de TUHAN obahet duk ale re mun yateg ma wereg. Kwenang Israel on en ai TUHAN en nit og-nesasi on’ uruk.

¹⁶Ai fahet de an den iren dukwag ulug uruk kahi ale su hori hele waroho weregma etma hweag-esakin, an den at it enebe og-eneplug waharihik deg o yatma unggul unuk unggul unuk angge sahalimu, it enanggwenang fene etma del-fol esawihik. Famen it enebe etma wereg kweleg an ininim welaruhuk.

¹⁷An TUHAN Mun Leho welahi on nele uruk kwit diroho uruk kahi, an den it o kwenang amu on fene etma del fol esawihikmu weregma etman andog enebuhuk deg sombandoho kwenang Israel og esawihikmu etmano feseik waruhuk.

¹⁸Airoho og-esahukmu it enobam waharuk kwit de, iren kembu abirangge heimaldo on mel mun siag on mel iren hweag-dausa on etma hwik esahup.

¹⁹ It de an den enenda keron mel, enebut keron mel og-esahuk. Enenda helep omamne hag deg on ai an den oko wahuk deg obalma an nele holoho duruk on og-esahuk.

²⁰Airoho duhukmu, iren an nawene melaleg mel diroho airoho duhup ulug melal-enepuk on mel etmano furebelug duruk kamuhup. It an nomaliki on amuhupmu, an it enakni Allah on aruhuk.

²¹Famen de ap homi kembu heimaldo on mel mun siag on mel mot-duruk ale enambono deg on mel de iren enebut kwasik ale duruk ai fam de an den unggum og-esahuk” ulug isi. Airoho ulug TUHAN Mun Leho wereg on ele ebag.

²² Kerub omano daruruk ale indip duswareg darurukmu, birim omano oho enembolim lauk katswa. Airoho laukmu re seleg Allah Israel on ininim wereg ale eneg doho ulug ambogbag deg on anyo it enemberimumu helag felag angge duruk katsi.

²³Airoho durukmu re seleg helag-felag angge duruk on anyo o Yerusalem embeselug oko o domma kota ai foma timur fil lasi.

²⁴Na hauk hag hawihik on ai fam de Allah Aheime en an leko og-naplug lasireg de nebe nikangge sombandoho re it ap hele waroho hwik-enepswama Babel wereg on omano enekit nobahaik lasi. Airoho nobahalug de hawihik on anyo longgo isi.

²⁵Airoho longgo isimu re an den it ap hele waroho hwik enepswa on omano fam dindil duk kwit, TUHAN en unug-nitsi ale etamo mundoho dindil esawihik.