Read Ninia Yali YEHEZKIEL 12 Bible Online

YEHEZKIEL 12 - Ninia Yali bible

YEHEZKIEL 12

¹TUHAN eke nim an nobam ele matuk kwit, ele diroho isi,

² “Ap homi waratuk on su yei, hat de ap homi unggul unuk wene sahalduk on enesahalimu welahen. It aire wene sahalduk ale fahet enambono degma re, inil wereg famen de inil kumu hauk fug; enesanggo wereg famen de holduk fug.

³Ai fahet de, ap homi waratuk on su yei, o nukoho deg kweleg eiya re ap hele waroho hwik-enebik lauk on en duruk hag hasumenggan yohwatuk angge misig fam yohwat dakin. Airoho yohwatlug de o owan hup am fug kweleg, ap hele waroho og-eneplug lauk on hagdoho henebe enameg lakiuk. It ap homi wene sahalduk on etman inil kumu husug kweleg de hat hobam ai obahat fam yendeg folole folug, ele fololeg kwe ai en hasumenggan obale fam yohwareg angge ai walug wilibiuk. Wiliplug de hasumenggan ai hummu haroho, o hup anggo lakiuk. Lauk kwit de hil hupnoho lahunmu re kwe hat lahun kwe aire hil hahun fug. Airoho duhun ale aire unggul unuk Israel on enebe abirangge en inil heahupdeg iren furebehup lamag. Ai fam de it enonggwareg en furebahat dauk kwit it aire ap homi wene sahalduk on ulug bohup ano” ulug hweag-nitsi.

⁷Airoho hweag-nitsimu an den TUHAN en melal-nitsi ale higitdoho dirihik. Nukoho ai salim neg, o nukoho deg kweleg, nasumenggan omano hetdoho yohwatuk angge fam kwelaboho, it ap hele waroho wilibuk koho duruk aleroho dirihik. O hup atuk kweleg, an nenggik en nobam anyo obahat foririhik deg, yendeg anyo elekwe wilipihik. Ap homi birangge en inil kumu nusug kweleg sumenggan het deg angge ai nomaloma harulug lawihik.

⁸Likia sekandoho TUHAN ele an nobam hweag-nutuk kwit, ele diroho isi,

⁹“Ap homi waratuk on su yei, unggul unuk Israel on unggul unuk wene sahalduk on ai en haren dirihin ale etma fahet de hein og-hapswa.

¹⁰Ai fahet de an TUHAN Mun Leho welahi on en it enobam imin ale etma it hweag-esakin. An den wene uruk kahi on aire ap raja Yerusalem wereg on nim ap homi kota ai fam wereg on abirangge nim fahet hweag-esakin.

¹¹An den hat fam dihi ale etmare An den fobik it fam enebuhuk ale mundoho ilit anggere etma. Aire it enebe ap en hwik enebuhupmu hele wareg on amuhup ale fahet anggere it hweag-esakin.

¹²O mum degma hubanggo raja iren on asumenggan het deg angge unggulmu ha dalug mum angge lahu. Ap homi en at ebe wilibukwag ulug fak lehet oho on fam yendeg folole fohup kwe wilibuhu. At il hupni dalug il ha fug angge, kwe su fene lauk kahi ulug apeleg deg kweleg lauk karuhu.

¹³ Famen de An den nasum yohwatuk sum anyo at ebe yohwat amag ulug anggweroho wirili fohuk deg, An den at ebe walug o kota Babel lahukmu re, etman o kota ai at ilen lohon ha fug angge wararuhu.

¹⁴Ap homi abirangge raja obam silimu wereg on, it wene komo hweag-utuk on mel, raja ebe along baloho kahaleg wereg on mel, An den di kwe su kwe del fol esahuk. It de An den mug eneplug enowarik lauk karuhuk.

¹⁵It An den unggul unuk unggul unuk angge wereg kwe mel, o kwenang it enapeleg kwe mel del fol esahuk mu, iren An TUHAN Allah anyo eneluk amuhup.

¹⁶Iron en foma dorangge re dog ambiangman mel, siburu obokman mel, ouk amben siag on fam en mel An den enahap wendat-enebuhuk, ai fam de iren siag mun heimaldo ale duruhuk ulug furebahat dahupdeg, iren An TUHAN nobahet demdoho ulug fag duhup” isi.

¹⁷TUHAN ele an noban hweag-nutuk kwit,

¹⁸“Hat ap homi waratuk on su yei, hat siburu nauk kwit hakol en howag elek duruk kamin, ne ik nauk kwit hakol en kwel-kwel angge duruk kamin.

¹⁹An TUHAN Mun Leho welahi on en, unggul unuk abirangge fahet, ap homi Yerusalem on enanggwenang fam wereg on omano enobahet, uruk kahi ale etmano haren hweag-esakin. It enasiburu nauk kwit enowag eleg duruk kamag, ik nauk li enekol en enowag kwel duruk kamag. It ap homi abirangge etma wereg on en de wene melaleg sahalduk kwit neg wereg ai fam de it enanggwenang etma bug iring aruhu.

²⁰Kota-kota ketia ap homi en hoporoho wereg kwe etma mundoho luluhun enebuhup ne it eneyabuk kwe etma lei aruhu. Ai fam de iren An TUHAN ulug eneluk amuhup” isi.

²¹TUHAN ele an nobam uruk kwit,

²²“Hat ap homi waratuk on su yei, nunggwe fahet ulug ap homi Israel on wene hwenaroho uruk on su enenda duruk: ‘Li eke laheg, eke waheg, duruk, famen fobik aruhu ale ulug uruk on etmano re eke atuk eleg’ ulug uruk?

²³Anggere, An TUHAN Mun Leho on en wene onggo uruk kahi on su hweag-esakin: Enele endenoho uruk aire An den elegap duhukmu re Israel on weregma etman eke uruk kamuhup fug. Ai obalma re it diroho ulug hweag-esakin, li re mundoho aik waha, ne fobik aruhu ulug uruk on etma mundoho aruhu neg.

²⁴Israel fam etma ena hag hauk on mel diroho suroho aruhu ulug seiale uruk on mel eke welaruhu fug,

²⁵An TUHAN Mun Leho welahi on en fobik unggul unuk Israel on fam nele maruhuk, An den abirale uhuk on etmare hihiloho feik la fug angge abit angge higit aruhu. Yaho hit ap homi wene sahalduk on su holiek! Hit henoluk wereg li An den hit henenda wenggeloho ulug hweag-hesawihik on etma higitdoho duhuk. Ulug, An TUHAN Mun Leho welahi on en nele mundoho ihi” isi.

²⁶TUHAN ele an nobam uruk kwit,

²⁷“Hat ap homi waratuk on su yei, Ap Israel on en uruk kwit de haren ha hag fam hauk kahen on mel, fobik aruhu ale ulug uruk kahen on mel etma fahet de il yatdoho welatlug fobik etma neg de aruhu uruk.

²⁸Ai fahet de, it fam An TUHAN Mun Leho welahi on en uruk kahi ale su hweag-esakin: Abirangge An den uruk kahi ale etmare higit aruhu, hihiloho eke feik laheg duhuk fug. Ulug An TUHAN Mun Leho welahi on nele mundoho ihi ai” isi.