Read Ninia Yali YEHEZKIEL 13 Bible Online

YEHEZKIEL 13 - Ninia Yali bible

YEHEZKIEL 13

¹TUHAN ele an nobam kweag-nutuk kwit,

²“Ap homi waratuk on su yei, nabi-nabi Israel on enele en lal halug, fobik aruhu ale uruk kahe ulug seiale uruk on etma fam suahal bet-enebin. It de An nele uruk kahi on holukwag ulug hweag-esakiyuk” ulug hweag-nitsi.

³TUHAN Mun Leho on en ele uruk kwit, “Nabi moruwe on etma enamelmel doho welamag! Iren meneni ebetlug amu ale hehe eheg, ne ena og-hauk hag fam hehe ulug seiale eheg, duruk.

⁴Israel on yaho nabi hiren etma alemaroho wereg, it de no olomene serigala kota foluk moluluk deg anggeleg ma wereg hag it aireg wereg.

⁵It en o wereg kwe fak lehet mundoho moluluk disi on omano furebouk eleg angge wereg. Ne iren fak lehet etmano obalma buhundoho wauk fug. Mu re nukoho An TUHAN en it unggum enobam fesik waruhuk salim weim lahapuk em de Israel on hambuk hahup fug.

⁶Ena fam hag hauk kahe ulug uruk on mel, diroho suroho aruhu ulug uruk on mel etma re ebe eleg kweleg enele seiale uruk. Iren uruk kwit de An den isi ale uruk famen de An den it mon-enebik waharihik fug. Airoho deg kweleg famen de iren diroho suroho aruhu ulug uruk on anyo amag ulug enenda ebereg wereg ale etma re nangginoho no?

⁷An TUHAN Mun Leho welahi on en it fam nele hweag-esauk kahi su, ‘Hena fam hag hauk kahep on etma re ebe eleg kweleg uruk kahep ne hiren diroho suroho aruhu ulug uruk kahep on etma re we seiale. Hiren uruk kwit de abirangge omare TUHAN en iyuk isi ale uruk kahep, famen An den hit henobam nele irihik fugmen uruk kahep! Ai fam de Ande hit heneselei on aruhuk.

⁹Yaho hit nabi on yei, hit en fobik diroho aruhu ulug etma seiale lal halug uruk kahep ma, hena og-hauk hag fam halug uruk kahep on etma henele en felal halug seiale uruk kahep ma Ande hit unggum og-hesahuk. Hit An nomaliki wene balukoho kabog durukmu wene katuk doho eke kong duhup fug. Hit henenuk de ap homi Israel on enenuk baleg wereg on sahalimu en ho esahup. Ne hit de henobam hit henanggwenang fam omano sombandoho wamuhup fug. Ai fam de An TUHAN Mun Leho on welahi ale anyo hit henoluk aruhu.

¹⁰ Hit nabi seiale on yei! Hiren An nomaliki fam henele en mun fano wene eleg angge lioloho welamuhuk ulug enenda firoho feseruhup. Famen ebe airoho deg fug kweleg! An nomaliki en de fak lehet helep kwenang dangge fam weraho on kolkolang doho wutsama, hit waharuhupdeg dimeng damul duhup.

¹¹Hit nabi seiale on yei, hiren fak lehet oho lahep on etma re moluluk doho wambuhu. Fak lehet etma re hol sielu en wareheg, osit lumbiag en wareheg, duhu.

¹²Mu re mundoho daloruhu ne ap homi enebe domog en de fak lehet etma re nunggwelug dimeng damulswa’ uruk kamuhup eheik ulug hweag-esakin” isi.

¹³TUHAN Mun Leho wereg on ele uruk kwit, “An nolok hasimeg, fak lehet ai luluhun dikoho re An den hol sielu mel, osit humon mel, osit lumbiag mel, mondorik waruhuk.

¹⁴An nolok en hit en fak lehet dimeng damulduhup angge ai meyaloho belabuhuk en deg lahi, ne mundoho eleg-feleg esahukmu re oboule neg welaruhu. Fak lehet ai en de hit sebel henebik waruhumu henebe abirangge henowaruhu. Ai fam de hiren An TUHAN anyo henoluk amuhup.

¹⁵Fak lehet ai nim hit dimeng damulduhup on mel An nolok mun nikaleroho duhuk on ai hahup. Ai en fobik en An den hit henobam uruk kwit fak lehet anyo mel ne hit dimeng damulduhup henap mel mundoho eleg ahep ulug hweag-hesahuk,

¹⁶nabi seiale on doma u! Hiren diroho suroho aruhu fug we lioloho lombuk deg welamuhuk ulug Yerusalem fahet henele uruk kahep famen airoho aruhu fug kweleg uruk kahep!” ulug isi. Airoho TUHAN Mun Leho wereg on en ele isi.

¹⁷TUHAN ele uruk kwit, “Ketia ap homi waratuk on su, hat hunggul unuk on enesahalimu en homi etma nabi on welahe ulug uruk on etma furebesein. Ne haren it bet-enebin,

¹⁸airoho dulug de An TUHAN Mun Leho welahi on en uruk kahi ale su it fam hweag-esakin: ‘Hite alemat atuk kamek! Hiren de ap homi abirangge enobahet sehene hwal angge sehene yihikeg, ne enunggul salni hwal sum hagdoho yiko wan debeserukmu iren ap homi amu on enalong en sebel-enesug lamag ulug duruk kahep. Hiren de An nomaliki etma enebe enoluk weregma nim waratukmu nim hit henalong apma welamag ulug duruk kahep, ne hit henalong en duruk kahep on ai fam de hit henonggwareg dung-ap daul ulug duruk kahep.

¹⁹Hiren gandum erang on jelai enenggik misihan yinggiloho wauk on mel roti baleg lohon mel hwelakoho, An nomaliki inilhanim Nunuk mun siahap deberuhup. Ap homi siag duruk eleg on de hiren enowatuk kwit, enowarukmu waram ale deg on omano hiren enoluk feseruhup. Airoho duruk kwit hiren An nomaliki lal-enebuhupmu iren hit henobam demdoho bousa’ eheik ulug hweag-esakin” isi.

²⁰TUHAN Mun Leho wereg on en, homi nabiah etma fam ele uruk kwit, “Hiren An nomaliki enebe enoluk wereg ale nim waratuk ale nim fahet henalong apma fesouk koho, hiren henasehene hwal on fam duruk kahep on etma nerimdoho kumu hesauk kahi. Sehene etma hit henenggikmu kwelabegman deloho wahukdeg, ap homi hit henalong apma sebeloho fahat-enusug lahep on etma An den fiselaroho fesehuk.[21]

²¹Ununggul asum hwal-hwal angge bugdeg on etma An den dililip dalalap esahuk deg, Nomaliki kwasik-kwasik awene fam lal-enepuk kahepma mutlug lauk on etma mundoho-mundoho fahet deloho wilip-enebuhuk. Ai fam de hiren An TUHAN anyo heneluk amuhup.

²²Ap fano-fano ale duruk on de An den di ale su ale eke debeseruk kahi fug on omano hiren lal-enepuk fam enenda dorap debeseruk kahep. Ne ap siag duruk on de enenda lohapdoho eke nim siag duruk kamag ne it enahap wendat amuhup hayog ulug debeseruk kahep.

²³Ketia re na fam hag hauk on seiale on omano mel, fobik diroho aruhu ulug henele en felaloho sali balduk kahep on omano mel de ahae fotog atuk ai. Nomalikisi re hiren siahap enepuk kahepma etman An den enahap wendat enebuhuk. Ai fam de An TUHAN anyo hit heneluk amuhup” isi.