Read Ninia Yali YEHEZKIEL 14 Bible Online

YEHEZKIEL 14 - Ninia Yali bible

YEHEZKIEL 14

¹Ap it enunggul unuk Israel melal-enepuk enap foma lohon an nakit wahaswareg TUHAN enda boruk ale fahet hein og-nabik wahaswa.

²Wahaswama TUHAN en an hweag-nutuk kwit,

³“Ap homi waratuk on su yei, ap wahesa on sure mundoho kembu fam neg enenda dip debeswa fam de it enebe siag ilonggoma yohwat atswa. Airoho duswareg en iren An hein og-napul ulug duruk ai a?

⁴Ai fahet de hat en it An TUHAN Mun Leho welahi on en de diroho eheik ulug hweag-esakin, ‘Ap homi Israel on enebe domog en enenda kembu fam dip debeswareg it enebe siag ilonggoma yohwat atswareg en, ap nabi misig fam eke en wene komo ale hweag-nesoag ulug akit waharukmu re, An nonggwareg namu en neg onggo it kembu etma fahet uk aleroho fam hweag-esauk karuhuk!

⁵Kembu abirangge etma fam de An nomaliki abirangge omano nim yarapdoho nenobahaswa, famen de An den onggo uhuk on ai fam de An nomaliki etma nikangge sombandoho nakit wamuhup lamag’ eheik ulug hweag-esasi.

⁶Eke An TUHAN Mun Leho Welahi on en ap Israel on fam uruk kahi ale etma hweag-esakiyuk, ‘Hit henesiag duruk kahep on etma fam en henenda aham diek, ne henangkembu mun heimaldo on etma mun embeseyek.’ Ulug hweag-esakin eheik isi.

⁷Ap Israel on hundomog ane ite ap bog on unggul unuk Israel anggelegma wereg on ane, en An fotogdoho nobahalug kembu fam enenda dip debelug en ap nabi misig en wene komo hweag-nesoag ulug heng duruk on de An den onggo hweag-uruhuk.

⁸An den at ninim selei debehuk deg, it amu on etma enobahet ilit angge duhuk. An den at ebe ap homi enesahalimen hemegdoho wilibi fesehukmu, it An nomaliki en de An TUHAN welahi ale anyo eneluk amuhup.

⁹Ap nabi on eke seiale hweag-umuhup on fahet aren onggo siag doho hweag-esahu on aire An den neg seiale hweag-uruhuk. An TUHAN Mun Leho welahi on en de ap ai it Israel on sahalimu en hemegdoho wilibi fesehuk.

¹⁰Aire at nabi ai oho it komo ale at fam heng duhup on ai oho, unggum de higitdoho neg hwelahup.

¹¹Airoho duhuk aire ap Israel on en An fotog nealug wilip aheg, siag ale fam emere fahat deheg dukno ulug duhuk. Airoho duhukmu re it An nomaliki on amuhup, ne An it enakni Allah aruhuk,” isi. An TUHAN Mun Leho welahi on nele mundoho ihi ebag.

¹²TUHAN ele an hweag-nutuk kwit, “Ap homi waratuk on su yei,

¹³o kwenang misig eke fam en siag duruk kwit, An nobam ebereg eleg angge wereg halug, An den kwenang ai unggum og-esahuk. An den it nauk angge fouk deg omano luluhun esaheg, siburu obok mondorik waruhukmu ap homi mel, wam omano mel mundoho enowareheg duhuk.

¹⁴Eke it Nuh mel Danel[22] mel, Ayub mel, omano o etma enesahalimu welalepman oho re, it henahan etan fano duruk fam de, we it enonggwareg eneluk neg ili hwelelep. An TUHAN Mun Leho on en nele mundoho ihi.

¹⁵Eke An den mene olok on o kwenang ai fam momdorik waruhukmu senggeloho yohwat enebil lahu fano, o kwenang etma fene mun namelmel aruhumu ap homi kwe ai lag-wag uruk kamuhup fug.

¹⁶Eke it Nuh, Danel, Ayub mel etma welalepman ohore, An nunuk fam Allah mun oluk wereg on, TUHAN Mun Leho welahi on anggere, iren ap misig ulug oho eke ahap wendaruk fug alereg, it enonggwareg enomaliki famen oho enahap wendaruk fug alereg, o kwenang ai fam de lei birim uruk kweleg we it enemu neg enahap wendat am alereg.

¹⁷Eke An den o kwenang su fam weim mondorik waharuk kwit, bum ap homi et wam et elehap debesouk ale deg on mel mondorik waruhuk.

¹⁸Ne it ap henahan etano etma welalepman ohore it en ap misig ulug oho eke enahap wendatlep fug, An Allah noluk welahi on, TUHAN Mun Leho welahi on nunuk fam anggere, it enomaliki famen oho ne ap amu on ulug enahap wendaruk fug ale deg. We it enemu neg enahap wendat alep.

¹⁹Eke re An den ouk amben siag on o ai fam mondorik waharuk kwit, An nolok ahe hang urukmu ap homi mel wam mel, etma elehapdoho fesehuk.

²⁰Ne it Nuh mel, Danel mel, Ayub mel, etano etma welalepman ohore it en ap misig ulug oho eke enahap wendatlep fug, An Allah noluk welaho on, TUHAN Mun Leho welahi on nunuk fam anggere, it enomaliki famen oho ne ap amu on ulug enahap wendaruk fug ale deg. We it enemu neg iren fano duruk fam enahap wendat alep” isi.

²¹ TUHAN Mun Leho wereg on en ele uruk kwit, “An den unggum mun anggin humon o Yerusalem fam belabe fohukmu, ap homi mel wam-wam angge omano mel, elehap debesehup. Unggum aire weim mel, siburu obok mel, ouk amben siag on mel, olomene olok on mel fam fesehuk.

²²Ne it eke lil atlug wilibuhup deg enomaliki nim enahap wendat enebuhup famen ohore, iren hat hakit waharuk on etma hil fubi debeseyuk. It enolok deg ale etma fu debesehun deg de An den it Yerusalem on fam unggum fesehuk on ai fahet hat holuk aruhun.

²³Ai en eke An den duruk kahi ale etma re indip wereg en duruk kahi ulug holuk aruhun. Ulug An TUHAN Mun Leho welahi on en nele mundoho ihi” ulug isi.