Read Ninia Yali YEHEZKIEL 15 Bible Online

YEHEZKIEL 15 - Ninia Yali bible

YEHEZKIEL 15

¹TUHAN ele an hweag-nutuk kwit,

²“Ap homi waratuk on su yei, e anggur along degma e anggenma on etma sebeleg behen? E anggur neg de fano degma e ohweimu on maben deg ai ke fam?

³E ai dam di ale su ale dukwag ulug de wa ale deg a? E ai fam di ale su ale duruk angge etmano sukni forukmu fahet wa ale deg a?

⁴Duk fug ale deg, we e indok yalduk on neg de fano deg. E ebe ambiang foma-foma indok nilauk men bul etma indok anggen atilauk em at fam en ambiangma duk ale eke wereg a?

⁵Duk fug ale deg! Indok yaluk fug angge en oho re di on su on fahet eke duk fug ale deg. Ne indok mundoho han yale folug indok en mundoho nilauk men etma re ebenaheg duk fug alereg!” ulug isi.

⁶Ai fahet de TUHAN Mun Leho wereg on ele uruk kwit, “E anggur owag, anggen man wilauk kwit indok ma yalduk hag, An den it ap homi Yerusalem wereg on airoho enebuhuk!

⁷An den it unggum og-esahuk. It indokman hesilamuhup famen oho, indokman han nahup on oho fobik elehap debesehuk. Ai fam de haren An nebe TUHAN welahi ale anyo holuk aruhun.

⁸It An noban enenda ebereg wereg fug, ai fahet de kwenang ai an den lei birim degma debehuk. An TUHAN Mun Leho welahi on en nele mundoho ihi” isi.