Read Ninia Yali YEHEZKIEL 16 Bible Online

YEHEZKIEL 16 - Ninia Yali bible

YEHEZKIEL 16

¹TUHAN ele an nobam eke nim hweag-nutuk kwit,

²“Ap homi waratuk on su yei, Yerusalem on en heimaldo ale duruk on etma it fam unug-esakin,”

³TUHAN Mun Leho wereg on en ap homi Yerusalem on fahet wene su hweag-esowag ulug mingming napsi, “Yerusalem on su yei, hat de hebe kwenang Kanaan fam endag atihin. Hakni re ap Amori on ne hisinga re o Het[23] hwe.

⁴Hat endag atihin mu hanum bal habeheg, hebene kume ware hobahakeg, ite sapsap nonggwale hobahakeg, mayu fole feheg,[24] ite sum kain fam hulilip hobahakeg, dusa fug.

⁵Ap misig en ulug oho eke enda healug hat hobahet iren airoho eke hapswa fug. Ne hat hebe endag atihin liem de enenda hundig eke hapswa fug, ite hat hebe yabukmu hwik heausa.

⁶Ai en An lauk kwit kumu heauk men de hat mep en het-bet deg angge wereg lit nenek-yoba duruk katihin, famen An den hat waramag ulug embesouk ale napsi fug.

⁷An den ik oko hamep hebene horeberihik. An den hahap fene zaitun ahalue fam aroreberihik. Yaho angge kwenang fam en hesiloho sipukdoho wilipuk hag An den hat kul hapihik. Hat hebe doaloho lahakeg, hobam ouk eleg angge welaheg, bololoroho log atihin deg hebe hwele[25] duhum ebe on atihin. Hag butukdoho wilibeheg, horuk mel yat aheg, dirihin famen de hebe habuluke kohouk welatihin. Ai en an eke lauk kwit heaukmen de, hat hebe ap fahet henda na ale deg latihin. Mu re An den nasum jubah anyo hat habuluke kohouk wereg on fene sambuni hobahakeg, An den hat fam nenda hundig hapuk kahi ale fahet sali wat-hereheg, dirihik. Airoho dirihik deg de An den hat og-hapuk kahi ulug sali watihikdeg, hat hebe re An nonggwareg nangge on deberihik. Ulug An TUHAN Mun Leho welahi on en nele mundoho ihi.

⁸

⁹

¹⁰Ai en An den hat hasum enenggik en laloho wirig on wan hobahakeg, sepatu ahap on fam wirig angge mun ahap sako angge wan-hobahakeg, hunggulmu bug deg angge re kain linen il sako on fam bug hobahakeg, ne sum jubah re no dahwi ahap fam en laleg angge fam wan-hobahakeg, dirihik.

¹¹Hat hebene halili angge re no permata bug hobahakeg, siong mel sehene mel bug habeheg,

¹²An den hat helep sehene hambiangma kwelabe hobahakeg, hesanggomangge nim, hunggulmu mahkota mun buhun bahan on nim bug hobahakeg, dirihik.

¹³Airoho hat de no emas mel perak mel fam lahabeg latihin; hasum de no linen on nim dahwi ahap fam dopnoroho wirig angge on wandeg latihin. Hat de roti terigu buhun on fam wirig on nim, kin ahalue nim, zaitun ahalue nim fam nauk katihin. Hil aluli buhun de mun nik ale deg lit de hebe ratu atihin.

¹⁴Di ap su ap enunggul unuk humdoho en de, hat hil aluli buhun doho hahapmale eleg angge deg latihin ale eta fahet de mot-hapuk katswa, ne abit ale etma An den neg muminag apdoho hobaharihik. Ulug An TUHAN Mun Leho wereg lahi on en nele mundoho ihi.

¹⁵Famen de, hat hil aluli buhun deg lahen ale nim, habug urukmu fanoreg ale nim haren we alemaroho duruk kahen. Hat de ap amu on lag-wag uruk on nim hesangge[26] nohoruk kahen omare.

¹⁶Hasum foma re kembu mot-duruk on fahet boruruk kahen, hat de onggo hwelaroho hambena duruk on atihin deg hebe ap abirangge[27] omano og-esauk kahen.

¹⁷Halili angge perak mel emas mel An den og-hitihik angge etma fam de haren kembu ap on ilit angge hilinggirihin deg, haren kembu etma nim babi duruk kahen.

¹⁸Haren de kembu ahut ilitdeg omano fene sum yihik An den og-hitihik angge omano wandeberuk kahen. Haren de no zaitun ahalue nim, amben fano angge dupa nim An den og-hitihik angge omano kembu obahet folug og-utuk kahen.

¹⁹An den hat nauk on de terigu mun fano on mel, kin ahalue mel, zaitun ahalue ebe on mel, og-hutuk katihik. Famen de abirangge etmano re haren kembu obahet folug og-utuk kwit it enenda enahayeg hoag ulug debeseruk kahen. Ulug An TUHAN Mun Leho welahi on en nele mundoho ihi.

²⁰Ai en haren de nit nenomaliki ap omalik mel hwelani omalik mel, hat en kembu fahet feselug waroho kembu yal-esauk kahen. Hat An nobam neg dip nobaharuk alere, owan higit deg fug en duruk kahen a?

²¹Demdoho haren An nomaliki oho oko kembu fahet fulug og-erehen ha alereg a?

²²Hat holuk fam hambena duruk kahen on aire mun naldo baldo ale duruk kahen, hat de endam hebe dot deg li welatihin ale etma mun ebet hauk kahen fug, hat habulukwe kohouk angge hamep en het-bet doho welatihin ale etmano ebet hauk kahen fug,” isi.

²³TUHAN Mun Leho wereg on ele uruk kwit, “Hat de helaheg doho welamin! Demdoho helaheg doho! Hat en di siag su siag etma dirihin ai.

²⁴Eke haren de o kota bumbuk kwe mel, kobokwe elan kwe hundomog etmano mel, kembu mot-duruk kwit hambena durukmu felaloho feil lawihin.

²⁵Honggwareg en hil aluli buhum anyo siahap dobahat dawihin. Hebe fahet de ap abirangge kwema lag-wag uruk on fam hambena nabiek ulug heng-enepuk kwit neg welahen. Hat bok am fug angge hundig hundig babi neg duruk kahen etmare.

²⁶Mesir hat haluluk wereg on enda nauk alere humdeg on anyo nim, hat oho hinim nohoruk kamul ulug sebe dirihin ai. Hat yamdalon An nolok amag ulug hambena duruk kahen aire.

²⁷Ketia An den hat unggum og-huruhuk en duruk kahi, An den fano apdoho og-hutuk kahi angge omano owag oko wahuk en duruk kahi. An den hat ap Filistin enolok habeheg hobabut siag ale neg durukmu me enaperoho kumu heeheg, duruk on omano fam og-esahoro duruk kahi.

²⁸Famen de hat de owan homo hobaharuk eleg; ai fam de haren ap Asyur on sik-mug eneplug lauk kahen ai. Airoho mug-eneplug lauk kwit hat de iren hambena hapuk on atuk kahen famen de iren oho hat hobam homo hobaruk fug.

²⁹Ai en eke hat de ap Babel on enunggul unuk onggo wauk kwit wereg enap ai en hambena hapuk on atuk kahen. Famen iren oho hat hobam homo hobaharuk fug” isi.

³⁰TUHAN Mun Leho wereg on en ele uruk kwit, “Abit ale haren duruk kahen ale etmare, hambena on enenggali[28] eleg on en duruk ale duruk kahen etmare.

³¹O kota bumbuk kwe mel, kobokwe elan kwe hundomog etmano mel, kembu mot-duruk kwit hambena durukmu felaloho feil lawihin. Famen hat de it eke we hesangge hambena duruk kwit uang heng-enepuk on hag deg lahen fug.

³²Hat de ap ohwe eke en ap amu on nim hambena dil noruk fam ahun siahapdoho foruk on anyo hat wereg lahen.

³³Hwe hambena duruk on ai hundig onggo baloho hwelauk, famen de ahamdoho haren de it henda hundig on omano onggo enahayeg doho ulug og-esauk kahen, airoho duruk kwit eke haren it enebe di kwe su kwe en watlug hat hinim nohweik wamag ulug uang fam enenda og-enepuk kahen.

³⁴Hat de hambena nik on deg lahen, it eke en hambena dukohon ulug enebi en mingming hapuk fug. Iren hat onggo og-hutuk fug, ite hat honggwareg en neg onggo fahat dauk kahen. Demdoho hat nik on deg lahen, it amu on hag deg lahen fug” isi.

³⁵Yerusalem hambena on su yei, TUHAN Mun Leho wereg on en uruk ale ai holin, “Hat sum hebesum nonggol dihin deg hambena duruk kaikoho hat hebe anyo it henda nauk on etmano mel, hanggembu mun heimaldoreg on omano mel fam og-esawihin. Homalikisi re haren enowatihin deg waroho kembu etma enobahet feserihin.

³⁶

³⁷Airoho dirihin ai fam de, it haren henda hundig enepuk kahen on abirangge etman, hat hambono on oho herim on oho An den kabog debesehuk. It de hat hebe walinggoho kwelabe hobahalug unduhuk lit, hasum abirangge nonggoloho embesehup deg, it inil de hat habulukwe kohouk wereg ale kumu hapuk kamuhup.

³⁸Hat en babi deheg, ap wat-enebeheg, duruk katihin ai fam An den unggum og-huruhuk. An nahum kwe heren nolok hasimeg hat hebe binggi howaruhuk.

³⁹Hat hebe re An den oko it henda hundig enepuk kahen on etma fam hobahakuk mu, iren obale haren kembu mot-deheg hambena deheg duruk kahen kwe etma meyaloho belabuhup. Hasum abirangge mel halili angge mel etmano mundoho it hwelahupmu hat de habulukwe kohouk welaruhun.

⁴⁰Iren ap abirangge hweag-esahumu hat hwik helep howarukwag ulug hweag-eseheg, karog fam hebe king kongdoho lahabe hobahakeg duhup.

⁴¹It en hat hobam wirig etmano harep fisatuk kwit, homi en kumu nenepuk kamek ulug hweag-esahupmu, kumu hapuk kamuhup. Airoho hat babi duruk kahen ale anyo An den bok-ap debehuk. Hat en it henda hundig enepuk kahen on fam enahayeg doho ulug onggo og-esahun fug.

⁴²An nolok ai wilibi fohuk deg en neg de, An nenda sako aruhu, An fobik nolok deheg nahumu siag beheg, duhuk fug.

⁴³Hat sauwe owan deg li An den kul hapuk katihik ale anyo hapeleg atukmu, duruk kahen ale ai fahet unggum og-huruhuk. Haren An nolok-ap kwelap napuk kwit di ale su ale etma duruk kahen fam An nolok atuk. Nunggwe ulug hat hobabut heimaldo ale etma fam de babi duruk ale nim sebe duruk kahen? Ulug An TUHAN Allah Mun Leho welahi on nele munfoho ihi” isi.

⁴⁴TUHAN en Yerusalem hweag-utuk kwit, “Yerusalem, ap enele hwenaroho su neg hat hweag-hutuk kamuhup, ‘Isinga hag ahaloho oho aireg’ uruk kamuhup.

⁴⁵Demdoho hat de hisinga ahaloho on welahen. Aren de ahun mel onggwareg omaliki mel, erim enepuk, hat de hehebi en enehunsi mel, enomalikisi mel enerim enepuk on etma hag deg lahen. Hat mel, hehebisi mel aire, kota maseroho welahep on etma mel, henesinga re o Het[29] hwe ne, henakni re ap Amori on enahwelani welahep.

⁴⁶Howe re Samaria utara fil on desa aren on etma, ne haut de Sodom selatan fil desa aren on nim wereg on etma.

⁴⁷Hat de iren heimaldo ale duruk on etma mug-eneplug lauk katihin anggere, mundoho homo hobahasi a? Owan a! Iren duruk alere hareg famen hat de we horog ketia angge famen de mun ilmu siagdoho duruk kahen.

⁴⁸TUHAN Mun Leho wereg on en uruk kwit, An Allah noluk mundoho welahi on nunuk fam anggere, haren Sodom nim obam desa wereg omano nim en de, hat nim haren hobam desa nim en siag hum-ham ale duruk kahep eta hagdoho duruk fug.

⁴⁹Sodom nim obam bumbuk desa nim de enangge nauk angge foukdoho fahat dalug lit winik-wonog uruk kwit enebe fano liogdoho neg wereg. Famen it en ap homi enenggik eleg on mel sebeleg on mel fu debeseruk fug.

⁵⁰It winik-wonog uruk kwit enenggul owag haro atswa reg, wene An den nerim boruk kahi awene omano duruk. Ai fahet de An den lilibug enebuhuk alere, hat atam hil hawihin hag duhuk.

⁵¹Demdoho Samaria kwasik humon duruk famen de, aren duruk on de siag haren on fomare duruk fug. Hobabut de mundoho kwasik atsi. Hehebi hwelani re hat nim ilit heaman de siag dusa fug on hag deg. Hat neg de henggali halug wambo uhun!” isi.

⁵²

⁵³TUHAN ele Yerusalem hweag-utuk kwit, “Sodom nim Samaria nim obam bumbuk desa iren on nim An den nikangge dung-ap debesehuk. It airoho debesehuk deg neg de hat oho An den fobik dung-ap habuhuk.

⁵⁴Airoho duhuk ai fam de, hat honggwareg henggali aheg, hat hasiag omano hori en heaukmu it enebut fano duruk ale en henggali heheg duhun.

⁵⁵It mel, enobam desa iren on mel de mun dung on amuhup, ai hat nim desa haren on nim oho higit doho aruhu.

⁵⁶Hat winik-wonog uruk kwit, hat hasiag wereg on mel enam am fugmu,

⁵⁷Sodom fahet unda yatihin fug no a? Ketia re hat oho at hag deg lahen; hat de ap Edom on mel Filistin on mel, it enunggul unuk fomane hat horog kwe wereg lit enerim hapuk on mel en unda yag-hapuk.

⁵⁸Hat duruk kahen ale mun siag on deheg, heimaldo mireg ale deheg, duruk katihin on etma onggo re hat anggolo hahun. Ulug An TUHAN en nele mundoho ihi” isi.

⁵⁹TUHAN Mun Leho wereg on en uruk kwit, “Hat de hombuk baldihin on suhwi-ap debeheg, An nim sali wat-wat atuhuk on anyo dahandoho deheg, dirihin ai fam de An den oho hat duruk kahen ale ilit doho neg hobahakuk.

⁶⁰Famen de An den sali hat nim watihik ale etma ebereg laruhuk, hat hebe sauwe deg li sali hat nim An nim watuhuk ale ai mundoho-mundoho wereg laruhu.

⁶¹An den it hori omano hakit sombandoho feseik waharukmu re haren duruk katihin ale etmano ebet halug de henggali hahun. It etma re nit hat nim sali wareg lahe on ai fam kwelabeg fug on famen de, it ai An den hat homaliki on hag debesehuk.

⁶²An den fobik sali keron hat nim waruhuk. Ai fam de hat en An TUHAN welahi ale anyo holuk amag ulug duhuk.

⁶³An den fobik hat siag duruk kahen ale etma napelehap debehuk, famen hat neg de hapeleg aruhu fug, di ale su ale fahet uk alere henggali neg atuk karuhun. Ulug An TUHAN Mun Leho welahi on en nele mundoho ihi” isi.