Read Ninia Yali YEHEZKIEL 17 Bible Online

YEHEZKIEL 17 - Ninia Yali bible

YEHEZKIEL 17

¹TUHAN ele an nobam uruk kwit, “Ap homi waratuk on su yei, wal-heheg su ap homi Israel on fam dindilin,

²An TUHAN Mun Leho wereg lahi on en it hweag-esahuk ulug nenda boruk kahi ale re su: Suwe ikwesahop eke mun along deg on oruk de mun fano, ahwerabul de anggwe yaron wirilig, mu omamne humon deg. At daril dom Libanon fam lalug, e lak unggum deg dulug waharuk,

⁴walug watlug kota ma di angge su angge onggo wauk kwit anggiluk durukmu omano kabok dik waharukmu wereg.

⁵Ai en eke kwenang Israel on fam yaho angge misig eke ombo ket laharuk on walug de kwenang hesilig on fam yabuk wirigmu ik mel firitog[30] atuk fugmu etmano yaho foruk.

⁶Airoho deberukmu re yaho foruk angge anyo ebe e anggur indip horog doho wiliplug doaloho dak deg. Enggik de suwe ikwesahop anyo fil deg, ne omanggen de kwenangma mun wirikdoho fug-fug deg. E anggur ai ebere enggela heik ahan wilibig.

⁷Ai deg kweleg eta suwe ikwesahop eke amu on ebe humon oruk wilim on, aherabul anggwe roho wirilig on welatsi. Airoho weregma re e anggur anyo en de omanggen mel, enggik mel suwe ikwesahop anyo fil doalik lauk katsi. Aire aren boruk kwit, yabukmu ik wereg[31] on eta wereg ai deg kweleg famen de ik humdoho og-nomag boruk kwit airoho disi.

⁸Airoho disi famen, ebe e anggur aire kwenang hesilig on fam, ik mel humdoho fululuk dik waharukmu wilibig mu re enggela heik doho wilibeheg, anggen saharoho yihikeg duruk fam e anggur ebe on am famen disi.

⁹Ai fam An TUHAN Mun Leho welahi on en hein og-hesauk kwit: E anggur aire demdoho fano wilibig lit saha urukam alereg a? Suwe ikwesahop keram on anyo en e ai omanggen et sareheg, anggen dahan deheg, enggik sombo eseheg, debelug bug amag ulug embesouk fug ale deg a? Duk alereg. E ai omanggen et sanog dukwag ulug de ap humdoho mel, ite it enunggul unuk misig on mel, enomamne hum fam duk fug ale deg.

¹⁰Demdoho at ebe omanggen omamne doho yaho famen de at sipuk doho wilipuk kwit neg welam alereg a? Hol timur fil en fi ha waman de bug am fug alereg a? Ne at ebe yahoma etan de bug am fug alereg ulug a? Duk alereg” ulug isi.

¹¹TUHAN ele an nobam uruk kwit,

¹² “Wene sahalni etma fam de hwenaroho wene aire furebehesa ane eleg a, ulug hein og-esakin. It fam hweag-esauk kwit de, raja Babel on de o Yerusalem mundoho kwik wahareg de raja Yehuda on mel, ap o kota ai fam yain-kain omano mel feleleng eneplug de o Babel laha iyuk.

¹³Airoho lauk kwit de Aren ap misig at raja Yehuda ai on ahain elekwe on en misig eke momalsireg de ap ai nim sali wareheg, ne ap ai en wene dipdoho duruk karuhuk ulug hombuk baloho ukwag ulug hweag-ereheg, disi. Ap raja Babel on ai en de

¹⁴kerajaan Yehuda on ai nikangge omamne am no ulug nim, ne sali wareg on ai demdoho dip debehup ulug nim de aren ap leho enap omano mundoho sen-enepsi.

¹⁵Famen de raja Yehuda on wene sahaloho ning aruhureg ap yonggo o Mesir etman no kuda mel ap tentara mel, humdoho og-omag ulug mon-enebuhu. At fobik along aruhu a? At koloroho welamag ulug lili fohu a? Eleg at de unggum obam fouk fug angge sali wareg on dahan debehu fug lit deg.

¹⁶An Allah mun noluk welahi on, TUHAN Mun Leho welahi on nunuk yiko uruk kahi, anggere raja Yehuda on de Babel on en takhta fam hwerie fesi ahun anyo nim hombuk baleheg, sali wareheg, disi on anyo dahan debesimu re at ebe re o Babel etman wararuhu.

¹⁷Tentara Mesir on mun along on etman oho re ap Babel enap ap homi humdoho enowarukoho kwenang habuloho sebeldil lahakeg, ik kalog habuleheg, duruk on ai en bin kwik waharukmu re at let duk fug ale deg.

¹⁸Aire aren hombuk baleg on mel, sali wareg on nim dahan doho disimu re at ebe lil aruhu fug.

¹⁹An Allah noluk welahi on TUHAN Mun Leho wereg on nunuk fam anggere, raja Yehuda on ai en dipdoho neg duruk karuhuk ulug An nunuk fam hombuk balsireg en, aren raja Babel on sali watsi on anyo dahan debesimu re An den unggum og-uruhuk.

²⁰An den at senerikoho sum ahe yihik ele arebehuk. At ebe An nobam dipdoho duruk fug en de An den o Babel walug lahukdeg etman unggum og-uruhuk.

²¹Tentara aren on mun fano on omano re weim yapuk kwit enowaruhupmu waramuhup, ne it foma lil atlug heiye lahup on de o unggut ilitdoho del-fol uhup. Ai fam de An nomaliki en de, An TUHAN nele mundoho isi ulug enoluk amuhup” isi.

²²Sure TUHAN Mun Leho wereg on en ebag ale, “E lak yaron famen an den unggum baluhuk airoho duhukdeg An den e enggik ahanuk keron eke somboruhuk; An den e enggik ai dom hena fam wolongdoho lahabeg on fam etma yaruhuk.

²³Dom mun yaron it Israel on weregma etma, An den fugfug debehuk. Etman asimit wilibuhureg, anggen yihiruk karuhu, airoho duruk kwit de e lak mun fano on aruhu. Di angge su angge oluk-oluk angge e ai fam ena wirik kuruk kamuhup e ai apma kunmu etma kulug welamuhup.

²⁴E abirangge o kwenang ai fam wereg on etma An TUHAN anyo fu nobahakup. E yaron de An den muruhuk. Horog on de An den ebe yit-yatdoho lahaukwag ulug debehuk. E ebe on de An den bugdoho iringgi fohuk; ne e iringgig on fam de asimit wilibi feheg, owil yihik feheg, duhuk. Ulug An TUHAN en nele mundoho ihi, ne An den nele ihi on aire mundoho aruhu neg” ebag.