Read Ninia Yali YEHEZKIEL 18 Bible Online

YEHEZKIEL 18 - Ninia Yali bible

YEHEZKIEL 18

¹TUHAN ele an nobam uruk kwit,

² “Nunggwe fahet enele unggut deg wene ai unggul unuk Israel on weregma etma hindik hundig uruk kamuhup? ‘Ap sobal on anggur anggen unduk asig on nauk kamuhup, famen enomaliki eneyeg lil duruk kamuhup.’

³An Allah noluk welahi on. TUHAN Mun Leho welahi on nunuk fam anggere enele unggut doho uruk on ai Israel fam suma eke uhup on wereg fug.

⁴Ap abit eneheime aire An nangge neg wereg, ap sobalon et enomaliki et enaheime An nangge neg degma it ap eke siag duruk halug de ap ai neg waratuk kamuhup.

⁵Ap eke fano deheg, dipdoho deheg, bekitdoho deheg, duruk on eke welam alereg.

⁶Ap aire Israel on enanggembu mot-duruk fug, ite Israel en kembu mot-duruk kwit obahet waroho yalduk on omano nauk fug, aren ap amu on enohwesi siahap enebuk fug, ite hwe dugio hauk li inim hup nohoruk fug.

⁷At de seiale eheg, ap enangge deleheg, ap enengge enda lisig foroho lamag fobik onggo fohuk ulug og-utuk on omano folo-folo sombandoho og-eseheg, ap enasiburu obok deg on nauk angge og-eseheg, ne ap enasum wan duruk on eleg halug at asum og-eseheg, duruk.

⁸At angge ap fam fobik nikangge og-numuhup en ulug og-esauk kwit de dopno angge eke nim og-esauk fug, at de enolok ale duruk on etma fahet erim deg ne ap suahal urukmu en de aren wene bekitdoho neg kong duruk.

⁹ At de An nele diroho diuk airoho diuk ulug irihik on mel, An nawene melaleg mel hole folug dipdoho duruk. Ap airoho neg duruk on aire ap bekitdoho duruk on degma at ebe oluk welaruhu. Ulug An TUHAN Mun Leho welahi on en nele mundoho ihi.

¹⁰Famen su hag, ap ai omalik herahakeg, ap wareheg, siag on hum ale[32]

¹¹akni en mel duruk eleg on deheg, duruk. Omalik ai en wam kembu dewa mot-durukmu obahet waroho yalduk on etma nauk. Eke aren ap amu on enohwesi enenda walug inim sebe duruk.

¹²Aren ap enenggik eleg on seiale lal-enebeheg, enangge del deheg, ap at fam baleg angge wereg on en enenda lisig angge ulug wereg on omano felelengdoho hweleheg, aren ap TUHAN enapeleg on en kembu apne wauk kwe omano lalug kembu heimaldo on etmano apne weheg, duruk.

¹³At angge ap amu on fam fobik nikangge og-numuhup en ulug elamna og-esauk kwit dopno angge nim og-esauk. Ap airoho duruk on aire oluk welam alereg a? Eleg! Aren de mun siag naldo ale etma durukmu re at aire wararuhu. At wararuhu aire onggwareg en duruk katsi ale ambiangma.

¹⁴Ap eke siag humdoho duruk on ai lahe omalik eke weregman, akni en duruk ale omano il hauk kwit en akni abut ilit doho duruk fug.

¹⁵Omalik ai en de ap Israel enengkembu mot-duruk eleg, ite kembu dewa enobahet waroho foruk angge etma nauk eleg, aren ap amu on enohwesi enenda og-enepuk fug,

¹⁶ite ap homi sebele feseheg, enengge deleheg duruk fug. Sum enggan aren on fobik onggo og-humuhuk ulug elamna wauk on oho folo-folo obalma og-esauk. Ap siburu obok deg on nauk on og-eseheg, ap eke asum eleg halug asum ebe sum og-eseheg duruk.

¹⁷At siag duruk[33] ale apeleg, ite angge elamna fahet ap og-esauk kwit dopno angge nim og-esauk fug. At de An den wene melaleg uruk kahi ale omano furoho deheg, An den diroho diuk airoho diuk uruk kahi on holoho deheg, duruk. Omalik airoho duruk on aire akni asiag fam wararuhu fug, ite oluk welaruhu.

¹⁸Ahamdoho, akni seiale eheg, ap enangge deleheg,[34] siag amu on mel deheg, duruk on aire at onggwareg asiag duruk on ambiangma wararuhu.

¹⁹Famen de ap en hein og-og ale uruk kwit, nunggwe ulug omalik ai akni asiag fam waratuk fug. Uruk halug onggore omalik ai fano bekit doho duruk fam. At An nawene melaleg fam dipdoho duruk kwit higitdoho dil lauk fam oluk wereg ai uruk kahi.

²⁰ Ap siag duruk on ai neg de at wararuhu, omalik aire at akni asiag onggo wararuhu fug; ahamdoho akni oho amloho asiag onggo wararuhu fug. Ap fano on ai duruk ale fano durukmu onggo oho fano ale on neg hauk karuhu. Ne ap siag ale duruk on ai asiag onggo re ambiangma ouk-bouk doho hauk karuhu.

²¹Ap eke kwasik duruk on siag ale eke nim duruk ale embeselug, An nawene melaleg fam higitdoho duruk ale indip duruk kwit, fano ale deheg, demdoho deheg, duruk halug at fobik wararuhu fug.

²²At fano demdoho on durukmu, asiag abirangge etma horoho embesehuk. Ne at ebe oluk welaruhu.

²³Haren boruk kwit An TUHAN Mun Leho wereg lahi on en ap siag duruk on waratuk halug nahayeg duruk kahi boruk kahen? Mun eleg! An nenda boruk kahi alere at asiag etma embeselug oluk mundoho welalep fano boruk kahi.

²⁴Famen de, ap fano on famen fano duk fug angge siag duruk ale indip deheg, ap kwasik duruk on en heimaldo ale duruk on omano deheg, duruk on aire oluk welaruhu behen? Eleg! Aren obabut fano ale duruk karuhu on etano en de dem misig oho eke ebet hahuk fug. At aire An nobam dipdoho duruk welam fug angge siag duruk ai fam de ebe wararuhu.

²⁵Foma it eke en diroho uruk ane, ‘TUHAN en de ape kwe nong-hongdoho duruk’ uruk. Famen de ap Israel on henesanggo holiek o! An den duruk kahi ale nape kwe nong-hong doho duruk kahi behep? Hit neg de henape kwe nong-hong deg lahep.

²⁶Ap fano duruk on famen fano duruk fug lit, at siag duruk ale indip dulug duruk halug demdoho wararuhu, aire at onggwareg en siag duruk ale ai fam wararuhu.

²⁷Famen de ap siag duruk on en, siag ale duruk eleg lit, fano duruk ale indip dulug dil lauk halug, at waram fug angge ebe oluk lil aruhu.

²⁸At di siag su siag duruk katsi ale omano fu debesireg siag duruk katsi ale omano embesesimu, at fobik wararuhu fug deg, oluk neg wereg laruhu.

²⁹Hit ap Israel on yei, hiren uruk kwit TUHAN en duruk ale aire nit nong-hongdoho duruk uruk kahep, ai An den duruk kahi ale etma henenda sel kwel uruk a, Israel on suma u? Eleg! Hit neg de nong-hong deg ale duruk kahep!” isi.

³⁰TUHAN Mun Leho wereg on ele uruk kwit, “Yaho ap homi Israel on su. An den de ap homi hundomog it duruk aleroho neg katukdoho biling enebuhuk. Henesiag duruk kahep on mundoho ebeselug henenda aham diek. Henesiag fag duk fug angge embeselug wereg fam henebe siahap henebuhu hayog.

³¹Hit siag duruk kahep ale etma bale feyek, bale folug de henenda nim wenggelduk ale mel, keron amag. Nunggwe ulug hit henesiag onggo waramuhup no?

³²An den ap misig eke wararuhu ale ai nahayeg boruk kahi fug. Hit heneluk mundoho wereg lamuhup en henesiag siag ale etma mundoho embeseiyek. Ulug An TUHAN Mun Leho welahi on en nele mundoho ihi” isi.