Read Ninia Yali YEHEZKIEL 19 Bible Online

YEHEZKIEL 19 - Ninia Yali bible

YEHEZKIEL 19

¹Allah en an mingming napuk kwit, oba suni su ap raja Israel on biren enobahet wilibukwag ulug hweag-nitsi:

²Hisinga re no singa hwe on misig eke hag deg, along deg lit mun nik aleroho deg. At en de omaliki lohap enepuk kwit singa amu on sahalimen kul enepuk.

³Omalik misig eke eneko melalduk bak angge hera dik lauk ale ambiang hundutuk. Ai durukmu at singa lohon atlug bak angge senggelug nauk on atuk.

⁴Unggul unuk-unuk angge omano en at abug holug at senetul ulug kabog duruk. At koru ele habuligmu obukdoho wamburukmu hele waroho foruk, airoho het debelug kwandi fam Mesir fil lisulug lauk.

⁵Isinga ai alemaroho omalik nangno hauk; enda ebereg anyo longgo eheik ulug aire at oluk deg. Airoho atukmu aren omalik amu on eke singa olok on ambong se on amag ulug melalduk.

⁶Singa omalik ai mundoho log atlug singa foma amu on nim mang-mangno duruk. At en bak angge hera dauk ale mamul dauk, ai en ap on oho senggel-enepuk on atuk.

⁷Fak lehet langguk doho[35] kuruk airoho kuruk kwit kota wirig siahap deberuk. At ele koua duruk on ap homi en enesanggo holug Ap homi etma wereg on enowag elek duruk.

⁸Famen de unggul unuk-unuk angge wilayah maseroho wereg on en, di kwe su kwe etma en warik waharuk. It en senetul ulug sum ahe yihik doale forukmu, at oho iren yepdegma anyo ilag uruk.

⁹At anyo singa hukdoho weregma omano kwelabe foruk ai en walug negeri Babel fam etma raja akit feseik lauk. At en ele koua duruk on anyo o Israel on en duk leho on fene omano en holuk no ulug, at ebe enomamneroho kahaleg wereg.

¹⁰Hisinga re anggur indip fano on hag yabuk ik doron ayegma etma hesiloho wilibig on hag deg. Ik etma fululuk duruk kwit logdoho[36] degma, e ebe sururuk kwit anggen yihiruk.

¹¹Enggik de omamne hum degma kisiluk fug ale deg domuk kerajaan fam etma fahet hilingguk ale deg. Onggombi re yit-yatdoho degma anggulog fam sen haukmu hag deg. At ebe yat deg lit enggela heik degma re ap abirangge en inil along doho yande duruk.

¹²Famen de ap enolok atlug enenggik en sarulug, saroho kwenangma bou deberuk. Airoho deberukmu hol timur fil en fun hauk kwit, anggen fano on bug-ap deberuk. E enggik de liatukmu bug atuk em indok yalduk.

¹³Ketia at ebe ili angge ma yaholit wereg, at kwenang bug degma ik en owe duruk fugmu yaho.

¹⁴Anggur ai owag kong baleg etmare indok en feleleng doho nauk, enggik mel anggen mel ai mundoho indok en han nauk. Ketia enggik sehelet de omamne wereg fug; mu re domuk kerajaan on aruhu fug lit deg. Ulug airoho oba suni ai it ap homi Israel on en up sahal fahal doho uruk kamuhup on ai.