Read Ninia Yali YEHEZKIEL 2 Bible Online

YEHEZKIEL 2 - Ninia Yali bible

YEHEZKIEL 2

¹Airoho degma nil hawihikdeg, an daloroho kwenangma norohole belabeg ying atihik. Airoho yinggig lit an hol hauk men de, ele eke an nobam uruk kwit de, “Ap homi waratuk on su inamin. An hat ninim nenele matul anggere” isi.

²Ele airoho uruk on anyo holduk liem etano re Allah Aheime anyo an nendama kwisimu, an nomamneap nobahasi. Ai en an ele ai eke nim holduk men uruk kwit,

³“Ap homi waratuk on su yei, An den hat ap homi Israel nele sahalduk enap anyo enekit mon-hapuk kahi. It aire enombasi en duruk katswa hag doho nele sahalduk enap.

⁴It enenda omamne degma An leho nobaharuk fug. An den hat hebe it enakit mon-hapuk kahi aire An TUHAN Mun Nomamne welahi on en uruk kahi ale etma it hweag-esa loag ulug mon-hapuk kahi,

⁵it holuhup enenda halug oho enerim halug ohore along deg alere nabi it enenggelegma wereg ulug enoluk deg lamuhup ai along.

⁶Famen de hat ap homi waratuk on su yei, it nele sahalduk enap ai fahet hakol enebeheg, ite iren wene nunggwe on oho uhup ale fahet de hakol enebeheg duk fug. Iren hat hele sahaleheg, enalitno habeheg, durukmu re hat hebere no ebeiyug sahalimu weregma hag deg laruhun. Airoho deg laruhun famen de hat hakol duk fug.

⁷An den wene it enobahet diroho suroho iyuk ulug abirangge uruk kahi on etma it holuhup ane eleg ane deg kweleg hweag-esa lakiuk. Ne it enobabut aire wene sahalduk enap aire hat oho holukdoho.

⁸Hat ap homi waratuk on dau u, An den hat hobam hweag-hutuk kahi ale etma holin. Haren it inim wene sahalduk on am fug. Hambilik ele arebelug de An den og-hitmin angge ai nakin” ulug urukmu holdihik.

⁹ Ai en an nil haukmen de enggik an nibil bil hasimure buku hulilip deg angge enggikmu kei degma,

¹⁰buku ai alukwe biren foma-foma fene baleg ma hawihik. Hulilip deg angge ai liming hasimu re ilonggoma etma re oba yatuk ale mel, yei hunu uruk ale mel, nenek-fenek duruk ale mel baleg latsi.