Read Ninia Yali YEHEZKIEL 20 Bible Online

YEHEZKIEL 20 - Ninia Yali bible

YEHEZKIEL 20

¹Tanggal sepuluh bigalem foap on fam nit sabu hetdoho hwik-nenebik lauswama weregman neg de tahun sabit on deg kweleg, ap Israel melal-enepuk on foma an nakit wahaswareg, Allah enda boruk ale heng dukwag ulug mingming nabik wahaswa. Wahaswareg it enebe mundoho an nolohotma hweriek kweleg,

²an TUHAN en ele hweag-nutukmu nesanggo holdihik,

³“Ap homi waratuk on su yei, hele ap homi melal-enepuk on ai fam uruk kwit de An TUHAN Mun Leho welahi on nele diroho eheik ulug hweag-esakin, ‘Hit de henambong si se angge An den hit henobam diroho suroho hweag-nesoag ulug heng napuk kahep au a! An Allah noluk welahi on nunuk fam anggere, Ande hiren diroho suroho hweag-nesoag ulug heng napuk alere nerim deg lahi! An TUHAN Mun Leho welahi on en nele mundoho ihi, eheik ulug hweag-esakin’ isi.

⁴Ap homi waratuk on su yei, it enawene ayo wiroho biling-enepmihin en de mundoho fik-fouk deg lahen a? Aireg lahen halug de ketia enebin! Haren it fam enomba enembusi en angge di siag su siag naldo ale neg duruk katswa on etmano fahet ebet esakiuk.

⁵ An den hweag-hutuk kahi ale su it hweag-esakin. An den Israel mundoho en-enepihik deg, it fahet hombuk baloho leho feserihik. O Mesir etman An it enekit enamatuk kwit nele it fam uruk kwit, ‘An de hit henakni TUHAN Allah’ irihik.

⁶Nukoho ai salim ai An den hit og-heneplug wilibik lahukdeg kwenang hit og-hesahukmu etma kwenang mun hesilig mu di angge su angge humdoho weregma, kwenang aire o kwenangma suman mun fanoma etma henobahaik lahuk ulug hombuk baloho hweag-esawihik.

⁷An den it enanggembu ilit angge heimaldo angge famen iren enembono deg angge etmano hwik-esowag ulug hweag-esawihik, ne eke An nebe it enakni TUHAN Allah degma re, iren kembu Mesir on mot-duruk kwit enebe emere fahat dahup hayog ulug hweag-esawihik.

⁸Famen de it An nele sahalduk kwit, An nele holduk ale enerim boruk katswa. Iren de kembu it enebe emere feseruk on ilit deg etma hwik-esauk ale enerim boruk katswa ne kembu Mesir on mot-duruk ale oho bok atuk katswa fug. It enebe etma wereg liem An den nolok it fam femin ulug fouk dirihik.

⁹Famen de iren ap homi unggul unuk it weregma etma on en An nunuk siahap debouk no ulug An den airoho dirihik fug. It unggul unuk etma inil hanim An den nele unduhuk foruk kwit, An den unggul unuk Israel ai o Mesir en og-eneplug wililik lahuk ulug, unduhuk ferihik.

¹⁰Airoho irihikdeg An den it og-eneplug Mesir en wilibik waharihik deg o iliangge leikwe og-eneplug waharihik.

¹¹ Etman An den nawene melaleg og-eseheg, ne ap homi wene melaleg holoho duruk on de enoluk mundoho wereg anggere wene diroho diuk airoho diuk ulug hweag-esawihik on etmano holoho neg duruk kamag ulug hweag-eseheg, dirihik.

¹² An den it nukoho sabat aire An nim it nim sali wat-wat atuhuk on eneg ale degma leho feheg, ne An TUHAN en it ai An nobahet ulug eneko fahat deheg, dirihik ale anyo ebet esauk kamag ulug deheg, duruk kamag ulug hweag-esawihik.

¹³Famen de lekma ilianggema etman de iren An nele sahalswa. Iren An nawene melaleg etmano sahale feheg, diroho diyuk airoho diyuk ulug An den hweag-esawihik on omano holoho neg duruk on de enoluk mundoho welamuhup ulug hweag-esawihik on anyo sebeleho feheg dusa. Eke iren de nukoho sabat anyo mun emere fousa. Ai fam de lekma ilianggema etman de nolok enobam fohuk mu it elehapdoho fesehuk ulug wenggeloho ferihik.

¹⁴Famen de An den nonggwareg nunuk along baloho re, it ap enunggul unuk domog en An den ap Israel on o Mesir en og-eneplug wilibik waharukmu neauswa on en sebeloho nobahauk no ulug airoho dirihik fug.

¹⁵ Lek ma ili angge fene etma lauk kwit, unggul unuk Israel on fam nolok enobam foruk kwit de, it aure kwenang mun hesiligmu, di angge su angge mel sigdoho weregma, ne o kwenangma en de o etma neg de kwenang mun ibik-ebema, it enobam fik-fouk degma etma re og-eneplug kuhuk fug irihik.

¹⁶An den nolok enobam airoho ferihik ale aire iren An nele melaleg omano furoho duruk fug angge deheg, diroho airoho diyug ulug hweag-esauk ale omano sahaleheg, nukoho sabat anyo emere feheg, duruk katswa ai fam. It de it enenggembu mot-duruk ale neg enahayeg deg latswa.

¹⁷Famen de fobik en An den it enelaheg esawihik deg, ai fam de An den it enebe o lei ilianggema etman enowatihik fug.

¹⁸Ahamdoho re ap sauwe it enesahalimu welatswa on etma An den diroho komo enepihik, ‘Hit wene melaleg wene henomba henembu en melalfag wene etma mutlug lauk kam fug. It enebut wal halug duruk kwit, kembu mot-duruk fam emeroho fahat da fug ulug komo-enepihik.

¹⁹An Henakni TUHAN Allah, An nawene melaleg nim diriyuk su diyuk nim holoho neg duruk kamek.

²⁰An henakni TUHAN Allah welahi ale anyo hit ebet-heseheg, ne An nim hit nim sali wat-wat atuhuk ale anyo eneg deg welaheg, deg lamag ulug de nukoho sabat ai leho foruk kamek’ ulug komo enepihik.

²¹Famen de it sauwe on ai en oho nele sahalduk kwit wene melaleg dahandoho deheg, wene diroho diyuk airoho diyuk ulug hweag-esawihik on anyo holoho duruk halug de it enoluk welamuhup irihik on anyo dipdoho duk eleg angge welaheg, duruk katswa. Ne iren de nukoho sabat anyo mel emere foruk katswa. Ai fam de o iliangge leimu etman An den it enebe abirangge enowatmin ulug An nolok ahe anyo fik-fouk deberihik.

²²Famen it unggul unuk unggul unuk angge en An den unggul unuk Israel on o Mesir en og-enepluk wilibik waharukmu neaswama, Nunuk siahap deboukno ulug dirihik fug.

²³ Lek ilianggema etman An den hombuk balduk kwit, it aire del foldoho unggul unuk amu on wereg kwe mon-henebuhuk ulug hombuk baldihik.

²⁴Aire iren Nawene melaleg anyo dipdoho duk eleg angge deheg, diroho diyuk suroho diyuk wene anyo dahan doho deheg, nukoho sabat anyo emere feheg, ne kembu it enombawi en mot-duruk katswa angge omano mot-deheg, duruk katswa ai fam dirihik.

²⁵Ai duruk ale en de An den wene melaleg siag on mel, diroho suroho diyuk etma eneluk enepuk eleg on mel og-esawihik.

²⁶Iren di on su on folug yalduk angge fam en mel, it enonggwareg enomaliki wandeba on waroho yalduk on fam en mel, emeroho fahat dauk kamag ulug fotog esawihik. Airoho dirihik ai fam de iren An nebe TUHAN welahi ale anyo enoluk amag ulug unggum og-esawihik.

²⁷Anggere, ap homi waratuk on su, haren it ap Israel on fam de An TUHAN Mun Leho welahi on en it fam uruk kahi ale su hweag-esakin: Eke wal-heheg it henembu henombasi ai en nangginoho duruk kwit An siahap nobahakeg, An nobam enenda dipdoho duk eleg angge welaheg, duruk katfag.

²⁸An den it og-eneplug kwenang mundoho sali wat esawihik mu omano waharihik. Mu, iren duk-duk yaron mel e humon wilibig on omano mel hilaukwit haswareg, omano mot-duruk kwit, obahet waroho indip kwe etma yalduk katswa. It en An nolok ap kwelap napswa aire it en anggur ahalue mel kembu enda ahayeg hoag ulug waroho yalduk angge mel omano yal-utuk katswa ai fam nolok atsi.

²⁹An den it fam hein og-esauk kwit, ‘Duk-duk yat on fene etma nunggwangge wereg en akit laharuk kahep?’ irihik. Ai fam de etano liem en angge obale etma unuk de ‘Obale Lehoma’[37] uruk katswa.

³⁰Anggere An TUHAN Allah nebe Mun Leho welahi on en ap homi Israel fam nele uruk kahi ale su hweag-esakin, ‘Nunggwelug siag orohole aireg on it henambu-henombasi en duruk katfag hag on etma duruk kahep? Iren duruk katfag hag de hit oho re kembu henebe emere henobaharuk on etma mutlug lauk kahep.

³¹Ai neg fug, ketia huli en anggere di on su on mel henomalikisi omano mel, kembu heimaldo mireg angge omano fahet folug waroho yalduk kahep. Airoho duruk kwiren de henambong si se angge An nobam di ale su ale hweag-nesoag ulug heng nabik waharuk kahep au a? An nonggwareg nebe Allah noluk mundoho welahi on, TUHAN Mun Leho welahi on nunuk fam anggere, hit de An nakit di ale su ale fahet heng-nabik wamluhup fano ulug hweag-hisihi ha fug ale deg.

³²Hit de it ap o kwenang amu on mel, unggul unuk amu on omano mel, en e mel, helep mel mot-duruk ale omano enebut wauhupdeg higit doho duruk kahep. Famen de hit henenda boruk kahep alere higit aruhu fug’ ulug eheik ulug hweag-esakin” isi.

³³“An Allah noluk welahi on TUHAN Mun Leho on, nunuk fam anggere hit henenda wenggeloho ulug An nolok en hweag-hesa, hit de An den nabut hape fam nele omamne fam melal-henepukmu re An nomamne welahi ale anyo hiren oho hahup. Hit de An den di kwe su kwe del fol hesahuk kwe omano en andog doho og-heneplug henobahaik waruhuk.

³⁴

³⁵Airoho henobahaik waruhuk deg hit An den og-heneplug ‘Lei di ap su ap unggul unuk’[38] urukmu ai og-heneplug henobahaik lahuk. Etma henobahaik lahukdeg etman de hit nim nenerohole kwelabeg deg lit henawene bilinggoho ayo wit-henebuhuk,

³⁶aire An den it henombasi henembusi fam Sinai iliangge leimu en dirihik hag doho duhuk. Ulug An TUHAN Mun Leho welahi on en nele mundoho ihi.

³⁷An den sali wat-hesawihik ale hit holoho neg dukwag ulug An den omamneroho melal-henebuhuk.

³⁸Olok ahun mel wene sahalduk on mel, hit henesahalimu en An den lisoho wilibi fesehuk. It An den og-eneplug enenggwenang it enebe ketia weregman wilip aruhuk deg, it nikangge Israel on enanggwenang fam etma sombandoho loag ulug hweag-esahuk fug. Ai fam de An nebe TUHAN welahi ale anyo hit henoluk amuhup” isi.

³⁹TUHAN Mun Leho wereg on ele uruk kwit, “Hit ap homi Israel on yei, ketia re we hiren lahe. Henenggembu etma neg mot-dil lauk kwit siag duruk kamluhup halug aire hiren neg! Famen de ai mundoho debelug hit fobik An nele furoho holoho duruk kamuhup. Ne An hiren henanggembu omano fahet foruk angge walug og-irik waharuk kwit, nunuk amu eneg on anyo eke siahap debehup fug.

⁴⁰Aire kwenang Israel en on fam An nandom anggolopma[39] amu eneg on fam en emberimmu etma, hit henunggul unuk Israel on abirangge en An napne wahup. Etman de An den hit henobam nahayeg henebeheg, hiren An nobahet folug og-nutuk on nenda fano fam weheg, nobahet foruk angge mel, finik-fano angge eneko folug og-nutuk angge mel weheg, duhuk.

⁴¹Hit o kwenang del fol deg kwe etman An den andog heneplug henobahaik waruhuk deg, An den hit kabog henebuhukmu hiren nobahet TUHAN nenda nahayeg hoag ulug waroho yal-nutuk angge etma wauk karuhuk. Ai fam de di ap su ap enunggul unuk abirangge de An su Allah Mun Amu eneg on ulug enoluk atuk kamuhup.

⁴²An den lahe hit og-heneplug kwenang Israel en on, kwenang An den it henombawi fam sali wat-esawihikmu etma henobahaik waruhukmu, hiren de An TUHAN anyo heneluk amuhup.

⁴³Etman hiren siag naldo mireg ale duruhup on etma ebet hahup. Airoho ebet hahupdeg de hiren duhup ale omano re me henaperoho hag ebet hahup.

⁴⁴An den nunuk along baloho ulug hit airoho henobahakuk, ne hit henobabut duruk katuhup ale mel, hit henoluk siag fam duruk katuhup ale mel ambiangma ilitdoho ulug henobahakuk fug. Ai fam de hit ap homi Israel on en de An TUHAN anyo heneluk amuhup. Ulug An TUHAN Mun Leho welahi on nele mundoho ihi” isi.

⁴⁵TUHAN ele eke an nobam uruk kwit diroho isi,

⁴⁶“Ap homi waratuk on su yei, foma selatan fil fu hakin. Kwenang selatan fil ai bet deheg, ohwei etma fil ai abug baleheg diyuk.

⁴⁷Haren ohwei ai fam hweag-utuk kwit, An TUHAN Mun Leho welahi on en hat fam diroho hweag-hereheik iyuk, ‘Holin! An den indok harep ohwei ai fam fisaruhukmu e humdoho kwenang haren ai fam wereg on etma e bug on oho oluk on oho abirangge harep nahu. Airoho harep naukmu re indok ambulbul aire nahuluk fug ale deg laruhu. Indok harep aire selatan fil en melelang dil de utara fil nil laukmu re ap homi mundoho en indok olok hahup.

⁴⁸It mundoho en fu deberuk kwit de aure An TUHAN en indok harep ai fisareheikma re, ap eke en ulug oho eke nahuluhup fug,’ eheik iyuk” isi.

⁴⁹Airoho isi famen an Yehezkiel en nenda anggin napuk ale fahet hweag-utuk kwit, “TUHAN nakni Mun Leho welahen on, an den wene ai on ukwag ulug mingming napuk eleg! An den wene hwenareg ale neg urukmu fu deberuk fug lit ap homi mundoho en enehumu siag hauk” ulug hweag-itihik.