Read Ninia Yali YEHEZKIEL 21 Bible Online

YEHEZKIEL 21 - Ninia Yali bible

YEHEZKIEL 21

¹TUHAN ele an nobam hweag-nutuk kwit, diroho isi,

²“Ap homi waratuk on su yei, Yerusalem ai hururung debein. Obale wene kabog duruk kwe etma hururung debeyuk. Ap homi Israel kwenang fam on ai fahet enenda ebetuk kamag,

³ulug An TUHAN en nele diroho uruk kahi ai, ‘An su re hit heneselei on welahi. An den nenggarog lisoho hit abirangge, siag duruk on et fano duruk on et henowaruhuk en deg lahi.

⁴An nenggarog fam ap abirangge utara fil en selatan fil nim yabuhuk.

⁵Ai duhukmu ap abirangge en de An TUHAN en nenggarog lisoho wilauk kwit aire fobik eke sombandoho yohwatuk fug ulug eneluk amuhup.’

⁶Ap homi waratuk on su yei, it ap homi Israel abirangge inil hanim, hahumu siag deheg henda wareheg duruk kwit hag doho, nenek yoba deheg, hele nggureheg, din.

⁷Airoho durukmu iren hein og-hapuk kwit, nunggwe ulug hele nggururuk kahen abi uruk halug, it enobam uruk kwit de, wene fobik waruhu on fahet duruk kahi uruk nu. Wene ai en de it enenda elek deheg, enenggik amumla eleg aheg, enelenggen elek deheg, enahaiyeg mun eleg aheg, duhup. Li demdoho horog aik waruhumu, abirangge ai higit aruhu. Ulug An TUHAN Mun Leho welahi on en nele mundoho ihi” isi.

⁸TUHAN ele an nobam hweag-nutuk kwit,

⁹“Ap homi waratuk on su yei, fobik aruhu ale fahet husumbi uruk kamin! Airoho uruk kwit haren ap homi etma hweag-esauk kwit, An TUHAN en wene diroho uruk ulug hweag-esakin, ‘Karog misig eke wereg, karog ai olokdoho maho fohup.

¹⁰At ai olokdoho mahoma ap naldukam ale degma, beik-beik anggeroho yebelelang duruk karuhu. An nomaliki fahet de wene melaleg mel, diroho diuk airoho diuk ulug hweag-esawihik on mel sebeloho embeselug[40] durukmu re, enahayeg eleg aruhu.

¹¹Karog ai hundig wauk kamag ulug aeg maho folug welamuhup, maho folug ap watuk on enggikmu foruk karuhu.

¹²Ap homi waratuk on su yei, hat de oba yareheg, nggareheg duruk kamin! Karog aire An nomaliki nim weim yabuhup en fouk degma. Ap Israel melal-enepuk on mel it ap homi enunggul unuk abirangge mel, de karog ai fam daloho enowaruhupmu waramuhup. Anggere hahumu siag en hamig bou duruk kamin,

¹³An den Nomaliki enebut balduk kahimu, it en enobabut hwal dauk ale enerim deg halug de, abirangge etma it enobam aruhu, eheik ulug hweag-esakin’ isi.[41]

¹⁴Halug de, ap homi waratuk on su, haren fobik aruhu ale fahet wene husumbi uruk kamin. Karog anyo en ap warikoho indip duruk ulug eneg ale henggik dag din. Karog aire mun nakol[42] humon deg.

¹⁵Karog ai en dil ale fam de An nunggul unuk on enakolap kwelabe fesesi mu enambong sereg on anyo eleg aheg, dungdoho wat-deheg, dusa. An den it enobam kota ai karog[43] oweal lebegdoho duruk hag deg lit ap watmin ulug deg angge ai fam henowaruhuk ulug nele wal-deberihik.

¹⁶Hat karog ele foma-foma lebe lebe maho lahen on su, haren hebe bekit fil et hware fil et lebeg eseheg, ne eke hat henda boruk fil[44] etmano mel lebeg eseheg, din.

¹⁷An oho nenggik dag duruk katlug, An nolok ahe laharuk on anyo oho sebel atmisi. Ulug An TUHAN en nele mundoho ihi” isi.

¹⁸TUHAN ele an nobam uruk kwit, diroho isi,

¹⁹“Ap homi waratuk on su yei, haren kwe biren at raja Babel on karog walug waruhu kwe ilit din. Kwe ebe birenet de o indip misig on fam en yako wilibigmu re, kwe eke re o Raba kota it Amon on en ai fil yaho laruhu; ne misig eke re o Yerusalem kota it ap homi Yehuda on en enobam fak lehet hukdoho oho on ai fil doho yaho ale ilit debeyuk. Koboke ebe hwandohal[45] durukmu eta re e arep kahaleg koboke ambiang hwaleg lamag ulug eneg angge unduhuk feyuk.

²¹Raja Babel on aire e arep kahaleg unduhukmu etma unduhuk lamag. Airoho wereg lit de aren koboke ke fene lamin ulug hweag-nomag ulug de anggembu omano en hweag-nomag ulug heng-enebeheg, dog angge aham-faham[46] eseheg, wam waroho kembu fahet foruk on etmano senggeloho endama abut baleheg, duruk kamag.

²²Durukmu dog enggik bekit fil wahu on anyore Yerusalem fil deg laruhu! Airoho deg halug aire raja en kota Yerusalem huhul kukwag ulug deg laheg, weim abukoho kuk saleheg, tentara en enangge bin kuruk angge omano abut hwaloho foukwag ulug mingming enebeheg, o Yerusalem sokole hilinggig on fene dung debeil laheg, kwenang habuloho fak lehet nim higit debeik lahakeg, ik kalog hwaloho kwelabeheg, duhup.

²³Ap homi Yerusalem on en de Babel nim wene sali watswama re, it fobik bin enowarik kuhup ale fahet demdoho bohup fug. Famen de wene husumbi su fam de, it enesiag onggo san-enebuhup ulug enenda wenggele fesehun.

²⁴An TUHAN Mun Leho welahi on en wene su it enobam uruk kahi, ‘Hit henesiag humdoho etma enam atsi, ap homi abirangge en it siag duruk ulug eneluk atswa. Hit kwasikdoho duruk kahep ale aire henebut duruk ale fam eneg atuk. Ketia re An den hit henebe unggum og-heseheg, ap heneselei on enenggikmu henobahakeg,’ duruk li mun horog aik waha.

²⁵Ne raja Israel on fam de An nele hweag-utuk kahi su, ‘Hat raja holok on mun TUHAN ele sahaleg ale duruk kahen on su yei! Li hat unggum ahae fotog on og-hutuk li mundoho horog atuk ai.

²⁶An TUHAN Mun Leho welahi on en nele mundoho ihi ai. Hat de mahkota kweraroho embeseheg, hunggul asum bug deg lahen on ai mel nonggoloho embeseheg, din. Ketia re o obabut mundoho aham aha. Ap enenggik eleg on leho feselug de it enalong welamag ulug og-esakin! Ap enalong wereg on etma it enonggwareg hwale fahat dauk on fam en belabe fesein!

²⁷Kota su An den fobik mundoho luluhun debehukmu di kwe su kwe olun neg deg laruhu. Famen de wene ai re ap An den kota au luluhun dukwag ulug enetihik on ai ketia kwik waharuk halug aruhu. Ap ai fam An den kota au enggikmu feikohon lahi eheik’ iyuk” isi.

²⁸ “Ap homi waratuk on su yei, fobik aruhu ale fahet husumbi hweag-esakin! Haren ap homi Amon on en ap Israel on enalitno enepuk katswa on fam, An TUHAN Mun Leho welahi on en nele diroho eheik ulug hweag-esakin, ‘Karog misig eke bal-henebikoho mun fik-fouk deg; karog ebere ap binggi warukwag ulug enggat lebe-lebe oweal lebeg haukmu hagdoho mako wereg.

²⁹Hit hena og hauk hagdoho fam hauhup on aire mun seiale, ne fobik diroho aruhu ale ulug husumbi uruhup ale oho henele en laloho seiale uruhup. Hit de henolok mun siag deg lit TUHAN ele sahaloho duruk kahep on welahep, ne hit unggum mun ahae fotog doho og-hesauk li re mundoho horog aik waha. Karon ai en de hit henanggolop kong henebuhu.

³⁰Ap homi Amon on yei, henenggarog de ahunggwa elma kwelabiek! Hit de An den obale hit henebe endag aheg, wal-aheg duruhupmu etman henawene ayo wiroho biling henebuhuk.

³¹An den hit henenggulmu nolok ahe lahaik waharuk on ai henobahakuk. Hit henebe re An den ap enolok deg lit ap eleg-ap debeseruk ale fahet mun milil-melal deg on enenggikmu henobahakuk.

³²Hit mundoho indok en nahup. Henamep henonggwareg henanggwenangma hililoho wambuhu, ne ap misig en oho eke hit fahet ebet henepuk karuhu fug. Ulug An TUHAN en nele mundoho ihi’ eheik ulug hweag-esakin” isi.