Read Ninia Yali YEHEZKIEL 22 Bible Online

YEHEZKIEL 22 - Ninia Yali bible

YEHEZKIEL 22

¹TUHAN ele an nobam hweag-nutuk kwit, diroho isi,

²“Ap homi waratuk on su yei, hat de o kota ap watuk kwit neg wereg obam ai bilinggukwag ulug mundoho fik-fouk deg lahen a. Iren mun heimaldo ale duruk katswa on etmano unug-esakiuk” isi.

³TUHAN Mun Leho wereg on en wene diroho su Yerusalem on hweag-esowag ulug mingming napsi, “Hat de ap homi hat hobam on etmano enebe humdoho enowareheg, ne haren kembu buhun dirihin angge omano mot-duruk kwit hebe emere fahet deheg, duruk katihin ai fam mun siag dirihin. Ai fam de An den hat hebe di ap su ap en mel o di o su o wereg enap en mel horog-ap habeheg, unda yag habeheg, duruk kamag ulug embeserihik. Anggere hat hawene biling habukwag ulug on mel, ne hebe holuk wereg ale mel de mundoho ahae fotog aikohoreg.

⁵Hat en hindik-hundig wene melaleg mel, diroho airoho diuk ulug melaleg wereg on mel sahalduk kwit neg welahen ai fam de ap homi o kwenang yat kwe mel horog kwe mel wereg on en enalitno hapuk kamuhup.

⁶Israel melal-enepuk on enebe abirangge en de it enonggwareg enomamne fam neg dip deberuk kwit, ap humdoho warenepuk katswa.

⁷ Ap homi hat on wereg oman ap misig en oho eke enekni enesinga leho feseruk fug. Hat en ap bohon hele en lale feseruk kwit, homi sohwe on mel, omalik wetien on mel enangge dopnoroho hwelauk kahen.

⁸ Obale An mot-napuk kwit kabog duruk kwe omano mel emere foruk kwit, nukoho sabat anyo fano-ap deberihin fug.

⁹Ap homi hat en on oma wereg on de ap amu on enowarukwag ulug wene enele en lal halug siahap enepuk. Nin de kembu owam waroho foruk on ino nauk ale enenda deg. It foma re hwelani duhum hesangge enepuk ale enambono on wereg.

¹⁰ It eke en de homi enenda walug isinga kulduk on inim nohokeg, nin de homi dugwi hauk kweleg hup inim nohokeg,

¹¹it foman de, eyamal hwe mel, ap enohwesi on mel, aut isinga eke en on mel, inim sebereheg duruk.

¹² It foma re ap warukwag ulug onggo bale feserukmu enowatuk on aheg, foma muli enamep hwenangguruk on aheg, ap homi it enunggul unuk enomamne fam sebeloho feseruk kwit welaheg, duruk on wereg. It enebe abirangge en An enapeleg atswa. An TUHAN Mun Leho welahi on en nele mundoho ihi.

¹³Famen de ketia An den ap heraharuk on mel ap watuk on mel, etma al berel enebik kohon lahi.

¹⁴An den hat unggum mundoho og-huruhukmu henggik hambong seroho lahabe feheg, homamneroho welaheg, dehen ha alereg? An TUHAN Mun Leho welahi on en ihi. Anggere ihi ale eta higitdoho duhuk.

¹⁵An den ap homi hat nim wereg on del foldoho di kwenang su kwenang mel, unggul unuk unggul unuk mel, wereg kwe omano mon-enebuhukdeg, An den hat kwasik duruk kahen ale ai bok-ap habuhuk.

¹⁶Hate unggul unuk amu-amu on en de enelitno hapuk kamuhupmu, hat en An TUHAN anyo holuk aruhun” eheik ulug hweag-esakin isi.

¹⁷TUHAN ele an nobam uruk kwit,

¹⁸“Ap homi waratuk on su yei, ap homi Israel ai An nobahet de duk fug ale on atswa. It aire logam apuhuno hahambik deg on mel, tembaga mel, timah mel, bosie mel, perak indok fam werako abut bale folug apuhuno timah singon mel hag deg.

¹⁹Airegma, ketia An TUHAN Mun Leho welahi on en it fam nele uruk kwit it aire enebe logam duk fug ale deg on hag deg. Ap en perak anggen mel, perunggu mel, bosie mel, timah singon mel, timah kuron indok nonggwalegma kur amag ulug kwelapuk hag, airoho it An den kabog enebuhukdeg og-eneplug Yerusalem waruhukdeg, An nolok humon fam logam anggen indokman abut balukwag ulug yonggwalduk hag, it yonggwal enepuk kwit hahukdeg, hanonggo enepuk karuhuk.

²¹Yu An den it Yerusalem andog enebuhukdeg An nolok anyo indok hag it enapma fisako kwelabuhuk mu, it alkan damukdoho nahup.

²²Perak indokman abut balduk anyo hag it Yerusalem on enebut baluhuk. Ai fam it en An TUHAN en it fam nolok anyo nenobam fesi ulug enoluk amuhup” ulug hweag-nitsi.

²³TUHAN ele nikangge an nobam uruk kwit, ele diroho isi,

²⁴“Ap homi waratuk on su yei, ap homi Israel on fam de kwenang iren on de emet atsi ulug hweag-esakin. Airoho deg ale ai fahet An den nolok en unggum og-hesauk kahi ai.

²⁵It melal-enepuk[47] on de singa en bak angge nalug ngin dil waharuk hag duruk. Iren de ap homi mundoho ware feselug enangge hohouk doho walug inilmu atuk angge mundoho walug waharuk fam, homi humdoho sohwe neg atlug wereg.

²⁶ It imam Israel on en nawene melaleg omano sebeloho feheg, no di angge su angge An nobahet duruk angge ulug eneko wereg angge omano emere feheg duswa. Iren de ke on ai fenaho on ke on ai saliog on ulug amu-amu foruk eleg. It en ap homi fam nin suma saliog angge on nin suma fenaho angge on ulug agama fam melaleg wereg ale anyo ap homi hweag-esauk eleg. Iren nukoho sabat anyo sebeloho embeselug duruk ai fam Ande it ap unggul unuk Israel on ai en siahap napuk.

²⁷It pemerintah fam yabuk duruk enap etmare no olomene serigala en bak angge dilip dalap hauk hag on wereg. Iren de enangge dungdoho hwelaul ulug ap watuk ale neg duruk ai.

²⁸It nabi re it en siag etma on heraho lit weregma, it aire ap en obahat fam sing deg kweleg dimeng damulduk hag deberuk. Iren ena og-hauk hag fam hauk kahe ulug uruk on etmare seiale laloho uruk. Airoho eke fobik diroho aruhu ulug uruk on etma oho seiale uruk. Iren uruk kwit, wene diroho suroho ulug uruk on etma re TUHAN Mun Leho wereg on en ukwag ulug hweag-neseheik ale uruk kahe uruk famen de, ai mun seiale, Ande it ninim eke nele matuk kahi fug.

²⁹Ap dungon de seiale uruk kwit ap homi enangge del dauk. Iren ap kunggu on omano enendan bolug ale neg siag-biagdoho debeseheg, ne ap bog on enangge eke nim dopnoroho hweleheg, duruk.

³⁰It ap Israel enesahalimu en ap fak lehet wuruk ale deg on mel, ne An nolok hang doho fak lehet oho on luluhun esamin ulug durukmu o kwenang ai ili alele oko fak lehet moluluk deg kwe omano unduhuk on mel, eke wereg ane ulug An den hera duruk kahi famen eke hweaharuk kahi fug.

³¹Ai fam de ketia An nolok anyo it fam foruk kahi, iren siag duruk ale ai ambiangma re indok en hag An den it elehap debesehuk. An TUHAN Mun Leho welahi on en nele mundoho ihi” isi.