Read Ninia Yali YEHEZKIEL 23 Bible Online

YEHEZKIEL 23 - Ninia Yali bible

YEHEZKIEL 23

¹TUHAN ele an hweag-nutuk kwit, diroho isi,

²“Ap homi waratuk on su yei, hwelani biren owe aut nim wereg.

³It enebe duhum deg li re it o Mesir welatswa. Etman duhum nik doho ap ahap enapeleg angge welatswa ale anyo eleg atswareg hambena duruk on atswa.

⁴Hwelani eta wandeba on unuk de Ohola; ai Samaria fahet ilit angge doho. Aut de unuk Oholiba; at aire Yerusalem fahet ilit angge doho. An it biren eta og-enepihik deg birenet enomaliki endag enepihik.

⁵Ohola anyo An nohwe oho kweleg famen alongdoho hambena duruk on atsireg Asyur on enda hundig enepuk kwit enobahet duruk katsi.

⁶It etma re tentara sum il ambi on mep on neg wandeg latswa enap, ap enunggul unuk on dog yapuk enap, enebe yabuk leho on wereg enap; it enebe abirangge re ap sehen foroho on enebe no kuda anduhunmu lauk enap, enerohole mun ebereg enap.

⁷It ap yain-kain on etma nim Ohola en babi duruk katsi. At ebene mundoho ahanhan duruk fam kembu iren mot-duruk on omano fam ebe emere fahat dauk katsi.

⁸At hundig hambena neg dil, o Mesir at ap ahap apelegman keram ap ahap oluk atsimu omano en duruk katsi hag duruk katsi. At ebe dotman angge ap nim nohosimu hambena on debeswa.

⁹Ai duruk katsi ai en de at de An den it enda hundig enepuk on Asyur enap etma fam og-esawihik.

¹⁰Iren enomamne hasimeg at abulukwe kohouk debehup deg, karog fam ware fohup deg omalikisire del dahup. Di kwe su kwe etman de hwe anyo ambiangma hahu ale ai fahet dindilduk kwit neg welamuhup.

¹¹At Oholiba aut anyo re owe duruk ale il hahureg en famen, at enda nauk ale along deg lit owe Ohola en duruk katsi ale maben hag famen aren neg babi alongdoho dil lauk karuhu.

¹²Oholiba oho ap Asyur on etma mun ambono besimu, aire it ap kuda anduhunmu huratlug lauk on en sauwe ebe on, ap enunggul unuk enap, eneyabuk lehoma duruk enap, it tentara enasum il mep ambi on wandeg enap etma fam ambono enepsi.

¹³An den haukmen de Oholiba aire abut mun siag humon owe en duruk katsi hag duruk katsi.

¹⁴Siag eke nim dil eke nim dil de Oholiba abut mun siag atsi. At de ilit angge obahat fam ahalue il ap mep hag on fam ilit deg on omano fahet enda lisuruk katsi. Ilit angge etma re ap Babel enap sehen seneg enap enowesi bahaluk il ebe on bugdoho enunggul asum ililoho bibo uruk angge ahut ilit deg fahet enda duruk katsi.

¹⁵

¹⁶At Oholiba en ilit angge etma il halug, ebene ahanhan durukem de yonggo Babel ap sehen seneg enap enowesi etma enakit mondorik lauk katsi.

¹⁷Airoho mondotukmu re it watlug at nim hup nohoruk katswa. Nohoruk kwit de iren at ebe mun ilmu siagdoho inim nohoruk kwit deberukmu re aren it omano me aperoho kumu esauk katsi.

¹⁸Airoho dulug de aren enameg hambena duruk kwit, ebe hummu etmano en inil neoag ulug duruk katsi. Airoho durukmu An den at owe fam me naperoho kumu hauk katihik hag at fam oho kumu ha ale me nape napuk katsi.

¹⁹Eke salim eke salim at babi duruk neg katsi, at de ebe duhum deg li o Mesir en hambena duruk katsi ale etano nim de aham deg fug mun higit deg.

²⁰At de ap ahap ahan han humdoho duruk on nim, ne it ap no kuda yohombuk on en amolmol humdeg hag enamolmol durukem wereg on nim hup nohoruk ale fahet ambono deg latsi. (

²¹Hat Oholiba yei, hat de hebe duhummu, ap Mesir on en hebene dop-dop ale durukmu hambena duruk katihin ale etma duruk kwit hebe siaho fahat dauk katihin omano hag dauk kahen.)” Ulug isi.

²²TUHAN Mun Leho wereg on ele diroho isi, “Hat Oholiba yei, hat henda hundig enepuk kahen on omano nim de mundoho ko hapsi ane, famen de iren hat fam enolok habeheg, hukdoho kwelap habeheg, dukwag ulug An den it enenda ahe kwelabikoho lahi.

²³An den hat henda hundig enepuk kahen on enebe abirangge o Babel on mel, Pekod on, Koa on, Asyur on mel, ap Kildea on mel etma kabog doho og-eneplug hakit feseik waruhuk. An den hat hakit ap sauwe ebe on eneyabuk leho on, enunggul unuk enap, yabuk ebema duruk on, ap sehen seneg enap enowesi no kuda anduhunmu huratlug lauk enap etma feseik waruhuk.

²⁴It en utara [48] fil en tentara humdoho kereta dog yapuk kwit lahalug lauk on mel, kereta siburu nauk on walug lauk on mel, fam waharuk kwit hat howarik kwik wamuhup. It de dog bei angge fam enebe mapnu deg lit topi baja on wandoho hat huk habik wamuhup. It enawene melaleg wereg ale fam iren hat hawene biling habukwag ulug An den embesehuk.

²⁵An nolok hat hobam weregma anggere, it enolok en hat siahap hobahaukwag ulug fotog esahuk. Hambiang mel hesanggo mel iren baluhup, homaliki enoluk kengge hambog heg indokma kwelap enebuhup.

²⁶Hat hebe habulukwe kohouk hobahakup deg, halili angge omano del dahup.

²⁷Airoho duhupmu An den hat hebe ahanhan hapukmu duruk kahen on mel, hambena dil kauk kahen on mel, babi o Mesir en angge duruk kwit welahen on mel, bale fohuk. Haren de kembu o kema on ulug fam oho ite Mesir fam oho eberuhun fug” isi.

²⁸TUHAN Mun Leho wereg on ele uruk kwit, “An den hat hebe oko ap me nape on haren herim enepuk kahen on etmano enenggikmu hobahakuk.

²⁹Iren hat enerim hapukmu atlug de haren duruk kahen ale ambiangma anggen yihik etma iren del dauk kamuhup. Hat hebe re habulukwe kohouk doho hahap enamoho hambena duruk on ulug hobahakupmu ap homi en selegma dim-kumu hapuk kamuhup. Aire haren henda ahanhan hapukmu hamolmol en

³⁰duruk kahen ai fam hat hebe fam siag ale etma aik waruhu. Hat de di ap su ap enunggul unuk fahet hambena duruk on atihin deg haren it enangkembu fam hebe emere fahat dauk kahen.

³¹Hat de howe en duruk katsi ale muko duruk kahen ai fam de An den hat howe unggum og-itihik ale eta higitdoho hat oho og-huruhuk” isi.

³²TUHAN Mun Leho wereg on elere, “Howe ahaik hwenanggeg aire hat bil hahun ukwag aire humon oholuk yatdoho ilonggoma hwenanggeg. Ilonggoma hwenanggeg anggere, bilip kokog hapuk on ap humdoho en enerim hapuk on hwenanggeg.

³³Howe Samaria on ahaukwag aire, ilonggoma akol on mel alberelduk on mel hwenanggeg, anggere haren etma hat mundoho nahundeg durukmen de, hat hebe siomo deheg, ouk humon heheg duhun. Ai en ikwag ai erap deg angge etma fam de hat hamig hiyi-hiyoroho dobahat dahun. Ulug An TUHAN Mun Leho welahi on en nele mundoho ihi” isi.

³⁴

³⁵TUHAN Mun Leho wereg on ele uruk kwit, “Hat en An mun hapelehap daho nobaharihin deg hambol yig-nitihin ale ai fahet onggore hat henda nauk on mel, hambena duruk on mel hauk karuhun ai” isi.

³⁶TUHAN ele an nobam uruk kwit, “Ap homi waratuk on su yei, Ohola nim Oholiba nim unggum og-esahun en mundoho fouk deg lahen a? Iren siag naldo mireg ale duswa on etmano fahet bet-enebin.

³⁷It en babi deheg, ap wareheg duswa; iren mundoho kembu nim babi laheg, An nomaliki iren endag enepswa on wat-enebeheg, duswa. Airoho enowatswareg de omalik etmano iren enanggembu obahet feseswa.

³⁸Ai neg duswa fug. Eke iren An nobam wirig mel nukoho sabat An den fem deberihik on anyo mel emere fousa.

³⁹Nukoho iren An nomaliki enowatswareg enanggembu fahet waroho og-utuk salim anyo it biren owe aut nim eta An Nobam wirigmu watlug emerik waharuk katswa!

⁴⁰Iren de ap o kwenang yat kwe wereg on fam yonggo mon-enepswama re ap omano en yonggo fousa on anyo muko wahaswa. Ap bog etmano waharukmu enolohotma og-enebukoho re it owe aut nim enebe biren etano en de inil huhuni oho feheg, enalili angge lahabeheg, dusa.

⁴¹Ai debelug it nohoruk angge mun fano bano on emberimmu hwerieg latswa. Enerohole fil e doaleg fam de nauk angge enobahet osoko hopo deg latsi, airoho welatsi angge etma re no dupa amben angge mel zaitun ahalue mel, An den it og-esawihik angge omano mel wereg latsi.

⁴²Dagman hol haukmu ap enele anggunggare enahayeg en duruk on holduk katswa. Ap etmare o ili angge lek kwe omano en yonggo feseswama wahausa enap. Ap etman de sehene owe nim aut nim etano enenggikmu kwelabe feseheg, mahkota ebe on it enunggulmu bug-debeseheg, dusa.

⁴³Airoho dusama An den wenggel hauk kwit de, ‘Ap etman de homi hambena on babi[49] durukmen neg mundoho halo usa on eta nim duruk ale fahet enenda enahayeg deg ane?’ berihik.

⁴⁴Hwe Ohola mel, Oholiba mel homi hambena on biren mun enabut siag atsi on eta enekit de ap waharuk katswa on de eke salim eke waheg eke salim eke waheg duruk katswa.

⁴⁵Famen de ap bekitdoho wereg on en owe aut nim eta it babi deheg, ap wareheg, duruk katswa fam, iren dik-demdoho siag duruk katswama re it enebe ayo wiroho biling enebuhup,” ulug isi.

⁴⁶TUHAN Mun Leho wereg on ele uruk kwit, “Ap esan lohwaloho lauk kwit homi hambena duruk on biren eta enangge deleheg, enebe anggin-fanggin feseheg, duruk on etma wol-enebin.

⁴⁷Wol-eneplug de helep hwikdoho enowareheg, karog fam kongdoho enowareheg dukwag. It enomaliki re binggi enowareheg, enobam wirig harep fisareheg, dukwag.

⁴⁸O kwenang abirangge fene etma enobabut mun siag mireg ale dil noruk on An den bok-ap debehuk. An den duhuk ale aire it homi abirangge fahet eneluk doho duhukmu it fobik homi owe aut etan duruk katswa hag babi duhup hayog ulug duhuk.

⁴⁹Yaho, hit hwe Ohola nim Oholiba nim yei, An den hit unggum og-hesahuk aire hit en babi deheg, kembu mot-deheg duruk katuhup ai fam. Ai fam de hit en An TUHAN Mun Leho welahi on anyo heneluk amuhup” ulug isi.