Read Ninia Yali YEHEZKIEL 24 Bible Online

YEHEZKIEL 24 - Ninia Yali bible

YEHEZKIEL 24

¹Nit sabu hetdoho hwik-nenebik lausama weregman neg de tanggal sepuluh on fam bigalem oho num on fam tahun de sembilan on deg liem TUHAN ele an hweag-nutuk kwit,

² “Ap homi waratuk on su yei, tanggal yoho su salim de raja Babel on Yerusalem huhul kwik lasi salim anggere haren lisu baloho fein.

³An TUHAN en wal-heheg eke nomaliki nele sahalduk on su hweag-esaroho foroho lahi: Waruk esetuk angge elma ik hililoho kwelabe folug ai en indok emberimmu fein.

⁴Airoho debelug de ino angge mun fano on ai elma kwelabe fein; Ino enggik ino eiyog ino owag abohwe humdoho wereg on mel kwelabe fein.

⁵Eke domba ino sei wereg on mel, ket kuk on mel kwelabe folug de e wiroho[50] wereg on eke nim yale feyuk. Airoho debelug de ik hulug duruk kwit linggi nggi angge dukwag ulug embeselug weregman, ino angge mel owag mel etma hulugdoho esag amag” ulug isi.

⁶TUHAN Mun Leho wereg on ele uruk kwit, “Kota ap watni en hoporegma ai alemat atuk kamag! Kota aire waruk ip on horuruk eleg on hag deg. Ino angge ilonggoma wereg on etmano kong misig heg hundomog lisoho wilibik waharuk men, misig baleg ulug oho eke ilonggoma wereg lam fug ale deg.

⁷Kota ai fam en ap humdoho wat-enepuk katswa famen, waratuk on enamep omano helep omamne on emberimmu wamburuk katsi, kwenang fam wamburuk katsi fugmu ap en saluk fug ale deg latsi.

⁸Enemep ai An den helep fam eta embeseruk katihik ai fam amep ai kwelap halug onggo hweag-esahuk angge ulug duruk katihik” isi.

⁹TUHAN Mun Leho wereg on ele uruk kwit, “Kota ap watni en hoporeg obam ai alemat atuk kamag! Han yalikoho An namu en at indok ilim waruhuk.

¹⁰E eke nim wiroho feyek! Indok fisaho feyek! Ino angge etma hulug doho osoho feyuk! Ne ik ahalue[51] re hwik esakiuk. Ne oag de indok yaliuk!

¹¹Ketiare waruk perunggu on ele koloreg on ai indok emberimmu folug embeseluhupmu amoroleng dukwag. Ip ai mundoho han nilauk em, waruk ai nikangge agama fam wene melaleg wereg ale higitdoho aruhu.

¹²Famen de ip etma abirangge indok[52] en han nahu fug.

¹³Yerusalem yei, hat en mun siag mireg ale duruk katihin ale etma fam hat hebe emere fahat dawihin. Mu An den ho hamin ulug wal-hauk kahimu, hat mundoho emet atihin mu atlug de duk fug ale atuk. Hat ho am fug angge neg weregman de An nolok hat hobam feik waruhuk huli.

¹⁴An TUHAN Mun Leho welahi on en nele mundoho ihi ai. An den duruk katmin ale sali mundoho horog aik waharuk ai. An den hat hasiag napeleg aheg, ite ho habeheg, elehapdoho hobahakeg, helaheg en nenda hundig habeheg duhuk fug. Hat unggum de duruk katihin ale higit doho og-huruhuk. An TUHAN Mun Leho welahi on en nele mundoho ihi” isi.

¹⁵TUHAN ele an nobam uruk kwit,

¹⁶“Ap homi waratuk on su yei, fetagdoho neg An den ap hat henda hundig on wahuk. Famen de haren oba yi-yi ulug oba yareheg, ite hil owe wambukwag ulug embeseheg, duk fug.

¹⁷Hat oba liloho belapuk ale hol hahup hayog. Hat ap belahi wereg lit en heiyog ahap bug deg eleg angge mel, hunggul asum sambunig eleg angge mel la fug. Eke haren horohole hulilip duk fug, roti hweang foruk on oho na fug” ulug hweag-nitsi.

¹⁸Hubet dohore an ap unggul unuk ai nim nele matihik deg durukmen, hubanggore an nohwe waratsi, hubet de an wene melaloho hweag-nitsi ale etano higit doho dirihik.

¹⁹Airoho dirihikmu ap homi en hein og-neauk kwit, “Nenakni hat nunggwe ulug airoho duruk kahen? Haren duruk kahen on ai fam de nit fahet keroho amag ulug duruk kahen?” Ulug hweag-nutsa.

²⁰Ai usama an den uruk kwit, “TUHAN en an mingming napuk kwit

²¹wene diroho dukwag ulug hweag-esakiuk ulug hweag-nereheikma; hit en de TUHAN Obam wirig anyo fahet hemet dauk kahep. Hiren de hinil fu hauk kwit o ebe wirigmu etmano lauk kahep, famen TUHAN en At obam ai mundoho emeroho siahap debehu. Ne hit heneiyog indip kwe on enebe owan dot deg on de famen o Yerusalem suma wereg on de weim yapuk kwit enowaruhup.

²²Ai duhupmu hit en oho fobik an den ketia dihi ai hag duhup. Hit henorohole hulilip duhup fug, ne roti hweang on nahup fug.

²³Hit henenggul asum saleg eleg angge lauk kamuhup fug, heneyog sepatu het deg eleg angge, oba yiyi ulug yaruhup fug. Hit henesiag fam neg henenda kolo fi eheg, hit en at eke on fam henehummu siag beheg dil lauk kamuhup.

²⁴Airoho durukmu re an Yehezkiel de hit henobahet ilit angge aruhuk; Hit fobik an den duruk kahi au hag duruk kamuhup ale fahet duruk kahi. TUHAN ele uruk kwit, nanggig liem wene ai dip atuk halug hiren fobik At de TUHAN Mun Leho wereg on ulug henoluk amuhup” ulug hweag-esawihik.

²⁵TUHAN ele an nobam uruk kwit, “Ap homi waratuk on su yei, An den de o An nobam omamneroho wirig on fahet hit enambono aheg, enahayeg deheg, duruk kwit inil fu halug enanggiluk doho o wirigmu lauk obam ai mel, it enesahalimu en wahuk. Ai en eke it enomaliki inim wahuk neg.

²⁶Nukoho wene ai An den duhuk salim ai, ap misig eke ap elehap enepukmu ai en lil aruhu on en, waruhureg wene ai hit heneluk-ap henebik waruhu,

²⁷Ai salim hat oho hele matuk karuhun, hobu lareg welaruhun fug. Ai en haren ap ai nim hele maruhup. Airoho duhun aire haren it enobahet eneg angge duhun; mu re iren An TUHAN anyo eneluk amuhup” ulug hweag-nitsi.