Read Ninia Yali YEHEZKIEL 25 Bible Online

YEHEZKIEL 25 - Ninia Yali bible

YEHEZKIEL 25

¹ TUHAN ele an hweag-nutuk kwit,

²“Ap homi waratuk on su yei, o Amon kwenang fam on ai hururung enebin o.

³It unggul unuk ai on hweag-esauk kwit, it enobahet An TUHAN Mun Leho welahi on en hat hobam uruk kahi ale etma enesanggo holukwag, ‘Hit de An nobam wirig ai emere feheg, kwenang Israel en on siaho feheg, it enunggul unuk Yahudi on hele wareg og-eneplug laukmu kumu enusug ale fahet henahayeg deg.

⁴Ai fahet An den hit fotog hesawihikmu, unggul unuk amu on timur fil on en sebeloho henobahakup. Iren enobam sabo hit henanggwenang ma etma hundig saloho wereg lit, henahan anggen mel hit henowam sapi ag owe mel it nauk kamuhup.

⁵Kota Raba anyo An den ahamdoho no unta hwaldukmu debehuk, o Amon abirangge re domba hwalduk kwe debehuk. Ai fam An TUHAN welahi ale anyo hit heneluk amuhup’ ulug hweag-esakin” isi.

⁶TUHAN Mun leho wereg on en ele uruk kwit, “Hit henenggik dag duruk kwit henahayeg doho yunggulduk kahep. Hit de kwenang Israel on en anyo seram deg boruk kahep.

⁷Ai duruk kahep ale ai fahet de An den hit henebe abirangge ap ununggul unuk amu on humdoho fam og-esahukmu, henangge del deheg, hweleheg duruk kamuhup. Hit An den il hondoroho elehap henobahakukmu, hit hunggul unuk eleg doho, henobam kwenang mel wereg fug doho on amuhup. Ai fam de hiren An TUHAN anyo heneluk amuhup” isi.

⁸ TUHAN Mun Leho wereg on ele uruk kwit, “Moab[53] on en uruk kwit Yehuda on aire it enunggul unuk amu-amu on hag deg uruk.

⁹Ai fahet de, kota o Moab kwenang huli-huli along baloho wereg on etma An den it ap selei on en enowarik kukwag ulug fotog esahuk, aire kota mun fano on Bet-Yesimot mel, Baal-Meon mel, Kiryataim mel, et embesehuk.

¹⁰An den fotog esahukmu unggul unuk timur lei fil on en Moab[54] mel Amon mel enalong elehap debehupmu, Moab de it enunggul unuk soaloho wereg laruhu fug.

¹¹An den Moab on unggum og-uruhukmu, iren An TUHAN anyo eneluk amuhup” isi.

¹² TUHAN Mun Leho wereg on ele uruk kwit, “Unggul unuk Edom on en de it Yehuda on enolok fouswareg atlug de iren oho enolok hasimeg ale debeseruk katswa ale aire siag humon duswa.

¹³Ai fahet de An den wene unduhuk foruk kwit, ap homi Edom on unggum og-eseheg, ap homi mel, wam mel, etma wereg on mundoho binggi enowareheg duhuk. O kwenang ai abirangge re kota Teman en dulug de kota Dedan fam etma An den ap homi fumberoho elehap debesehuk; ap homi etma wereg on weim ambiangman mundoho enowaruhup.

¹⁴It An nunggul unuk Israel on de An den og-enebuhukmu enolok feseruk katswa enap Edom on onggo enowaruhup. Ne Edom enap de An nolok mun nik aleroho enepuk kahi ale anyo debesehuk. It Edom on en de TUHAN en il doho olok debeselug duruk alere diroho ulug unduk neg hahup. Ulug An TUHAN Mun Leho welahi on en mundoho nele ihi” isi.

¹⁵ TUHAN Mun Leho wereg on ele uruk kwit, “Ap Filistin on en de o endam et angge enolok foruk kwit neg welatswareg mun enehum kwe het fam ilmu siag aleroho debeseheg, mundoho elehap enebeheg, dusa.

¹⁶Ap fahet de An den nele unduhuk foruk kwit, ap Filistin on enowarik kuhukdeg it mun elehapdoho fesehuk. O Filistin elan kwe etman ap homi apuhuno welamuhup on de An den binggi enowaruhuk.

¹⁷An nolok enobam ferihik deg welahi on ai fahet An den unggum it mun anggin doho og-esaukmen neg homo nobahaku. Airoho og-esaukmu re An nolok en debeseruk ale anyo hauk kwit de, iren An nebe TUHAN anyo enoluk amuhup” ulug isi.