Read Ninia Yali YEHEZKIEL 26 Bible Online

YEHEZKIEL 26 - Ninia Yali bible

YEHEZKIEL 26

¹ Tanggal satu bigalem eke on[55] fam tahun oho nanggolop angge, nit sabu hetdoho hwik-nenebik lausama wereg liem eta fam TUHAN ele an nobam uruk kwit diroho isi,

²“Hat ap homi waratuk on su yei, ap homi Tirus wereg on en enehayeg en ngaikngog sup uruk kwit, enele fam de ‘Yerusalem anyo mundoho lilibug deheik! Di angge su angge onggo balduk kwit omamne deg on anyo mundoho longgo eheik. At de nit nim wal-wal ahe fug ha alereg!’ ulug uruk etma” ulug hweag-nitsi.

³TUHAN Mun Leho wereg on ele uruk kwit, “An sure hat Tirus haselei on welahi! An den hat huk habukwag ulug di ap su ap unggul unuk humdoho og-eneplug waruhukmu, it aire ik laut ahum funag-lenggag angge duruk hag doho wamuhup.

⁴It en hat hobam fak lehet wirig anyo lilibug deheg, along baleg angge omano lilibug deheg, duhuk. Kwenang etma wereg on abirangge An den ololo ho esahukmu helep unggul ahap on neg ik laut ahumu bul etma welaruhu.

⁵It ap ikan neg watil noruk on omano helep unggul ai emberimmu sum ahe anyo leruhup. An TUHAN Mun Leho welahi on nele mundoho ihi. Tirus de ap unggul unuk humdoho omano enombak angge hag aruhu.

⁶It enebe lit heheg og-enepuk kwit, ap homi kota etma wereg on o Tirus donggo kwe etma enowaruhup. Ai fam de ap homi Tirus on etman An TUHAN welahi ale eneluk amuhup” ulug isi.

⁷TUHAN Mun Leho wereg on ele uruk kwit, “An den Raja Nebukadnezar o Babel on anyo en hat Tirus hukdoho howarukwag ulug walug waruhuk. Raja mun omamne on aire il utara fil en waharuk kwit tentara esan humon nim, kuda humdoho nim, kereta lit halug dog yapuk on nim, ap kuda anduhunmu huratlug lauk on esan lohwaleg inim wamuhup.

⁸Ap homi kota etma wereg on o donggo kwe on etma re weim ai fam enowaruhupmu waramuhup. Selei on en kalog habuluhup deg hulug dahan doho kobog dil lahakup deg, dog bei angge humon enebe hembit angge deg lit hat hinim weim yapuk angge ulug wuruhup.

⁹Iren de fak lehet haren on anyo kwag meyalduk angge fam meyal-mayaldoho debeheg, ap lahalug kahalegma yatdoho belareg on omano bosie baleg angge fam lilibugdoho feheg, duhup.

¹⁰It enengge kuda humdoho degma lauk kwit, eneyogmen ul balug laharuk on en hat hebe hulilip hobaharuk karuhu. Ap kuda fam huratlug lauk kwit kereta nauk angge yohwareg on lisulug lauk on omano en sokole fene kwik laukmu nim, kota lilibugdoho obale neg degma ai kwik laukmu nim, it enamilmil en de hat halehet fak lehet oho on etma elek-felek uruk karuhu.

¹¹Ap kuda fam huratlug lauk on esan lohwaleg etman kwe uluhun uluhun etano kahale folug ap homi mundoho enenggarog fam enowaruhup. Ilit ilit angge fano omamne angge omano daloheg wambuhu.

¹²Heneselei on etman de henangge henenggik weregdoho fahat dalug lahep angge mel, onggo wauk on fahet foroho lahep angge mel, del dahup. Iren de hat hofak lehet mel hobam eberoho wirig on mel meyaloho fohup. Airebelug iren de helep, e, kwenang mel wahupdeg laut ahummu hwik esahup.

¹³ An den hat hasuni uruk kahen on nim binggong kecapi kong duruk kahen on mel bale fohuk.

¹⁴An den lili fohuk anggere we helep unggul ahap on misig it ap ikan watuk on en enasum ahe lerurukmu fahet fohuk. Kota ai fobik eke nim obalma wuruhup fug. An TUHAN Mun Leho welahi on en nele mundoho ihi” isi.

¹⁵TUHAN Mun Leho wereg on ele it kota Tirus on hweag-esauk kwit, “Ap homi ik luluk wereg on de ap amitmit hat sebeloho hobaharuk kwit uruk on mel, ap enowatukmu nenek duruk kwit uruk on mel holug, enekol en enowag elek duhup.

¹⁶ Hat habut aruhun ale heyalug, it raja unggul unuk unggul unuk angge omano ik laut ayeg kwe wereg on de takhta hweriegma omano en inatlug enesum ebe sum along wereg on omano mel, enesum seleben doho yihik on mel, nonggoloho embeselug enowag elekdoho kwenangma huramuhup. It enakol humon amuhupdeg enobam hambuk da fug angge welamuhup.

¹⁷Ai en de iren suni sal-enepuk kwit uruk on su hat hobahet uruk kamuhup: Kota mun mit-mot deg on anyo lilibug aha! Kapal aren on abirangge re laut en feleleng[56] deheik. Ap homi etma atam de laut fam enomamne humon welatswa ne ap ik ayeg kwe wereg on en enekol enepuk katswa enap.

¹⁸Ketia su hat sebele hobaharuk li em ahama, ap homi ik alo anggen kwe wereg on enoag elek duruk. Hat hebe mundoho ilmu siagdoho luluhun ahen ale ai fahet inil healug it youk lauk. Ulug uruk kamuhup” isi.

¹⁹TUHAN Mun Leho wereg on ele uruk kwit, “An den hat fahet de kota ap wereg eleg obam hag doho mun diring-dereng doho hobahakuk. An den hat mundoho ik laut ahum en obukdoho sal habuhuk.

²⁰Ai en An den hat kwenangma ap waratlug laukmu omano mon-habuhukmu lahundeg it ap endamet waratfag on omano nim seberik lahun. An den hat kwenangma ap waratlug laukmu etma mundoho ap waraswa on enesahalimu o bin waroho belap enepswa on omano sahalimu etma mon-habuhukmu welaruhun. Ai fam de hat hanggwenang fam it eke welamuhup fug, ne hat oho re ap homi enoluk wereg on enesahalimu[57] en oho dindilduk kamuhup fug.

²¹ Hat de An den wal-heheg enamelmel ale habuhuk, ne aire hat holuk ahae fotog doho aruhun ale re ai. Ap en hat hera hapuk kamuhup famen de, hweag-habuhup fug. Ulug An TUHAN Mun Leho welahi on en nele mundoho ihi” isi.