Read Ninia Yali YEHEZKIEL 27 Bible Online

YEHEZKIEL 27 - Ninia Yali bible

YEHEZKIEL 27

¹TUHAN Mun Leho wereg on en ele an nobam uruk kwit, “Ap homi waratuk on su yei, Suni sal-enepuk kwit uruk on su o Tirus ik ayegma wereg lit ap homi ik ayeg fomane nim onggo bal-bal atuk on etma enobahet suni wilibin. Tirus, hat hele hawonog fam uruk kwit, ‘An nil aluli buhun doho mun ahapmale eleg on hag deg lahi!’ uruk kahen.

⁴Haren ik laut ahum aire hobam wirig hag deg lahen. Hat hebe re kapal buhun on hag wit ahen.

⁵Hobam obahat de e ara Dom Hermon on en ne haren kapal bogsum borurukmu hol en walug lauk on aire e lak dom Libanon on fam wirig lahen.

⁶Ik ahum wat hil lauk angge re e humon o Basan on fam en buhun duswa Hwenie doaleg on de e lak fam doalswa indip o ik alo anggenma Siprus en on, alili angge re wam oag mun onggo along on fam wirig.

⁷Sum hol en walug lauk ale fahet boreg on mel, hat hebe eneg ale mel ai linen Mesir en on fam buhun duswa on, il amu-amu on fam seleben deg angge. Hat hobam sabo saleg angge sum etma re il sako angge, o Siprus en il bolu yunggwa baleg on.

⁸Ik il biatil lauk on de o Sidon mel, Arwad on mel. Homaliki heyabuk duruk on de ik laut fam lauk ale enggat humdeg enap.

⁹Ap e on fam wutuk ale eneluk deg lit kapal fam yabuk duruk on etma re o Gebal enap di ale su ale wutuk ale enoluk deg enap. O kwenang amu-amu kwe en di angge su angge onggo baleheg, hundureheg, dukoho kapal waharuk.

¹⁰Ap sehen seneg enap o Persia on Lidia on Libia on nim, tentara haren on kuhup. Iren de enendog bei angge mel, enenggulmu topi helep on mel, de hat hobam fak lehet fam sukni foruk fousa. Iren hat haweim on omano enalong eleg-ap debesoukoho let-habeheg, hunuk hum-ap hobahakeg, dusa.

¹¹Ap sehen seneg enap o Arwad on de halehet fak lehet fene omano kahaleg lit wereg; ne ap lahalug kahaleg angge fam omano re ap o Gamad enap en kahaleg lit wereg. Iren enandog bei anggere hat halehet fak lehet fam eraroho suknig. Iren neg hat horohole buhun hobaharuk.

¹²Hat en hasumenggan bulel-balel heg o Spanyol onggo hundutuk katihin, onggo baloho re hat hwelauk katihin angge bosie mel, perak mel, timah singon, kuron mel hwelauk katihin.

¹³Hat en Yunani fil hundurik laheg, o Tubal mel Mesekh mel fam hundurik laheg, durukmu iren onggo baloho ulug de mingming on mel di angge su angge no perunggu on en laleg angge mel og-hutukmu hwelauk katihin.

¹⁴Haren hangge sumenggan fahet aeg watuk katihin anggere, kuda kereta et wirig on mel kuda anduhunmu lahalug lauk on mel, no bagal o Bet-Togarma en mel og-hutuk katswa.

¹⁵Ap homi o Rodus[58] on enengge oho hat fam onggo wauk katswa, ne ap homi ik elan kwe wereg on en ohore hat hangge onggo hundutuk kwit de iren wam oag nim e sing on nim fam hundutuk katswa.

¹⁶It Siria enap onggo wauk enap en ohore hat hangge hasumeanggan mel haren henggik ambiangman hwelauk angge humdoho etma mel onggo balduk katswa. Iren de onggo no permata helep zamrud on mel kain il mep doho sohwanggen deg on mel, kain enenggik en seleben deg on mel, linen il sako on mel, permata helep koral on mel, helep mebon delima mel, fam onggo balduk katswa.

¹⁷It Yehuda mel Israel on mel en hat hangge nim aham duruhup anggere gandum mel, kin ahalue mel, zaitun ahalue mel, amben angge[59] mel, fam hwelawihin.

¹⁸Ap homi Damsyik wereg on en hat hangge hundutuk kwit, ambiangma og-hutswa anggere, anggur o Helbon on mel, domba oruk o Sahar on mel, bosie indokma werako al sahaleg on mel amben angge[60] mel fam hundutuk katihin.

²⁰Ap homi Dedan wereg on en, hat hangge onggo balduk kwit, kain no kuda anduhunmu doale folug ap huratuk angge fam onggo wauk katswa.

²¹Ap Arab on nim it o Kedar kwenang fam enalong wereg on nim en hangge hundutuk kwit, onggo domba omalik yohombuk on nim, kambing nim, hwelawihin. Hat hangge onggo hundurik waharuk kwit, it ap Syeba on mel, Raema on mel en permata mel emas mel, amben-amben angge mel, mun fano on walug waharukmu hwelawihin.

²³Kota Haran nim, Kane nim, Eden nim, ap di kwe su kwe onggo balukoho dil noruk enap o Syeba on nim, kota Asyur enap nim, Kilmad enap nim enebe abirangge en de hat fam hundurik waharuk katswa.

²⁴It en hat hobam sum onggo along on nim, kain il mep doho sohwanggen deg on nim, kain enenggik en yihik on nim, hwenie kwe doalduk angge il amu-amu on yihik angge nim, di sabu su sabu omamne wirik deg on nim hat hobam onggo balik waharuk katswa.

²⁵ Hasumenggan haren onggo balduk angge omano re kapal sumenggan onggo balik lauk on hum-ham on omano fam kwelapuk kwit uluk-uluk walug waharuk katswa. Hat hebere kapal sumenggan ele sopdoho kwelaplug, kapal ik ahum emberim kwe lauk on hag deg lahen.

²⁶Weta ik ahum biatil lauk on en og-haplug ik laut ahum healegma hobahaik laukmu hat hol timur fil on olok en opnag habuhu.

²⁷Hangge abirangge onggo fahet walug lahun angge nim homaliki laut fene noruk on enautsi nim, ap e on fam en wutuk ale enoluk enap nim, ap onggo balukoho di kwe su kwe lauk on nim, ap sehen seneg enap kapal ai fam wereg on enebe domog nim, nukoho hat obuk uhun salim ai it abirangge etma ik ilapma mundoho obuk uhup.

²⁸It ap laut fene noruk on omano enakol en nggaruhup enele ngga duruk on de ik ayeg kwe wereg on en anggungga hol hahup.

²⁹Ai en kapal anyo embeselug, homaliki laut fene noruk on kwenang ambuwema wilip amuhup.

³⁰Wilip amuhup deg iren hat hobahet oba yaruhup, iren enenda hunu duruk kwit iniluwe liloho belapuk kamuhup. It fong watuk ale enegdoho ul enenggulmu lahaplug ul kwe imbilduk kamuhup.

³¹Hat hobahet de it enelaha sauk nauk kamuhup. Kain karung belahwi sum wandebelug fong watuk kamuhup. It oba liloho laloho belapuk kwit Hat hobam aruhu ale fahet oba yatuk kamuhup.

³²Ai en it suni ap wareg salduk kwit uruk suni uruk kwit, diroho uhup, ‘Tirus, hat de sa nim ilit hea alereg? Tirus ketia hat laut fam en hele laroho welahen.

³³Misig salim hat ik ahum emberim kwe lahaik wambuk ha haplug lauk li haren sumenggan hoporoho yohware folug, haren it enunggul unuk enunggul unuk enap enangge anggolo deg on omano hoporoho feseheg; raja omano oho haren dung-ap debeseheg dirihin.

³⁴Ketia su hat mundoho obuk ehendeg, laut il apma erahamu luluhundoho eleg ahen. Homaliki abirangge nim hangge abirangge kwelabeg angge omano honggwareg nim seberoho laut ahumen longgo ehen ai’ uruk kamuhup.

³⁵Ap abirangge ik ayegma wereg on en de hat atuk ale heauk kwit enowag elek duhup. Raja iren on omano oho enakol humon amuhup; it enoroholere enamelmel en duruk ale enam aruhu.

³⁶Hat de li mundoho-mundoho fahet longgo uhundeg horohole eleg laruhun. Kwenangma wereg enap abirangge onggo hat nim bal-bal atuk on omano en de it oho airoho ahe hano ulug enekol en enowag elek neg duruk kamuhup” isi.