Read Ninia Yali YEHEZKIEL 28 Bible Online

YEHEZKIEL 28 - Ninia Yali bible

YEHEZKIEL 28

¹TUHAN ele an nobam hweag-nutuk kwit,

²“Ap homi waratuk on su yei, raja Tirus on hweag-imin, An TUHAN Mun Leho welahi on en raja Tirus on fam uruk kahi ale etma hweag-imin, ‘Hat leho fahat dauk kwit an de dewa kembu ik laut bik bulmu etma hwerieg welahi on boruk kahen. Fano haren an dewa on doho welahi ulug duruk kahen, famen de hat hebe ap on welahen ale anyo ebet hakiuk.

³Hat en boruk kwit de, an mun alongdoho enggat deg lahi, ne Danel[61] de ha boruk kwit de, di ale su ale etma hat fahet heraho ale eke wereg fug boruk kahen.

⁴Hat en henda enggat on fam wenggelduk kahen ale aire hangge emas nim perak nim kabog dauk ale fahet enggat deg lahen.

⁵Demdoho hat de hangge onggo hwelauk ale fahet enggat deg lit ketia dung atihin, ne henggik wereg ai fam de hat leho fahat dauk kahen ai’ eheik ulug hweag-imin” isi.

⁶TUHAN Mun Leho wereg on ele uruk kwit, “Hat Tirus yei, hat de hebe honggwareg en boruk kwit Allah hag deg lahi boruk kahen, An den ap tentara bog on mun enolok on hat howarik wamag ulug mondorik waruhuk. Iren de munangge manangge hat henda enggat fam dungon atihin angge omano iren wiririk wororog humuhup.

⁸Hat hebe re binggi howaroho laut il apma sal habuhup.

⁹Ne li ai higit aik waharuk halug de, haren an Allah uhun ale wereg a? It hat howatuk on inil hanim we hat hebe re ap homi on aruhun aire.

¹⁰Hat de ap bog on Allah enapeleg on en howaruhupmu re hat hebe ap mundoho enalitno on hagdoho wararuhun. Ulug An TUHAN Mun Leho Welahi on en nele mundoho ihi” isi.

¹¹TUHAN ele eke an nobam uruk kwit diroho isi,

¹²“Ap homi waratuk on su yei, raja Tirus on fahet oba yatuk kamin. An TUHAN Mun Leho welahi on en at fahet uruk kwit, ‘Hat de ap homi mun fano neg wereg ale fahet ilit angge hat atihin; endam hat mun enggat deg lit hebe bigin-buhun deg latihin!

¹³Hat hebe re o Eden, Allah eyabuk yahoma wereg lit hasum de, alili angge orohole dihinig yihinig on, helep permata onggo alongon: helep delima nim, intan, topas nim, helep pirus, helep yakut, ratna, cempaka nim, helep nilam, zamrud nim, helep alkali mep on nim, fam boroho wirig on welatihin. Hangge halili angge emas on oho humdoho welatsi. Hangge di angge su angge etma re hat hobahet on[62] hebe wal-hapuk salim ai wal-debesi angge.

¹⁴Hat etma waldoho hobaharihik deg de, malaikat [63] mun hamelmel on hat kahal husug lit welamag ulug An den ferihik. Hat de Nandom mun amu eneg on emberimmu wereg lit hebe helep permata helag-felag angge duruk on sahali kwe lauk katihin.

¹⁵Hat wal-hapsi hwilien siag duruk ale indip dirihin huli etma re hebe habut de siag eleg angge mun fano welatihin.

¹⁶Hat en de onggo weheg onggo baleheg duruk kwit asingsing welatihin fam hat og-haplug hape on mel siag on mel fam hobahaik lasi. Hat hebe An Nandom mun amu eneg on fam en muko wilip hapihik. Ne malaikat hat kahal husug wereg on en de hat hebe helep permata helag-felag angge duruk on sahalimu omano en hil baloho amu fil hobahasi.

¹⁷Hobabut de mun fano aire hat winik wonog uruk kahen, ne hunuk leho ai fam de hat en duruk ale moruwe ale duruk kahen ai. Ai fahet An den, hat kwenangma fulambe hobahakuk, ne ai fam de it raja amu on omano eneluk amag ulug duhuk eheik’ ulug hweag-imin” isi.

¹⁸TUHAN ele uruk kwit, “Tirus yei, haren de wene kabok duruk kahen kwe obale omano siag ale deheg, onggo bal-bal atuk kwit hwenaroho deheg, duruk kwit emere ferihin. Ai fam de An den hat indok yal habuhukmu, alkan damuk doho kwenang nim higit aruhun. Ap abit en hat fu heaukmu we indok alkan neg fu hauk kamuhup.

¹⁹Hat de li mundoho fahet eleg aruhun. Ap homi enunggul unuk abirangge it hat enoluk deg on en it fam oho am no ulug enakol en enoag elek duhup” isi.

²⁰ TUHAN ele an nobam uruk kwit,

²¹“Ap homi waratuk on su yei, kota Sidon ai hururung din.

²²An TUHAN Mun Leho welahi on en it ap homi ai enobam uruk kwit wene diroho eheik ulug hweag-esakin, ‘Sidon yei, An sure haselei on. An den hat fam debehuk ale ai fahet ap homi An mot-nabuhup. An den ap homi haren on etmano unggum og-esauk liem de iren An TUHAN mun eneg welahi on anyo enoluk amuhup.

²³Andem ouk amben siag on mondorik waruhukmu kwebene etma mep delelang duruk kamag ulug embesehuk. Hat de it haselei on en kwe uluhun ilitdoho en howarik waharuk kwit ap homi haren etma wereg on mundoho enowaruhup. Ai fam de haren An TUHAN welahi ale holuk aruhun’ ” isi.

²⁴TUHAN ele uruk kwit, “Ap homi kwenang Israel on eneluluk kwe en Israel enelitno enepuk katswa on etma re, ketia eke alog angge hag Israel enenda ouk-ap enepuk kamuhuk fug. Iren de An TUHAN Mun Leho on welahi anyo fu-nobahakup” isi.

²⁵TUHAN Mun Leho wereg on en uruk kwit, “An den ap homi Israel kabog debesehuk ai, kwenang indip yatma An den del-fol esawihikmu etman andog doho feseik waruhuk. Mu di ap su ap enunggul unuk abirangge en An mun eneg on welahi ale eneluk amuhup. Unggul unuk Israel sombandoho it enanggwenangma welamuhup. Kwenang An den Namingming angge Yakub og-itihikmu etmano welamuhup.

²⁶It etma lombukdoho wereg lit enobam wit deheg, anggur yabuk wit deheg, duruk kamuhup. An den it enunggul unuk eneluluk kwe on en enalitno enepuk katswa on etma unggum og-esahuk, mu Israel lioloho welamuhup. Ai fam An TUHAN Allah it enakni anyo eneluk amuhup” isi.